رجع ومعاه 18 مليار دولار و10 مصانع.. مدبولي رجل الدولارات الصعبة
الدكتور مصطفي مدبولي حقق نجاح كبير جدا في زيارته الأخيرة لبلاد التنين الصيني وقدر يرجع مصر وفي ايديه 18 مليار دولار و10 مصانع ضخمة ومشروعات عملاقة .
رئيس الحكومة مصطفى مدبولي ونيابة عن الرئيس السيسي كان في جولة ناجحة بالصين على هامش منتدى الحزام والطريق وكان الوفد المصري مرحب بيه جدا ودا بسبب خصوصية العلاقة بين مصر والصين واللي ليها سنين طويلة وكلها إيجابية وبتقوم على علاقة التعاون والحضارات القديمة.
والجولة أثمرت عن جذب مايقرب من 18 مليار دولار استثمارات جديدة و 10 مصانع عملاقة بمختلف القطاعات واللي من المقرر تنفيذها داخل العاصمة الصناعية الصينية بالعين السخنة "تيدا".
والحقيقة الصين بتعمل ملحمة في المنطقة الاقتصادية بقناة السويس أو نقدر نقول إنها بتعمل هونج كونج جديدة في مصر ودا بسبب استثماراتها الضخمة في المنطقة وكفاية أقولك إن مصنع شركة يونايتد إنرجي لوحده هيكلف استثمارات 8 مليار دولار لإنتاج 4 مليون طن من كلورايد البوتاسيوم ،
ومصنع تشاينا إنرجي باستثمارات 7 مليار دولار لإنتاج 1.2 مليون طن من الأمونيا الخضراء ودا غير مصانع إنتاج مواسير الزهر وأنابيب حديد الديكتايل لتغطية إحتياجات إمدادات خطوط المياه والصرف الصحي وتحلية مياه البحر.
ومصانع الزجاج لإنتاج الزجاج المصقول والزجاج المدلفن بقدرة إنتاج 1600 طن يوميًا.
ودا غير مصانع المنسوجات والملابس والألياف الضوئية وخيوط البوليستر وغيرها، والمدينة الصناعية الصينية بتعتبر قلعة صناعية متقدمة في افريقيا وانتاجها هيعتمد على التصدير لباقي دول قارة أفريقيا ولسه دي البداية وفيه مليارات تانية هتيجي عشان بقية المصانع وعشان التوسعات.
