بعد تجديد الوديعة الكويتية..يا ترى حجم ودائع الخليج في مصر كام؟
يا ترى ليه الكويت جددت وديعة لمصر بقيمة 4 مليار دولار؟ وكام بالظبط حجم ودائع الخليج فى مصر؟ ومين اكتر دولة ليها ودايع ؟ وامتى مواعيد سداد الودايع الخليجية؟ وايه دور الودايع دي فى الحفاظ على حجم الاحتياطي النقدي من العملات الأجنبية؟
من ساعات أعادت دولة الكويت الشقيقة تجديد وديعة بقيمة 4 مليار دولار لدى البنك المركزي المصري عبر شريحتين تنتهي الأولى بقيمة مليار دولار في إبريل الجاي وهتستمر التانية لغاية سبتمبر 2024.. وده فى في إطار دعم الدولة الخليجية لاحتياطيات العملة الصعبة في مصر لمساعدتها على تجاوز أزمة نقص الدولار.
ومش بس الكويت وحدها اللى قدمت دعم دولاري لمصر فيه دول تانية كتير على راسها طبعا المملكة العربية السعودية والكويت والامارات اللى ما اتاخروش عن الوقوف جنب مصر وأعلنوا تقديم ودايع بيصل مجموعها الى ما يقرب من 30 مليار دولار بالاضافة الى الاستثمارات المباشرة للدول العربية الشقيقة فى قطاعات كتيرة فى الاقتصاد المصري من خلال المساهمة في شراء حصص في بعض الشركات الحكومية اللى طرحت مؤخرًا ضمن برنامج الطروحات الحكومية اللى بتنفذه مصر وبيتضمن بيع اصول مملوكة للدولة لمستثمرين اجانب وصناديق استثمار عربية لسد الفجوة التمويلية فى الموازنة العامة وتوفير سيولة دولارية لسداد الالتزامات الخارجية.
بس يا ترى حجم ودايع الخليج فى مصر وصلت لكام مليار دولار؟
حجم الودايع الخليجية حاليا في البنك المركزي وصل تقريبا إلى حوالى 28.95 مليار دولار.. وبتعتبر السعودية والإمارات هما أكبر داعمين للاحتياطي الدولارية في البنك المركزي من خلال الودايع .. وحسب آخر تقرير صادر عن البنك المركزي بشأن الوضع الخارجي للاقتصاد المصري بيبلغ حجم الودايع السعودية حوالي 10.3 مليار دولار منها 5 مليار ودائع قصيرة الأجل، وأخرى بقيمة 5.3 مليار دولار متوسطة وطويلة الأجل.
ووفقا لنفس التقرير بيبلغ حجم ودايع الإمارات لدى البنك المركزي حوالي 10.65 مليار دولار منها 5 مليارات دولار ودايع قصيرة الأجل، والباقي ودايع متوسطة وطويلة الأجل.. وفيه كمان ودايع لدولة قطر الشقيقة بتم تمديدها بتبلغ 4 مليار دولار.
و بتهدف الاحتياطيات الدولارية لدى البنك المركزي إلى تأمين السيولة اللازمة للدولة لضمان تحقيق التزاماتها وبيستخدم كمان لتقليل الآثار السلبية الناتجة عادةً عن الأزمات الاقتصادية الخارجية وبيعتبر البنك المركزي المصري الجهة المسؤولة عن إدارة الاحتياطيات الدولية.
وبتتكون حيازات العملات الأجنبية في احتياطي مصر من مجموعة متنوعة من العملات الدولية الرئيسية زي الدولار الأمريكي واليورو والجنيه الإسترليني والين الياباني واليوان الصيني وبتتوزع الحيازات وفقًا لأسعار صرف العملات واستقرارها في الأسواق الدولية وبتتغير بناء على خطة بيحطها المسئولين عن ادارة السياسة النقدية فى البنك المركزي.
وبتشمل مكونات احتياطي مصر الدولية مجموعة متنوعة من الأصول، بما فيها العملات الأجنبية، والودائع، والأوراق المالية، والدهب، بالإضافة كمان لحقوق السحب الخاصة من صندوق النقد الدولي.
