محمد صلاح المفترى عليه.. موو يعطي درس في نكران الذات لـ كدابين الزفة
المسافة بين القول والفعل زي المسافة كده بين الأرض والشمس.. وكل إنسان ربنا خلقه بطبع مختلف وأسلوب حياة خاص بيه عشان كده بتلاقي إنسان كتوم وانسان بيحب الناس تشوف كل حاجة في حياته وفيه الضحوك وفيه المكتئب على طول وفيه العصبي وفيه الهاديء والراسي وعشان كده ماينفعش تقيس تصرفات الناس بمقياس واحد لأن لكل واحد أسلوبه والرك في النهاية على العمل والفعل.
محمد صلاح نجم مصر وليفربول وأوروبا كلها شاب مصري مكافح بدأ رحلته في الكفاح من الصفر وجري ورا حلمه وعافر وقابلته عقبات كانت كفيلة تقضي على كل طموحه وكان آخرها يشتغل مع والده جزار لكن مستسلمش وخد بالاسباب وربنا وفقه وبالتعب والإصرار والعمل بقي محمد صلاح معبود الجماهير في إنجلترا وواحد من أهم نجوم العالم في كرة القدم
محمد صلاح معملش شهرته بس عشان لاعب موهوب لكن جزء كبير منها خاصة في مصر كان بسبب سلوكه وأدبه وقلة كلامه وحبه لعمل الخير ولو عاوز تعرف محمد صلاح عمل إيه واتبرع بأيه هتدخل على جوجل ولما هتدخل مش هتلاقي صورة لصلاح ولا تصريح وهو بيدي اي مساعدة لحد لانه مش يستأجر بالخير اللي بيعمله وروح قريته وشوف صلاح عمل إيه من غير ما يطلع ويتصور ويقول انا عملت ودا طبيعة شخصية صلاح إنه كتوم وهتكتشف إنه كان مع بلده في كل الأزمات وبيدي مرتبات شهرية لأسر كتير وبيدعم المستشفيات بأجهزة بملايين الجنيهات وحتى الفتيات اليتيمات صلاح ليتولى تجهيزهم وتزويجهم.
صلاح محدش يقدر يزايد على وطنيته وبنشوفه في الملعب ازاي بيبكي ويتأثر وبيفرح لما المنتخب بخير أو بيفوز وازاي بيلعب بقلبه لمصر ومحمد صلاح عمره ما اعتذر عن مباراة لمنتخب بلاده حتى المباريات الودية بتلاقيه اول واحد في المعسكر والحقيقة اللي حصل اليومين اللي فاتوا من مزايدة على مواقف صلاح الوطنية بخصوص الوضع في فلسطين كان مبالغ فيه بشكل كبير والراجل استحمل الهجوم والتطاول والغلط فيه ومرديش يطلع يتكلم وكان سهل جدا يطلع يقول أنا اتبرعت للهلال الأحمر المصري لصالح الشعب الفلسطيني وإنه متعاطف ومتأثر وحزين زي اي مواطن عربي لكن فضل السكوت.
لما زادت الحملة على صلاح جت المفاجأة مدوية بإعلان الهلال الأحمر المصري نفسه وأعلن أن صلاح اتبرع بمبلغ كبير جدا لصالح الفلسطينيين وحتى قبل الحملة عليه ودا ليظهر المعدن الاصيل لمحمد صلاح وإنه بتاع فعل ومسارعة في الخيرات وكان قادر يحط علم فلسطين على بروفايله ويسكت لكن هو اختار الحاجة اللي هتنفع وتقوي الفلسطينيين في نضالهم وعشان كده بنقول إن فيه مسافة كبيرة بين القول والفعل.
وتعالو نشوف الهلال الأحمر المصري قال ايه عن صلاح.. المدير التنفيذي للهلال الأحمر المصري، الدكتور رامي الناظر، قال ان محمد صلاح، لاعب منتخب مصر الوطني، ولاعب فريق ليفربول الإنجليزي، تبرع من أجل دعم فلسطين، وكذلك من أجل توفير المساعدات للشعب الفلسطيني في غزة.
وأوضح الدكتور رامي الناظر، المدير التنفيذس للهلال الأحمر المصري، بأن اللاعب محمد صلاح رفض الإفصاح عن قيمة التبرع للدعم وتوفير المساعدات المالية، للشعب الذي يتعرض للقصف بشكل متواصل، خلال الأيام القليلة الماضية، حسب ما تم الإعلان عنه بشكل رسمي.
وأكد المدير التنفيذي للهلال الأحمر المصري، الدكتور رامي الناظر، بأن تبرع محمد صلاح خطوة فعلية على أرض الواقع تساعد في دعم الشعب الفلسطيني في ظل مايحدث في غزة وأن التبرع جاء عن طريق أحد الوسطاء المقربين من اللاعب
