قناة السويس تتحدى الممرات الوهمية.. قرارات جديد للي عاوز يعدي

 

مهما عملت مصر من مشروعات عملاقة بداية من الاهرامات معجزة البناء والتشييد والغموض المصرية للعالم لغاية محطة مترو إمبابة هتفضل قناة السويس هي المشروع العبقري في العصر الحديث لانه مش بس مشروع اقتصادي لكن دا اهم ممر دولي في العالم وأهم أداة جيوسياسية في يد مصر ولأن هيكون محور مشروعات تانية حوليه بمليارات الدولارات دا غير أهميته الاستراتيجية للدولة المصرية.. النهاردة القناة اتحدت كل ممرات العالم الوهمية البديلة بقرارات مهمة.. ايه اللي حصل وايه مغزى القرارات دي دلوقتي.
 

قناة السويس ملهاش بديل بنفس المميزات والقدرات واي مشروع بديل وهم ومش هياخد من حصتها حاجة.. دا كان رأي خبراء النقل البحري والتجارة في العالم كله لأن القناة مشروع اكتر من عبقري سواء من ناحية الموقع الجغرافي وربطها بين طرق التجارة والقارات أو بسبب عوامل الأمن والامان للتجارة المارة والسفن والاطقم البشرية على ضهر الناقلات العملاقة وبسبب تطور الخدمات الملاحية في قناة والاحتراف في الإدارة وعشان كده محاولة خلق ممر بديل هتكون مستحيلة لأنها محاولة ضد الطبيعة ومقاييس الزمن والمسافات وعوامل الخطر والأمان وعشان كده الرئيس السيسي كان مؤمن إن قناة السويس كنز مصري لازم يطور ومش هيفضل مجرد ممر تعدي فيه السفن وبدأ اخطر مشروع لتطوير القناة واستغلال موقعها وكانت البداية بمشروع قناة السويس الجديدة والتوسعات وبق القناة رايح جاي ودا فرق كتير جدا في الوقت وادى القناة ميزة لاتقدر بتمن في توفير وقت عبور السفن ودا هيوفر كتير لشركات الملاحة البحرية الدولية وكمان هيوصل البضايع والشاحنات بسرعة أكبر وهتوفر النفقات على الشركات وبالتالي أرباحها هتزيد.
وكمان مصر عملت اقتصادية قناة السويس وهي المنطقة العبقرية في موقعها واللي رجال اقتصاد قالوا إنها هتكون اقوى من سنغافورة وبمجرد الاعلان عن المنطقة حصل زي هجوم استثماري من الشركات العملاقة في العالم وخاصة روسيا والصين والهند واسبانيا وأوروبا وبقت الشركات دي تاخد مساحات ضخمة وصلت أحيانا ل7 كيلومتر مربع لإقامة مشروعات على مساحة مدن كاملة وممكن طبعا حضرتك تتخيل حجم المشروعات هيكون عامل ازاي.

ولأن قناة السويس بتقدم خدمات مميزة جدا والشركات بتكسب هي كمان بتراجع سياستها المالية كل شوية وبتشوق الأسواق والاسعار رايحة فين وخاصة أسعار النفط والغاز والنقل البحري ولما بتزيد قناة السويس لازم يكون ليها نصيب من المكسب وعشان كده أعلنت هيئة قناة السويس النهاردة عن زيادة رسوم العبور العادية بنسبة 15% لعدة أنواع من السفن، اعتباراً من 15 يناير 2024.

وقالت الهيئة على موقعها الإلكتروني، إن رفع الرسوم 15% يشمل ناقلات البترول الخام، وناقلات المشتقات البترولية وناقلات الغاز البترولي المسال (LPG)، وناقلات الغاز الطبيعي المسال (LNG)، وناقلات المواد الكيميائية والمواد السائلة الأخرى، وسفن الحاويات، وحاملات السيارات، وسفن الركاب، بالإضافة إلى الوحدات العائمة الخاصة.

وقررت الهيئة زيادة رسوم العبور العادية بنسبة 5% لكل من سفن البضائع الصب الجاف، وسفن البضائع العامة، وسفن الدحرجة، بالإضافة إلى السفن الأخري.

ويتم إعفاء سفن الحاويات القادمة مباشرة من موانئ شمال غرب أوروبا ومتجهة مباشرة إلى موانئ الشرق الأقصى من الزيادة المذكورة.

والقناة بتتوقع زيادة الإيرادات الكلية من حركة الملاحة في قناة السويس إلى 10.3 مليار دولار بنهاية العام الميلادي الجاري ودا بعد ما كانت 4 و5 مليار دولار وفيه خطط لنضاعفو ال10 مليار دولار وعلر فكرة دولار قناة السويس بيختلف قيمته عن دولار أي قطاع تاني ودا لأن قناة السويس مشروع خدمي ومش بتصرف عليه كتير ويادوب مرتبات العاملين وصيانة اجهزة الملاحة بالتالي الدولار بتاعها فيه بركة زي مابيقول المصريين.

وبنحب نفكركم إن  الرئيس عبدالفتاح السيسي  شاف تقرير مفصل عن بيان حركة الملاحة بقناة السويس للعام المالي 2022/2023، اللي ظهر زيادة أعداد السفن المارّة بالقناة بنسبة 17.6%، مقارنة بالعام المالي السابق، لتصل إلى نحو 26 ألف سفينة، وزيادة الإيرادات الكلية للقناة من 7 مليارات دولار في العام المالي السابق، بنسبة 34.7%، لتصل إلى 9.4 مليار دولار في العام المالي المنصرم