السيناريو المرعب في المنطقة.. إسرائيل في وش مصر والسلاح صاحي
الوضع في المنطقة خطير جدا وزي برميل بارود النار يتقرب منه بسرعة كبيرة وكل الاحتمالات واردة مع التطورات السريعة ومصر في قلب الحدث بفعل إنها الدولة الأكبر في الوطن العربي وبسبب حدودها المباشرة مع فلسطين المحتلة ودولة الكيان والحرب على حدودها ولأن بردو مصر هي المنافس الوحيد لسكان غزة عن العالم بعد الحصار البري والبحري الشديد عليهم من سنين طويلة.. لو حصل السيناريو الاخطر وسيناء اتعرضت للخطر ايه اللي هيحصل في المنطقة
عشان نفهم احنا ممكن نعمل ايه في اللي بيحصل دلوقتي بالمنطقة لازم نرجع القديم ونشوف الدورس واتقال ايه عن مصر وحب المصريين لارضهم وترابهم وشرفهم وكبريائهم وكتب التاريخ بتقول إن الحجاج بن يوسف الثقفي قال: عن المصريين في وصيته للقائد "طارق بن عمرو" : (لو ولاك أمير المؤمنين أمر مصر فعليك بالعدل , فهم قتلة الظلمة , وما أتي عليهم قادم بشر إلا أكلوه كما تأكل النار أجف الحطب , وهم أهل قوة وصبر وجلده وحمل , ولا يغرنك صبرهم ولا تستضعف قوتهم , فهم إن قاموا لنصرة رجل ماتركوه إلا والتاج علي رأسه , وإن قاموا علي رجل ماتركوا إلا وقد قطعوا رأسه , فأتق غضبهم , فإنتصر بهم فهم خير أجناد الأرض , وأتق فيهم ثلاثاً : نسائهم فلا تقربهم بسوء , والا أكلوك كما تأكل الأسود فرائسها – أرضهم وإلا حاربتك صخور جبالهم – دينهم وإلا أحرقوا عليك دنياك , وهم صخرة في جبل كبرياء الله تتحطم عليهم أحلام أعدائهم وأعداء الله.. دي بالظبط حال المصريين اللي يقرب من بلادهم وشعبهم يأكلون زي الأسد ما بياكل فريسته.
ودا اللي قاله الرئيس السيسي في وش الإسرائيليين انسوا سيناء واللي هيقرب منها هيبقى حفر قبره بايده والجيش اللي عملها مرة قادر يعملها كل مرة والرسالة وصلت تل أبيب وفهموها كويس وعرفوا إن أي مغامرة هتكلفهم كتير وممكن تكلفهم دولتهم لأن مصر مش هتسيب اي رجل غريبة تخطي سيناء والرجالة سهرانه وعنيها مابتنمش والسلاح صاحي.
طبعا مصر بتتعامل مع اللي بيحصل بسياسة التأهب القصوى لاي تطور أو جديد.. طيب لو حصل وتم الاعتداء على التراب الوطني أو اجبار الفلسطينين على النزوح بقوة. واعداد كبيرة على سيناء من معبر رفح او اي منطقة على الحدود.. طبعا هنا كل القوانين الدولية بتقول إن مصر هتستخدم حقها في الدفاع عن أرضها وهترد على اي استفزاز بكل القوة الغاشمة ولو دا حصل يبقي النار مسكت في برميل البارود والشرق الأوسط هيتغير وكل المعادلات السياسية والاقتصادية والاجتماعية هتتقلب ودا لأنه بعدها مش هيكون فيه إسرائيل أصلا.،. عشان كده الكيان المحتل عمره ما هيغلط غلطة عمره وينتحر على أرض سيناء وحتى لو كانت رصاصة على سبيل الخطأ .. لأن الغضب المصري المرة دي هيكون عنيف وغير مسبوق وهيكون على حق