وفى اخر تقرير ليه وكشف البنك المركزي الاسبوع اللى فات أن صافي الاحتياطيات الأجنبية لمصر ارتفع إلى 35.102 مليار دولار في أكتوبر، مقارنة بـ 34.97 مليار دولار في سبتمبر. وده الارتفاع الأول للاحتياطيات المصرية فوق مستوى 35 مليار دولار من مايو 2022.
والاحتياطي النقدي معناه ببساطة انه الدولة يكون عندها مخزون من العملة، سواء دولار أو إسترليني أو يورو.. وبتكون الفلوس دي محفوظة في البنك المركزي للدولة.
طبعا هاتسأل وتقول هو الاحتياطي النقدي بيجي منين وازاى بتستفاد منه الدول.. بص.. هو الاحتياطي النقدي بيتكون لما كل اللي بيخرج من مصر وكل اللي بيخش مصر من عملة .. الفرق بينهم يطلع.. ولو كان الفرق بينهم زيادة في العملة مش نقص فدا بيكون عندي «حصالة» فلوس واللي بتتسمى «احتياطي نقدي».
حلو اوى.. طبعا هاتسأل تاني وتقول.. طيب واية اللي بنستفيده من دا.. الدول بتحطه كدا على جنب وماتستفادش منه بحاجة.. لأ طبعا في إفادة.. وهي أن الدول بتستثمر في الفلوس الاحتياطية دي في مشاريع سريعة الربحية.. يعني ماينفعش تستثمره في العقارات مثلا علشان الأرباح بتتأخر.. امال اية... الفلوس دي الدول بتشغلها برة في بنوك أوربا مثلا لو كان العائد عليها كبير وممكن تشتري بيه كمان أسهم وسندات وتستفيد من نسبة الفايدة اللي بتقدمها المصارف العالمية.
بس كدا.. هي دي كل المميزات.. لأ طبعا لسه في مميزات تانية مهمة، وهو أن الاحتياطي دا بيحافظ على أموال المودعين.. يعني لو لا قدر الله بنك من البنوك تعرض لأزمة أو سرقة مثلا.. فالبنك المركزي للدولة بيروح بسرعة مقدم فلوس من الاحتياطي النقدي علشان فلوس المودعين ماتروحش.
ولازم نكون عارفين أن الاحتياطي النقدي دا بيكون له دور مهم جدا في الاقتصاد القومي، وأي دولة بتحدد عليه قرارات وسياسات اقتصادية مهمة، لأنه بمثابة معيار
لقوة أو ضعف الدولة اقتصاديا سواء على الصعيد الدولي أو الإقليمي.
يعني لو كان حجم الاحتياطي النقدي لأي دولة عالي فبتكون الدولة قادرة علي انها تدبر اتفاقيات للاقتراض من المؤسسات الدولية والإقليمية طالما هي عندها احتياطي نقدي قوي، وكمان بيمثل ضمانة للدولة أمام الجهات والمؤسسات دي.. مصدر ثقة يعني.
وبيلعب الاحتياطي النقدي دور مهم في الاقتصاد القومي لأي دولة وبتاء عليه بتتحدد قرارات وسياسات اقتصادية للدولة وبيعتبر معيار مهم لقوة أو ضعف الدولة اقتصاديا علي الصعيد الدولي والإقليمي، ومع ارتفاع حجم الاحتياطي النقدي بتكون الدولة قادرة علي تدبير اتفاقيات للاقتراض التنموي مع المؤسسات الدولية والإقليمية مادامت بتمتلك احتياطي نقدي قوي وبيكون ضمانة للدولة أمام الجهات دي.
وتكمن أهمية الاحتياطي النقدي كمان في قدرة الدولة علي تدبير احتياجاتها من السلع الاستراتيجية والمنتجات الطبية والأدوية والمواد الخام التي تستخدم في الصناعة والإنتاج المحلي، لفترات طويلة وخصوصا في فترات الكوارث الطبيعية والحروب والاضطرابات السياسية والأمنية.
