خطة السيسي اللي جننت نتنياهو.. ودور العرجاني في تنفيذ مشروعات التعمير

  
الرئيس السيسي من أول يوم ليه في الحكم وهو عارف ان سيناء مطمع لدول كتير وعارف ان الإسرائيليين عايزين بأى طريقة يفرغوا أرض الفيروز ويخلوها أرض خاوية من الناس عشان يقدروا بعد كده ينفذوا مخططهم بتهجير أهالى غزة عندنا وبكده يكون صفوا القضية الفلسطينية للأبد وصدروا لمصر مشاكل مالهاش أول ولا آخر وعشان كده السيسي كانت عينه على تعمير سيناء بمشروعات تحسن حياة الناس وتغير شكل الحياة هناك.. فيا ترى السيسي نفذت خطته ازاي ؟ واعتمد على مين في عملية التعمير ؟ وايه المشروعات اللى كان لها دور في تغيير حياة الناس في ارض الفيروز؟ 
 

في الساعات الأخيرة  كان فيه زيارة مهمة جدا لرئيس الوزراء الدكتور مصطفى مدبولي لمدينة العريش في شمال سيناء للإعلان عن تدشين المرحل التانية من تعمير وتنمية سيناء بحضور عدد كبير من رؤسائل القبائل ومشايخ سيناء وعلى رأسهم إبراهيم العرجاني رئيس اتحاد قبائل سيناء.
زيارة مدبولي لسيناء في التوقيت ده رسالة واضحة من الدولة عن تمسكنا برفض كل المحاولات والضغوط اللى بتمارس على مصر للقبول بسناريو تهجير أهالى قطاع غزة الى سيناء .. ورغم كل المغريات اللى اتعرضت على مصر السيسي كان موقفه واضح ان سينا للمصريين ومش هنستغني عن شبر منها مهما كانت الضغوط. 
الرئيس السيسي وبصفته كان رئيس جهاز المخابرات وكمان وزير دفاع وقبل دول مقاتل في صفوف الجيش المصري يعرف كويس اوى أهمية ومكانة سيناء في وجدان المصريين ويعرف كويس جدا المصريين دفعوا ايه عشان يستردوا أرضها ويطروها من الاحتلال الإسرائيلي وعشان كده من أول لحظة رسالته كانت واضحة ورفضه مكنش محل تفاوض على ذرة رمل واحدة. 
وطبعا عشان الريس عارف ان العيون على سينا كانت تكليفاته مباشرة اننا مكملين في تنمية كل شبر في سينا وفى الاطار ده تمت زيارة رئيس الحكومة للعريش وتم الإعلان عن المرحلة التانية من خطة التنمية اللى بتتضمن مشروعات مهمة في كل القطاعات مشروعات سكنية ومشروعات سياحية ومشروعات زراعية ومشروعات بنية تحتية طرق وكباري وكهربا وصحة وتعليم باختصار نهضة شاملة في كل القطاعات.

وخطة التنمية اللى بتنفذها الدولة واللى جننت الإسرائيليين وعلى راسهم رئيس وزراء دولة الاحتلال بنيامين نتنياهو مكنتش هتتم وتحصل بدون تعاون كبير من أهالى سيناء وتحديدا رؤساء القبائل وشيوخ سيناء وأهم اسم في الخطة دي هو رجل الأعمال إبراهيم العرجاني اللى بيرأس اتحاد قبائل سيناء وشركاته هي اللى بتنفذ معظم مشروعات التطوير والبناء في أرض الفيروز. 
ولعب العرجانى دور مهم لمساعدة الأجهزة الأمني في القضاء على البؤر الإرهابية وتطهير سينا من الجماعات التكفيرية من خلال اتحاد قبائل سيناء اللى بيضم في تشكيله كل القبائل السيناوية .. ولأن زي ما بيقولوا أهل مكة أدرى بشعابها الدولة استعانة بالاتحاد لمطاردة العصابات الاجرامية والارهابية وبعد القضاء على كل البؤر اللى كانت بتهدد الأمن القومى بدأت مرحلة البناء اللى هتخلى سيناء مقصد للمستثمرين وللسياح وهتعمر ارضها بعد سنين من التجاهل عانى منها أهالى سينا على مدار الحكومات المتعاقبة. 
ولعب رجل الأعمال إبراهيم العرجاني دور مهم وفعال في عمليات التنمية اللى بتتم في سيناء وشركاته حاليا بتنفذ معظم المشروعات اللى الدولة عاوزة تنتهى منها في اسرع وقت في أرض الفيروز. 
ورئيس الوزراء في زيارته الأخيرة لسينا أتكلم عن المشروعات اللى بتتنفذ هناك وقال انه تم الانتهاء من المرحلة الأولى من "مدينة رفح الجديدة"، وان فيه  تكليف للبدء في المرحلتين التانية والثالثة من المدينة بالإضافة إلى بدء تنفيذ "مدينة بئر العبد الجديدة".
مدبولى أعلن شوية ارقام مهمة عن حجم المشروعات في سينا وقال ان الدولة نفذت مشروعات بقيمة 6.5 مليار جنيه، وتم رصد 38 مليار جنيه للمرحلة الجديدة للمشروعات الصناعية، وكشف ان المشروعات اللى بتتنفذ مش هتخدم سينا بس ولكن هتخدم مصر كلها خصوصا المجمعات الصناعية اللى بتتبني وهتدخل الخدمة قريب جدا.