ساعات الرعب في الأوساط المالية.. حقيقة اختراق أشهر خدمة مالية في مصر

يا ترى ايه اللى حصل في أشهر شركة خدمات مالية فى مصر؟ وهل فعلا الهاكرز اخترقوا نظام الشركة واستولوا على أموال المستخدمين؟ وهل البنوك فعلا حذرت عملائها من ترك حساباتهم والأرقام السرية؟ وازاى ممكن اشاعة بسيطة على السوشيال ميديا ممكن تعمل ارتباك وتثير المخاوف بالشكل ده؟ 

 
فى الساعات الخيرة انتشرت على منصات التواصل الاجتماعى انتشار النار فى الهشيم اشاعة عن تعرض تطبيق فوري للخدمات المالية عبر الإنترنت لاختراق من هاكرز وسحب وسرقة أموال المستخدمين واتقال ان تطبيق الشركة توقف تماما عن العمل، مما أدى لتوقف الخدمات اللي بيقدمها لأكثر من 300 ألف تاجر يعتمدون على التطبيق. 
واتقال ان فيه بنوك وشركات من اللى بتتعامل مع التطبيق طالبت عملائها بتوخى الحذر وباغلاق حساباتهم على التطبيق ومسح الباسورد الخاص بهم عشان ما يتعرضوش للنصب والاستيلاء على فلوسهم.. لكن الكلام ده مش صحيح والبنوك مطلعتش تحذيرات ولا حاجة 
و شركة فورى اتحركت على الفور و كشفت حقيقة تعرضها للاختراق  والاستيلاء على بيانات العملاء.
فوري أكدت على كفاءة وأمان دفاعاتها الإلكترونية عبر كل منصاتها وعن كل خدماتها المقدمة الكترونيا وقالت انه لا صحة لاي شائعات تناولها البعض علي بعض صفحات التواصل الاجتماعي بتعرضها لهجوم او اختراق لنظامها المعلوماتي.
وقالت الشركة في بيان ليها انها قامت على الفور بالبحث فى الخوادم الخاصة بالشركة على البث الحي وبناء على الاختبارات وأكدت انه تبين ليها أن الخوادم اللي بتخدم العملاء والبنوك لم تتعرض لأي اختراقات وانه ما تمش تسريب أي بيانات مالية أو بنكية خاصة بالعملاء، واكدت الشركة كمان أنها بتطبق أعلى معايير الأمن السيبراني طبقا لمتطلبات الجهات الرقابية العالمية.