عُقد المصريين.. والبداية مع الديون والاستيراد

الديون واننا بلد مستورد ومش بنتج ومتخلفين اقتصاديا دي من أهم العقد واللي اتربينا عليه من واحنا صغيرين لكن مشفناش حل جذري للمشاكل الاقتصادية دي على مدار عشرات السنين وكانت الزيادة السكانية هي الشماعة اللي بنعلق عليها خيبتنا وديونا وقلة حيلتنا.

آفة مصر كانت الاستهلاك اللي خلق الديون وخلى الدولة تستلف عشان تستورد السلع للشعب وبنقول كان عشان دلوقتي فيه فكر جديد بيتنفذ على الارض بينهي فكرة الاستيراد وثقافة الاستهلاك وبيوطن الصناعة وبينتج محليا ولاول مرة يبقي عندنا رؤية للانتاج والتصنيع والتصدير وأول مرة نشوف أرقام صادرتنا بيزيج بشكل كبير جدا والمفترض يوصل 100 مليار دولار في فترة قليلة جدا.

ومسألة الديون الخارجية وعلينا 165 مليار دولار ومطلوب سداد جزء كبير منهم في السنين القليلة اللي جاية الحكومة فكرت بره الصندوق وقررت تجدول جزء منها مع دول وتحول الديون لاستثمارات في التنمية وعمل المشروعات وقدرت تعمل اتفاقيات مع ايطاليا والمانيا واخيرا الصين لمبادلة الديون في مشروعات لصالح البلدين ولسه فيه مفاوضات تانية مع دول ليها فلوس عندنا عشان تحولها لاستثمارات أو تجدولها وتتخلى عن جزء من الفوايد أو اصل المبلغ أو تحويلها لودايع.