الطفل المعجزة.. طالب مصري يدخل الجامعة من الابتدائية.. يا ترى اية السبب؟

طفل لسه في المرحلة الابتدائية.. بس عبقري ودماغه دماغ عالم.. شاطر في الفيزياء والكيمياء والرياضة وهو لسه في الصف الابتدائي.. لكن يا ترى الحكومة اكتشتفته ازاي.. ومصيره اية يلا بينا نعرف

في حدث نادر واستثنائي، النهاردة الحكومة المصرية اعلنت موافقتها على إلحاق طالب لسه في المرحلة الابتدائية، ونقلته  للدراسة بكلية العلوم جامعة دمياط بدلتا مصر، ودا خلي بالكم تم بشكل مباشر.. يعني هو تم نقل الطفل من المرحلة الابتدائية للمرحلة الجامعية مباشرة.. يعني من غير إعدادي أو ثانوي.

الطفل المعجزة دا اسمه يحيى عبد الناصر محمد، وهو مفروض كان مقيد بالصف السادس الابتدائي بمدرسة اللغات الرسمية بدمياط، وعلشان هو نابغ في كل التخصصات العلمية سواء علوم الفيزياء أو الكيمياء.. فالحكومة قررت إنه ينتقل للدراسة بكلية العلوم جامعة دمياط بدل من استكمال الدراسة بشكل عادي.

طيب السؤال هنا.. اازاي الحكومة اكتشفت ذكاء ونبوغ الطالب دا

اللي حصل.. هو أن مدينة زويل اللي بتستقبل النابغين في شتى ربوع الوطن بيعملوا بشكل دوري امتحان ذكاء اسمه IQ Test.. والاختبار دا صعب جدًا بالمناسبة وفي ناس كبيرة ممكن تفشل في تجاوزه.

ودا علشان هو اختبار للقدرات في المواد العلمية اسمه "STEM" واللي بيتم في مواد الفيزياء، و الكيمياء، و الرياضيات، و التفكير نقدي، وبيفضل الطالب قاعد في الامتحان دا لمدة 4 ساعات كاملة لكل اختبار.

المهم أهل الطفل.. لاحظوا نبوغ ابنهم.. وعلشان كدا قدموله للاختبار دا.. وبالفعل قدر من إنه يتجاوز كل مراحل الاختبار.. وحقق نجاح فائق وضعه ما بين أفضل 10 بالمئة من المتقدمين لاختبارات القبول.

خلاص كدا.. ننقل الطالب لمدينة زويل للنابغين.. لأ أبدًا.. دا كمان تم إخضاع الطالب لاختبار تحديد مستوى للغة الإنجليزية لمدة ساعتين.. وبالفعل حصل فيه على مستوى ممتاز، واللي يؤهله للدراسة بالجامعة، من غير الحاجة لمقررات تمهيدية في اللغة الإنجليزية، وبكدا يكون الطالب قد اجتاز امتحان القبول بجامعة زويل بتفوق.

بالمناسبة.. انضمام الطالب النابغة دا لكلية العلوم بقاله فترة.. وهو شارك بالفعل في الكثير من المحاضرات العلمية بكلية العلوم جامعة دمياط، وكمان تسلم شهادة تفيد حضوره بعض المقررات العلمية بـ"نظام الاستماع".

الميزة في الموضوع دا.. هو أن اااه دا طفل لسه صغير.. بس شديد الذكاء والنجابة.. فلية يفضل في مرحلة دراسية أقل من مستوى تفكيره.. بدل ما نصعده مستويات لأعلى علشان يقدر ياخد حصيلة علمية تتناسب مع قدراته.