هنبني ونعمر ومصر هتكون قد الدنيا.. رسالة السيسي المشفرة

اوعا تكون فاكر ان الدول الكبيرة زي الولايات المتحدة وبريطانيا ناسيين اللى عمله فيهم السيسي.. واوعا تتصور انهم ممكن ينسوا انه بوظ مشروعهم اللي أطلقوا عليه مسمى "الشرق الأوسط الكبير".. واوعا تفكر أن أجهزة المخابرات زي السي اى ايه والموساد والــ ام اي سيكس وغيرهم كتير ممكن يسيبوا السيسي ينجح أو يحاول يعيد بناء مصر ويحل كل المشاكل اللى منغصة حياة المصريين.. وكل شوية هتلاقيهم بيحاولوا يهيلوا التراب على أى انجاز بيحصل فى البلد ويقللوا من أى خطوة بتاخدها الدولة لقدام.. وأكيد ملاحظ حجم وكمية التقارير اللى بتطلع كل شوية واللى بتستهدف بشكل واضح الجنيه المصري وبتحاول تشكك في قدرة مصر على الوفاء بالتزاماتها الخارجية.. فيا ترى إيه التحركات اللى بتحصل لافشال مشروع السيسي ومنعه من استكمال مسيرة البناء والنجاحات اللى بتحقق فى كتير من القطاعات؟ ومين اللى بيدير الحملات الموجهة ضد مصر فى الشهور الأخيرة؟ وليه قنوات الاخوان وأبواقها الاعلامية مش سايبة حاجة بتحصل الا وبتحاول تشويهها؟ وايه دور مؤسسات التمويل الدولية فى اللي بيحصل؟ 
 

فى 2013 الرئيس السيسي شال روحه على كفه واستجاب لمطالب الشعب وقرر يحط نهاية لحكم جماعة الاخوان اللى كانت مدعومة من دول كبيرة وجاية تنفذ خطط اتحطت فى عواصم عالمية هدفها ان مصر تكون تابعة للغرب بشكل كامل.. وبتعمل اللى يتطلب منها حتى لو كان على حساب مصلحتها.. أوحساب مصلحة الامن القومي.. السيسي كان واضح جدا ومن اللحظة الاولى لخروج المصريين فى الشوارع للمطالبة باسقاط حكم المرشد انحاز لمطالب الناس ومكنش فارق معاه مستقبله ولا وضعه لو لا قدر الله الثورة على الاخوان فشلت وعرض حياته وحياة أسرته وكل اللى حواليه لخطر كبير جدا. 
وبعد نجاح ثورة 30 يونيو والاطاحة بالجماعة اللى كانت جاية تقسم البلد وتسير الفتنة استلم السيسي مصر وهي فى حالة صعبة على كل المستويات ومن أول يوم ما استسلمش للأمر الواقع وخد على نفسه عهد انه يخلى مصر قد الدنيا ويحاول يصلح ويطور ويبني ويعمر رغم صعوبات وتحديات خطيرة كانت فى الولاية الأولى للسيسي كان أخطرها طبعا اللارهاب والجماعات اللى كانت بتحاول تنشر الرعب فى سيناء وفي غير من المدن وكلنا شفنا الهجوم اللى تم على معسكرات للجيس وعلى مقار الشرطة وعلى دور العبادة. 
لكن السيسي نجح انه يقضى على الارهاب ويطهر سينا من الجماعات التكفيرية واسم سينا بعد ما كان مرتبط بالقنابل والمتفجرات والصواريخ بقا ما بيتقالش غير مقرون بالتعمير والمشروعات الجديدة والاستثمار وده انجاز عمل مشاكل كبيرة لأجهزة مخابرات كانت عاوزة تحول سينا لمقر دائم لجماعات التكفير المسلحة وتخلى حدود مصر الشرقية ملتهبة. 
