مصر بتبني ديترويت جديدة.. قصة صناعة بتريليون دولار في شرق القناة
ايه اللي بيحصل في المنطقة الاقتصادية لقناة السويس وتحديدا في المنطقة الصناعية شرق بورسعيد وايه حكاية المدينة الجديدة اللي بتتعمل هناك وازاي مصر هتكون محور لصناعة جميع انواع السيارات ومركز تجارة المركبات في الشرق الأوسط
معروف في العالم كله إن ديترويت وهي أكبر مدن ولاية ميشيجان الأمريكية إنها قلعة انتاج السيارات الامريكيه على مدى عقود وأنها رمز للقوة الأمريكية الاقتصادية وشاهد كمان على عالم واسع من الاستثمارات والأعمال والبيزنس ييتخطى تريليون دولار في السنة، وكمان معروف إن صناعة السيارات في العالم وتطورها محل تنافس شرس جدا بين الدول المتقدمة وفيها شركات بميزاتيات مليارية وأرباح خرافية تساوي ميزانية دول بأكملها لأنها من الاخر صناعة معقدة ومتشابكة وبتدخل فيها عشرات الصناعات المكملة والمساعدة زي صناعة الاطارات مثلا والمرايا والستالايت والذكاء الاصطناعي والمحركات واللي بتكون صناعة مغذية للصناعة الام وعشان كده صناعة السيارات عالم واسع في الصناعة وبلغت القيمة السوقية لصناعة السيارات على مستوى العالم في 2022 لحوالي 3 تريليون دولار.
ليه بنتكلم نهاردة عن السيارات ومال مصر والكيانات العملاقة دي.. شوف حضرتك باختصار كده مصر بتبني مدينة كاملة لصناعة السيارات والصناعات المغذية ليها في المنطقة الصناعية شرق بورسعيد والتابعة للمنطقة الاقتصادية لقناة السويس يعني تقريبا مصر بتبني ديترويت جديدة في الشرق الأوسط باستثمارات مفتوحة يعني بمبالغ ضخمة ومتوقع تكون المنطقة مركز عالمي لصناعة السيارات والمركبات ولوازم النقل والسكة الحديد يعني هتكون قلاع صناعية كاملة ومتنوعة واستثمارات ضخمة.
تعالوا نعرف تفاصيل اكثر عن المشروع المصري الضخم.. المنطقة الاقتصادية لقناة السويس شاركت فى النسخة الخامسة للمعرض والمؤتمر الدولى للنقل الذكى والبنية التحتية واللوجستيات للشرق الأوسط وأفريقيا 2023Trans-MEA، وعرض وليد جمال الدين، رئيس الهيئة العامة للمنطقة الاقتصادية لقناة السويس، جهود الحكومة المصرية لتعميق التصنيع المحلى لمركبات السكك الحديدية بالتعاون مع القطاع الخاص، بحضور ممثلين عن وزارة النقل وصندوق مصر السيادى والقطاع الخاص والدكتورة هايكا هارمجارت كممثلة عن البنك الأوروبى لإعادة الإعمار والتنمية.
فى الجلسة الكلام كان على توطين الصناعات المرتبطة بمركبات السكك الحديدية والمستهدف منها والتسهيلات والدعم المالى الذى يمكن أن يُقدم للمستثمرين فى هذا الصدد، كما تطرقت الجلسة للخطط المستقبلية المتعلقة بصناعات المركبات والسيارات خاصة بمنطقة شرق بورسعيد الصناعية التابعة للمنطقة الاقتصادية لقناة السويس، واللي تم فيها إطلاق استراتيجية توطين صناعة السيار ات والصناعات المغذية ليها بما يتوافق مع القطاعات الصناعية المستهدفة لدى المنطقة الاقتصادية، و التعاون مع البنك الأوروبى لإعادة الإعمار والتنمية فى تمويل عدد من هذه المشروعات، بالإضافة إلى الحديث عن الحوافز الاستثمارية المالية وغير المالية المقدمة للمستثمرين فى هذا القطاع الحيوى ذو الأولوية لدى الدولة المصرية.
يعني الخلاصة مصر بتبني صناعة جديدة ورغم إن صناعة السيارات في مصر ليها تاريخ عريق لكن مخدتش طابع التطور والاستمرار ومجاراة التكنولوجيا الحديثة وإن المنطقة الصناعية في شرق بورسعيد قادرة تغير شكل المنطقة المرحلة الجاية بشكل كلي وزي ما احنا عارفين فيه مليارات الدولارات الهندية اللي داخلة بقوة في صناعة السيارات المتطورة في نفس المنطقة ولسه فيه كلام على استثمارات إسبانية وألمانية في قطاع السيارات بالمنطقة الاقتصادية ومع توافد شركات تصنيع السيارات العالميه على المنطقة هيكون عندنا صناعة بمليارات الدولارات.
وكفاية تعرف مثلا أن أرباح العملاق الالماني بي إم دبليو" 27.7 مليار دولار في السنة ومرسيدس وصلت أرباحها 22 مليار دولار يعني بنتكلم عن شركتين بس في المانيا أرباحهم حوالي 50 مليار دولار في السنة دا غير القيمة السوقية ليهم ودا بيعرفنا حجم السوق اللي منتظرنا قد ايه.
