جد ولا فنكوش.. حقيقة شراء ملعقة السنبلة بـ150 ألف جنيه

 
الموضوع جد ولا هزار  ولا نصب وفنكوش.. دور عليها في مطبخ تيتة أو في الروبابيكيا اللي عندك في البيت لو لقيتها يبقي اتفاحتلك طاقة القدر.. ايه حكاية المعلقة القديمة واللي عليها رسمة السنبلة

من فترة انتشرت صفحات على مواقع التواصل الاجتماعي بتعلن إن أي حد معاه لسه في مطبخه أي ملاعق وشوك السنبلة القديمة هتشتريها مقابل مبالغ مالية تصل إلى 150 ألف جنيه.

الموضوع مش نصب ولا تسالي لكن مبالغ فيه جدا ودا زي ما فيه ناس هوايتها في جمع الفلوس القديمة والانتيكات ناس هوايتها إنها تجمع ملاعق قديمة وشوك لكن بمواصفات معينة.. لكن الناس بتسأل عن الميزة في تلك الملاعق عشان فيه ناس تشتريها بالمبلغ دا  وسألت كمان عن طريقة بيعها، والأماكن المخصصة .

شوف حضرتك ملعقة السنبلة بتعتبر إحدى أقدم أنواع الملاعق التي تم استخدامها داخل مصر، وهي مميزة بوجود رسمة سنبلة القمح عليها، وعلى الرغم من تواجدها بكثرة قديمًا إلا أن وجودها في الوقت الحالي أصبح نادرً والحاجة كل ما تزيد ندرتها كل ما زادت قيمتها.

طيب ليه سعر ملعقة السنبلة سعرها بيكون غالي... دا لأن ملاعق السنبلة بتتميز بجودتها واحتوائها على نسبة كبيرة من الفضة بتخليها غير قابلة للصدأ رغم مرور  سنين كتير  عليها، ودا بيخلينا سلعة مميزة لهواة اقتناء المقتنيات القديمة، واستغلالها.

وعشان تعرف كمان .. ملعقة سنبلة القمح ملعقة فضية بدأ استيرادها في الوطن العربي عام 1970م، واستمرت حتى سنة 1983م، وكانت متواجدة في أغلب البيوت المصرية، وقام التجار باستيراد ما يقرب من 30 مليون ملعقة.

وبتمتاز ملعقة السنبلة الأصلية بتركيبها الكيميائي اللي ييتكون من الحديد والفضة واللي بييمنعها من الصدأ لمدة تتجاوز الـ 50 سنة، بالإضافة إلى رقة وأناقة رسمة سنبلة القمح عليها.

بعد انتشار منشور بيع ملعقة السنبلة بأسعار كبيرة، ناس كتير بتسأل  ازاي يبيعونها  عورض عدد من الأشخاص المالكين لها، صورا لتلك الملاعق عبر مواقع التواصل الاجتماعي، ومواقع بيع وشراء السلع المختلفة عبر الإنترنت.

على الرغم من انتشار منشور بيع ملاعق السنبلة مقابل 150 ألف جنيه، إلا أن  السعر خيالي وبعيد عن السعر الحقيقي لتداولها، بحسب تأكيد أحد تجار المقتنيات القديمة، واللي أكد إن سعر الملعقة الواحدة منها 30 جنيها بس إذا كانت محتفظة بكامل جودتها.

وكان نشر أحد تجار الأسواق القديمة منشورا عبر أحد مواقع التواصل الاجتماعي، يرغب من خلاله شراء ملعقة السنبلة مقابل 500 جنيه للملقعة، وقال“ اللي عنده من دي اشتريها منه بـ 500 جنيه ياريت اللي عنده يعرفني مهما كانت الكمية والبوست جاد مش هزار ويبعت الصورة في ماسج أو ادد وأنا هتواصل معاه”.