السيسي ما اكتفاش بنجاحه فى الحرب على الارهاب .. وواصل رحلة النجاحات فى مجالات تمس حياة المصريين ومنها ملفات فضلت منسية سنين طويلة زي التعليم وازاى قدر يطوره سواء على مستوى المناهج أو البنية التحتية وبناء مدارس جديدة وتطوير القديمة واعادة تأهيل المدرسين. 
ومش بس التعليم السيسي كان مهتم جدا بصحة المصريين واشتغل على أكتر من محور أولهم كان المبادرات الرئاسية لعلاج بعض الأمراض ومنها المبادرة الرئاسية 100 مليون صحة اللى استفاد منها معظم المصريين والمبادرة الرئاسية للقضاء على فيروس سي واللى مصر نجحت من خلالها فى تحقيق نتايج مبهرة وحازت على اعجاب وتقدير منظمة الصحة العالمية وعلى مستوى المستشفيات حصلت ثورة فى المستشفيات الحكومية سواء على مستوى المباني وتطويرها وافتتاح مستشفيات جديدة أو من خلال القضاء على قوائم الانتظار وزيادة الميزانية المخصصة للعلاج على نفقة الدولة وتسريع الاجراءات لأقل حد ممكن. 
وبعد ما اتطمن السيسي على التعليم والصحة بدأ تنفيذ رؤيته للجمهورية الجديدة واللى بتتضمن بناء عدة مدن كان أهمهم العاصمة الادارية اللي حرفيا حولت التراب الى دهب وخلت متر الأرض يوصل لأرقام غير مسبوقة فى مكان كان من سنوات قليلة صحراء جرداء 
مش بس العاصمة الادارية مشروعات التعمير والبنا موجودة فى كل حتة فى مصر والمدن الجديدة للمحافظات بقت منفذ جديد للهروب من الزحمة وبناء حياة جديدة فى مجتمعات عمرانية متكاملة. 
ولأن السيسي عارف ان اى بلد مش بتنتج هتفضل أسيرة للاستيراد تبنى استراتيجية وطنية لتوطين كتير من الصناعات وادى تعليمات ان اى سلعة ليها بديل محلى ما يتمش استيرادها من الخارج وده قلل الفاتورة الاستيرادية وخفف الضغط على العملة الأجنبية وأتاح كمان فرص عمل فى المصانع الجيدة اللى تام افتتاحها وخلا البلد تتنفس.. وطبعا ده فى المستقبل هيخلينا نستغنى عن كتير من السلع اللى كنا بندفع فيها مليارات الدولارات عشان نستوردها من بره ومش بعيد كمان بعد شوية نبدأ نصدرها 
السيسي كمان شايف بكره كويس جدا وعشان كده بيحاول يحرر مصر من التبعية لأى حد أو أى مؤسسة واللى متابع هيعرف ان مصر وقعت مجموعة من اتفاقيات تبادل العملات اللى هتخلينا نتحرر بشكل كامل من هيمنة العملة الأمريكية سواء فى حركة التجارة او حتى فى حجم الاحتياطي النقدي فى البلاد ومصر خدت خطوة مهمة وكبيرة فى سبيل التحرر من الدولار بانضمامها الى تحالف بريكس اللى بيعتبر واحد من أهم التحالفات الاقتصادية فى العالم وبيستحوذ على حوالى 30 من اجمالى الناتج فى العالم. 
طبعا كل الانجارزات دي أبواق الاخوان ولجانهم الاعلامية مش شايفينوا ومركزين بس على مستقبل الجنيه وعلى تعثر الحكومة فى سداد الالتزامات الخارجية رغم ان مصر من أكتر الدول فى العالم اللى بتسدد اللى عليها فى المواعيد المحددة ومفيش مؤسسة تمويل ولا جهة اقراض طلعت واشتكت من تأخر الحكومة
لكن الغرض مرض وغرض الأبواق دي وغرض اللمؤسسات اللى بتطلع تقارير مضروبة عن مصر هو السيسي ومحاولة تعطيله عن رحلة البناء ومسيرة التنمية اللى هتنقل مصر لحتة تانية خالص