مصر تنتصر.. ومؤسسات التمويل تعترف بأهمية دور القاهرة

 
اللي متابع اللى بيحصل فى كواليس الدول الكبرى اللى بتسيطر على مؤسسات التمويل الدولية ووكالات التصنيف هيعرف ان فيه تغير جذري بيحصل فى علاقة الدول دي بمصر من بعد العدوان الاسرائيلي على غزة.. وكل الدول دي دلوقتي بعترف بأهمية مصر وبدورها الكبير فى الأزمة اللى العالم كله بيدورلها على حلول.. موقف مصر التاريخي برفض التهجير وكشف خطورة اللى بتعمله اسرائيل على منطقة الشرق الأوسط بالكامل خلا كتير من المؤسسات تعرف قيمة ومكانة مصر وعشان كده بدأنا نسمع كلام جديد من قوى عظمى عن أهمية منح مصر التمويلات اللى عاوزاها وان مينفعش يسيبوا مصر تسقط أو يحصلها أى مشاكل.. فيا ترى ايه السبب فى التغير الجذري ده فى موقف الدول الغربية من مصر؟ وهل كده ممكن يسهلوا حصول مصر على التمويلات اللى محتاجاها لسد الفجوة التمويلية فى الموازنة العامة؟ وايه تأثير التصريحات الايجابية دي على أزمة نص الدولار؟
 

 
فيه تقارير مهمة جدا خرجت من مؤسسات تمويل دولية فى الساعات الأخيرة بتقول ان فيه تغير كبير فى نظرة المؤسسات دي للمشاكل والأزمات اللى بيمر بيها الاقتصاد المصري وبتقول كمان ان الدول الغربية بدأت تعرف وتفهم دور مصر المهم والحيوي فى الشرق الأوسط وده بعد الموقف والدور التاريخي اللى خدته وبتلعبوا القيادة السياسية فى أزمة غزة  ورفض مصر القاطع كل المحاولات والضغوط اللى اتمارست عليها لقبول تهجير اهالى قطاع غزة الى سيناء واعتبار ده محاولة لجر القاهرة الى مواجهة حربية مع تل أبيب بالاضافة لكشف خطورة المخطط ده على السلم والأمن القومي فى منطقة الشرق الأوسط واحتمالية اتساع رقعة الحرب ودخول دول تانية فى المواجهة مع اسرائيل. 
الموقف ده أكد على مكانة مصر فى المنطقة والمامها بكل أوراق اللعب وقدرتها على تهدئة الأوضاع وحماية العالم من حرب جديدة ممكن تجنب ويلاتها فى ظل وضع اقتصادي مأزوم بتعانى منه معظم دول العالم. 
وبسب موقف مصر ده عزز مصرف "سيتي جروب" الأمريكي من تفاؤله تجاه سندات مصر الدولارية من جديد، وقال انه بيعتقد أن مصر هتكون قادرة على الحصول على تمويلات جديد في نهاية المطاف على الرغم من التحديات اللي بتحاوط الاقتصاد بسبب الأهمية الجيوسياسية الكبيرة لمصر في المنطقة واللى هيخلى العالم متحمس لدعم مصر وعدم سقوط اقتصادها 
وأوصى الخبراء في "سيتي جروب" بالاستثمار في السندات المصرية اللى هتستحق في الفترة ما بين عامي 2031 و2050 .. وقالوا ان الاستثمار فيها فرصة كبيرة للمستثمرين
سيتى جروب قال فى تقرير ليه ان التأثير الكبير لمصر في المنطقة هيعزز سنداتها على رغم معاناتها من أزمة اقتصادية وقال ان فيه زيادة في مبيعات الأصول الحكومية وبالتالي تحقيق الحكومة للأهداف اللي وضعها صندوق النقد الدولي، وكل ده من شأنه المساهمة في خروج مصر من أزمتها.
وأكد البنك الأمريكي ان موقع مصر ودورها فى الأحداث فى غزة هيقوي موقفها فى التفاوض مع مؤسسات التمويل وكمان مع أشقائها فى الخليج حال طلب اى تمويلات جديدة .. وقال ان دور مصر بيبرز  كلاعب أساسي في الصراع السياسي الحالي، نظرًا للحدود المشتركة مع إسرائيل وغزة، بجانب دورها الهام في المفاوضات اللي بتحصل بين الطرفين من وقت للتاني . وان  مصر بتلعب دور حاسم كمان في تحديد مصير اللاجئين، فضلًا عن استمرارها في تقديم المساعدات الإنسانية لسكان القطاع المحاصر عبر معبر رفح البري.
مش بس سيتي جروب جريدة أمريكية معروفة هي فايننشال تايمز قالت ان اوروبا بتكثف جهودها لتأمين اتفاق دعم اقتصادي واسع النطاق مع مصر مع تزايد قلق الاتحاد الأوروبي من أن الحرب بين إسرائيل وحماس ممكن تتصاعد إلى صراع إقليمي واندلاع أزمة لاجئين جديدة.
الصحيفة الأمريكية قالت ان الاتحاد الأوروبي هيسرع برنامج مساعدات لمصر لدعمها اقتصاديا تحسبا لأى تطورات جديدة فى المنطقة وكمان لأهمية ومكانة مصر ودورها المحوري فى الصراع العربي الاسرائيلي