باي باي دولارات السوق السودا واللي تحت البلاطة.. سيستم جديد بأرقام العملات المتداولة.. صدمة العمر لتجار العملة
إيه اللي بيحصل في السوق السودا للدولار وايه سر الارتفاع الكبير في اسعار العملة الأمريكية وايه الضربة القاضية اللي البنك المركزي بيحضرها لضرب السوق السودا في مقتل وازاي دولارات السوق الموازية واللي تحت البلاطة مش هساوي الحبر اللي مكتوبة بيه.
زي ما احنا متابعين عمليات المضاربة في السوق السودا زادت جدا في الايام الاخيرة والدولار عدى حاجز الـ43 مع توقعات باقترابه من حاجز ال50 جنيه في الربع الأول من 2024.. وسبق وشرحنا ليه اسعار الدولار بتزيد في الفترة الأخيرة وعلاقة السوق السودا بالمافيا والتجار الأجانب اللي بيتحكموا فيها دلوقتي وبيشتروا الدولار بأي سعر وبيضاربوا في الأسعار رغم إنه مفيش اي أزمات جديدة في البلد وكمان مفيش تعويم لكن المافيا الأجنبية دي بتنفذ خطة شيطانية عشان تركع الدولة المصرية ومن الأخر كده تخليها في حالها وتغرقها في المشاكل الاقتصادية وتخف التركيز على اللي بيحصل في غزة وفلسطين وتغض الطرف عن الجرائم اللي بتم.. ودي مش مبالغة ولا شماعة بنعلق عليها الأزمة لكن دي حقيقية ومفيش حاجة بعيد عن التآمر والاقتصاد والسياسة داخلين في بعض واحنا قدام عدو بيستخدم كل امكانياته عشان يصدرلنا مشاكل لانه في موقف صعب جدا والموقف المصري شوكة في حلقه.
ومع اتساع المخطط على الدولار بعد اكتشاف استغلال بطاقة الخصم المباشر للمتاجرة في العملة الأمريكية ودخول أطراف غريبة للسوق الموازية البنك المركزي بيفكر في حلول واجراءات جذرية لوأد السوق السودا.. وفاكرين من فترة لما قلنا ممكن المركزي يلجأ لتصرف غير متوقع لدفن السوق السودا وهو الغاء فئات عملات الدولار اللي في السوق وبأرقام معينة وينهي التعامل عليها ويستبدلها بعملات جديدة وساعتها ناس قالت الحل صعب جدا.
في الساعات الأخيرة بدأ الكلام عن احتمال يحصل تصرف مشابه ووجود اقتراحات من ضمنها اقتراح لأحد قراء بانكير باستحداث نظام بنكي مميكن بالرقم المسلسل لكل عملة يتم التعامل عليها في القنوات البنكية الرسمية ويتم رفض أي عملة مش موجودة على سيستم البنك وكده دولارات السوق السودا والدولارات اللي تحت البلاطة مش هيبقى ليها قيمة، وعلى الأرض ممكن تبان الفكرة على إنها صعبة جدا جدا وإزاي البنك المركزي هيعرف أرقام المسلسلات على ورقات بنكنوت الدولار لكن العقبة دي ممكن يتم التغلب عليها بالتنكولوجيا المالية الجديدة هتقولي ازاي.. هقول لحضرتك زي مافيه ماكينة بتعد الفلوس في ثواني ممكن يتعمل نظام أو سيستم يحفظ أرقام التسلسل للعملة الامريكية ويتم الأول حصر وتخزين أرقام الدولارت في البنوك واللي في الاحتياطي النقدي واللي مع المستوردين والشركات اللي بتتعامل مع البنوك واللي في حسابات العملاء اللي بالدولار في كل البنوك يعني يتم حصر أرقام الدولارات للي موجودة في السوق الرسمية والشرعية ويتم الاعلان عن وقف العمل باي دولارات خارج الأرقام اللي متخزنة وطبعا الدولارات اللي في سوق السوداء أو المتخزنة في مخازن التجار والمضاربين واللي تحت البلاطة مش هيكون ليها قيمة وومكن لو الاقتراح دا تم عمله إن المركزي يمهل الناس اللي معاها دولار خارج نطاق البنوك والشركات والعملاء الشرعيين إنهم يسلموها أو يودعوها في البنك وبكده تبقى الناهية للسوق السوداء.
وفي حل موازي تاني تم اقتراحه وهي إلغاء اصدارات معينة من الدولار ودا لأن الدولارات اللي في السوق مش واحدة وكل دولار ليه سنة اصدار وسعره بيختلف في السوق السودا حسب سنة اصداره أو طباعته ويتم استهداف الدولار اللي موجود في السوق السودا ويتم إلغاء العمل والتداول على الفئات والاصدارات وبكدة بردوا هتبقى ضربة قاضية في السوق للسودا وألية فعالة لمواجهة أي محاولة لإحياء السوق الموازية للعملة، وعلى فكرة موضوع إلغاء فئات معينة من العملة دا قديم وفيه دول بتلجأ ليه ساعات عشان يواجهوا الجريمة المنظمة وعمليات تهريب العملة وحصل قبل كده في مصر لما زادات عمليات تهريب العملة المصرية لدول الجوار وثبتت فعالياتها ووجعت ضربات قاتلة للمهربين وخساير فادحة وبقت العملة اللي معاهم عملات تذكارية ملهاش اي قيمة.
