الحدث الأعظم قبل نهاية 2023.. نهاية الملفات الصعبة
ايه اللي هيحصل في ال40 يوم اللي باقيين في 2023.. وازاي بعد أيام المصريين هيودعوا أصعب سنة مرت عليهم في الاقتصاد والمعيشة وايه العهد الجديد اللي داخله عليه مصر وايه اللي هيحصل في ديسمبر اللي جاي وهيحط النقط على الحروف في الملفات الصعبة
كل المؤشرات بتقول إن سنة 2023 هتكون اخر طريق الصعب والأزمات الكبيرة وإن الزلزال الكبير اللي حصل وخلص واللي جاي مجرد توابع خفيفة قبل الاستقرار الكبير والانطلاق ودي على فكرة دورة الأزمات في العلوم الاقتصادية واللي عادة بتبتدي بأزمة خفيفة وبعدها تزيد لغاية ما توصل الذروة وبعدها تقل لغاية ما تختفي وهكذا.. وفي مصر أزمة الدولار وصلت لذروتها في الشهر اللي فات وبداية نوفمبر ومتوقع تقل حدتها مع نهاية الشهر قبل ما تختفي خالص.
ليه بتقول الأزمة الأساسية اللي تعبت المصريين طول شهور طويلة هتختفي.. شوف حضرتك الدولار هو سبب كل اللي بيحصل في البلد من صعوبات اقتصادية وكلنا عارفين القصة بدأت ازاي وامتي واللي حصل بعدها بداية من الحرب الروسية وارتفاع أسعار السلع عالميا بشكل كبير جدا وفاتورة الاستيراد وخروج الاستثمار المباشر أو الأموال الساخنه وبعدها ظهرت السوق السوداء وأطراف تانية دخلت على الخط وناس تانية استغلت الدولار في تسييس الأمور وحملات مغرضة وضغوط دولية كلنا عارفين هدفها كويس جدا..
مصر ماسكتتش وكانت قد كل التحديات وقدرت كمان تخلي الظروف الصعبة كلها تخدمها واستغلت أزمة الدولار عشان تخلص منه نهائيا وتستغني عنه ودخلت البريكس وعملت مقايضة عملات وبقت تستورد السلع بالسلع ووفرت مليارات الدولارات منو اكتر من بند في الاقتصاد زي ترشيد فاتورة الاستيراد والتعامل بالجنيه مع دول البريكس والمقايضة في استيراد السلع ودا هيحصل بمجرد دخول مصر البريكس رسميا يناير اللي جاي وبدأت أزمة الدولار تتحل رغم الأسعار الوهمية في الأسواق السودا والدليل توافر الدولار في البنوك بشكل كبير لاول مرة من ساعة الأزمة واستقرار أسعار الصرف واختفاء أزمة البضايع في الجمارك وانتظام عمليات الاستيراد.. طيب حضرتك ليه الدولار في السوق السوداء بيزيد.. هقول لحضرتك لنفس الأسباب اللي بتقول الدولار هيختفي ومحدش هيحتاجه زي الأول لأن السوق السوداء عاوزة تخلق حالة وهمية إن الدولار عليه طلب وسعره ضرب وفيه قرارات صعبة في الطريق ودا مش حقيقي باختصار هي عارفة النهاية قريت عشان كده بتضارب حلاوة روح
الحدث الأعظم في 2023 واللي هيدخل مصر لسنه2024 وهي مطمنة على مستقبلها هو إجراء انتخابات الرئاسة واللي المصريين منتظرين تجديد العهد للرئيس السيسي في وقت البلد محتجاه جدا عشان حماية الأمن القومي المصري والخطر اللي بقي حولينا من كل حتة والملفات الصعبة والخطيرة جدا واللي هو الوحيد اللي عارف يتعامل معاها ودا غير استكمال التنمية الشاملة وكل المؤشرات بتقول بردو إنه بداية 2024 هيكون فيه وضع تاني مختلف في مصر وكله خير
