نص طن دهب راحت فين.. ايه اللي حصل في البنك المركزي

مصر من أول الدول اللي اخترعت تعدين الدهب والتنقيب عنه وتنقيته وتشكيله وكان عندها كنوز دهب من أيام الفراعنة ومصر مكملة وبتستكشف كنوزها من الدهب والمعادن والبدايات مبشرة جدا وبعد السكري فيه مناجم ضخمة هتدخل الخدمة قريب جدا..

الجديد بقى إن مصر بتستعد خلال الأيام الجاية بالاعلان عن طرح مزايدة جديدة للتنقيب عن الدهب والمعادن المصاحبة، والتي تُعرف بـ"التعدين الأهلى" فى 13 منطقة بمواقع متفرقة فى مصر ناحية أسوان وشلاتين بنظام المشاركة أو التعدين الأهلي زي ما بيسموه..والأهم إن المناطق دي من أغنى المناطق على مستوى العالم من حيث نسب استخراج الدهب ومتوقع تظهر فيها اكتشافات ضخمة وعلشان كده  شركة "شلاتين" نشرت تفاصيل المزايدة رسميًا تحت رقم (1) لعام 2023 على موقعها الإلكتروني باللغة الإنجليزية، بهدف جذب الشركات العالمية الراغبة في المشاركة في هذه الفرصة الواعدة.

والمناطق دي بتشمل  "فاطيري- البرامية- عتود- أم عود- حماطة" في الصحراء الشرقية المصرية.. واحفظوا الاسماء دي كويس عشان الفترة اللي جاية هتكون محل اهتمام مصري وعالمي.

في نفس الوقت شركة شلاتين قامت بتوريد حوالي نصف طن من الدهب للبنك المركزي المصرى خلال 2023، ودا بيعكس الأهمية الاقتصادية لهذا القطاع، وزيادة الإنتاج وتحسين البنية التحتية، وطبعا الدهب دا بيروح على الاحتياطي الاستراتيجي من النقد والمعدن النفيس .

في نفس الوقت فيه مشروع مهم جدا بيتم العمل عليه حاليًا وهو إنشاء مجمع صناعي يضم التعدين الأهلى، حيث قامت شركة إنبي التابعة لوزارة البترول، بإتمام مراحل التصميم والاستشارات الهندسية للمجمع، ومن المتوقع الانتهاء من بنائه في وقت وجيز.