بقى مليونير في يوم وليلة.. قصة رجل جعلته «الصدفة» غني جدا

مش وردة الجزائرية قالت في يوم وليلة، يوم وليلة.. خدت حلاوة الحب كله في يوم وليلة.. أهو النهاردة بقى هانحكليلكم عن راجل بقى غنى جدا وبرضوا في يوم وليلة.. بس ماخدش الحب كله.. دا خد الفلوس كلها.

خلينا متفقين أن الناس ممكن تتغير حياتها ١٨٠ درجة بين عشية وضحاها، ودا بالظبط اللي حصل  مع راجل في تشيلي.. واللي كان كحيااااان زي ما قال خالد عليش لكن بقى مليونير فجأة وبالصدفة.

اللي حصل إن في راجل في دولة تشيلي في أمريكا الجنوبية.. كان بيفتش في متعلقات والده الراحل علشان يلاقي فجأة  في دفتر حسابات مصرفي  عمره ستة عقود.. مبلغ كبير.. واللي تسبب في تغير  حياة ابنه.

خلونا نحكيلكم القصة دي براحة كدا وببساطة.. وهو إن في راجل في تشيلي في الستينات و السبعينات كان بيدخر المال لشراء منزل.. وجمع على مدار سنين  ما يقرب من 140 ألف بيزو، يعني حوالي 163 دولارًا الآن.

ومع الفائدة والتضخم، تقدر الآن قيمة الـ 140 ألف بيزو بأكثر من مليار بيزو، أو ما يقرب من 1.2 مليون دولار

المهم بعد ١٠ سنين.. الابن هينوجوسا.. وهو بيروق البيت لقى دفتر الحساب بتاع أبوه مخزن في صندوق لعقود من الزمن.. وفيه المبلغ اللي قولنا عليه دا.

وبسبب ركود الحساب دا .. البنك صادر الحساب دا.. وعلشان كدا السيد هينوجوسا دخل في صدام مع البنك ورفع اكتر من قضية على البنك علشان يسترد فلوسه.

دلوقتي بعض المحاكم أصدرت عدة أحكام في صالح هينوجوسا الفقير ومن المنتظر إنه ياخد الفلوس قريب.