لية أسعار الأدوية «مرتفعة» اوي في مصر؟.. هل تتلاعب شركات الأدوية بالأسعار
أسرع معدل زيادة ممكن تشوفها في حياتك..اية سبب ارتفاع الأدوية في مصر بشكل متسارع؟..وهل شركات الأدوية بتتلاعب بالأسعار
أسعار الأدوية في مصر حدث ولا حرج.. الروشتة اللي كنت بتصرفها ب 150 جنيه دلوقتي هاتلاقيها بـ 500 جنيه حرفيًا..
والسؤال اللي بيطرح نفسه.. اية السبب في ارتفاع أسعار الأدوية في مصر بالشكل دا؟
الأزمة دي سببها الأساسي والرئيسي والأول والأهم.. هو تقلب أسعار الصرف في مصر،
لأن أغلب الأدوية اللي موجودة في السوق مستوردة.. دا غير تضرر الإنتاج داخل الدولة بالمسألة دي.. ودا لأن الدواء علشان يتصنع فهو محتاج مواد خام واللي بيتم استيرادها بالدولار.. وكمان مستلزمات الإنتاج بيتم استيرادها.. طيب لما الدولار يكون سعر صرفه 40 جنيه في السوق السودا.. ودا تقريبًا السعر العادل للدولار.. وتيجي أنت تستورد أدوية من الخارج بالدولار.. أكيد لما ينزل السوق هايكون غالي.
ووفق مسؤولين بقطاع الدواء في مصر، ففي ما يقرب من 2000 صنف دوائي ارتفع سعره منذ أواخر السنة اللي فاتت وحتى الآن.
عضو البرلمان المصري، محمود قاسم، أرجع أسباب الزيادة دي لـ نقص المواد الخام اللازمة للإنتاج، لعدم وجود السيولة الدولارية المطلوبة للاستيراد.. وضيف على كدا ارتفاع أسعار الشحن والخامات عالميًا.
ومن العوامل الدافعة دايما لزيادة أسعار الأدوية.. هي مسألة تحرير سعر الصرف.. وصول الجنيه لسعره العادل.. ولو حضراتكم فاكرين.. ففي 2017.. كانت الحكومة قررت زيادة أسعار 3 آلاف صنف دوائي دفعة واحدة، ودا بعد قرار تحرير سعر الجنيه المصري. ومن وقتها شركات الأدوية بتدعوا الحكومة لإعادة تسعير منتجاتها بشكل دوري.
واللي بيحصل علشان أسعار الأدوية تزيد.. هو أن شركات الأدوية بتقدم طلبات لهيئة الدواء وبيتم دراستها في لجنة مختصة، ولو كانت الأصناف دي تستحق زيادة الأسعار فبيتم تحريكها وفقًا لنتائج الدراسة.
بس في تحقيقات صحفية.. كشفت أن في عدد من شركات بتتعمد أنها تتلاعب في أسعار الأدوية.. فمثلًا أدوية الأمراض المزمنة بتكون أقل في نسب الزيادة لأن المريض بيستخدمها باستمرار، أما في حالة الأدوية غير المزمنة، أو المكملات الغذائية اللي ممكن المريض يستغنى عنها فنسبة الزيادة بتكون أكبر شوية لكن برضوا بيتم زيادة أسعارها في حالات إقبال الناس على الشراء.
والسؤال اللي بيطرح نفسه.. هل شركات الأدوية بتراعي البُعد الاجتماعي عند النظر في أسعار الأدوية؛ خاصة أن المواطن بيكون مُجبر على شراء الدواء في كل الأحوال.
