حين انفعل السيسي: مفيش أمريكي هيدخل مصر غير لما المساعدات توصل لاخواتنا في فلسطين
من امبارح وكل وسائل الاعلام في العالم وكل أجهزة المخابرات مش مهتمة بحاجة غير بقرار مصر الجرئ والمحترم بمنع مرور أي أجنبي من معبر رفع الى الأراضي المصرية الا بعد دخول المساعدات الإنسانية لأهلنا في فلسطين لتخفيف وطأة المعاناة اللى بيعيشها أهالي قطاع غزة اللى بيتعرضوا لهجمات وحشية من قوات الاحتلال الإسرائيلي.. وكل عواصم العالم مشغولة وبتدرس القرار المصري وتداعياته على الأوضاع خصوصا ان القاهرة بتملك أوراق ضغط مهمة في الملف الفلسطيني.. فيا ترى ايه اللى بيحصل في الكواليس؟ وازاى مصر هتنجح في ادخال المساعدات الإنسانية لأهالى غزة؟ وايه حجم المعونات اللى بتتقدم من مصر لغزة ؟ وليه مصر طالبت أهالى القطاع بالصمود وعدم مغادرة أراضيهم وبيوتهم ؟ والأهم فين مجلس الأمن من اللى بيحصل للمدنيين العزل من جيش بيستخدم أسلحة محرمة دوليا؟
السلطات المصرية في الساعات الأخيرة رفضت بشكل قاطع السماح بعبور عدد من الأشخاص اللى بيحملوا الجنسية الأمريكية وجنسيات تانية من معبر رفح الى الأراضي المصرية الا بعد الاتفاق على اطار اتفاق أشمل يخفف من وطأة المعاناة الإنسانية في قطاع غزة مع دخول الاعتداءات الاسرائيلية يومها التاسع النهاردة.
و ربطت مصر بين السماح بمرور المواطنين الأمريكين والأجانب إلى أراضيها واتفاق يشمل إدخال المساعدات للفلسطينين خصوصا وان الجانب الإسرائيلي رافض ادخال اى مساعدات في اطار حصاره لأراضي القطاع وسط انباء عن خطة بيجهزها الصهاينة لاجتياح غزة برا وبحرا وجوا.
ووصل عدد من المواطنين اللى بيحملوا الجنسية المريكية لمعبر رفح وظلوا ساعات طويلة يريدون عبور المعبر والدخول الى الأراضيب المصرية لكن أجهزة الأمن المسئولة عن تأمين المعبر أوقفتهم وحصل اتصالات انتهت بربط الموافقة على عبورهم بالسماح للناقلات اللى بتحمل مساعدات غذاء وأدوية وبطاطين لأهالى غزة.
ووفقا لمعلومات حصلت عليها بانكير جرت اتصالات على أعلى مستوى والرئيس السيسي بنفسه هو اللى أصر على القرار ورد بانفعال وقال :" مفيش أمريكي هيدخل مصر غير لما المساعدات توصل لاخواتنا في فلسطين".. والرئيس السيسي بالقرار ده عاوز يلفت أنظار العالم لكم المعاناة الإنسانية الصعبة اللى بيعيشها أهالى فلسطين وازاى فيه تعنت من جانب إسرائيل في ادخال المساعادت اللى مصر جمعتها واللى بتشمل احتياجات أساسية زي الكل والشرب والأدوية.
وقبل قرار منع عبور الأمريكيين من معبر رفع الا بعد دخول المساعدات لأهالى فلسطين حذر الرئيس السيسي، مما يحاك للقضية الفلسطينية لتحيد عن مسارها الساعي لإقرار السلام وفقا للاتفاقيات الدولية الموقعة سواء كانت مبادئ أوسلو أو المبادرة العربية للسلام ومقررات الشرعية الدولية، لتصل إلى تصعيد ينحرف عن المسار ده إلى صراعات صفرية لا منتصر فيها ولا مهزوم تنحرف عن مبادئ القانون الدولي وتخالف الأديان والأخلاق.
وأكد الرئيس على أن مصر من منطلق تاريخي وأخلاقي مش هتسيب الأشقاء في فلسطين، وهتحافظ على مقدراتهم وتأمين حصولهم على حقوقهم الشرعية باعتباره موقف مصر الثابت والراسخ.. و أعرب ، عن استعداد مصر لتسخير كل قدراتها وجهودها للوساطة بالتنسيق مع كل الأطراف الدولية والإقليمية الفاعلة دون قيد أو شرط سعيا للسلام واعتباره خيار مصر الاستراتيجي
السيسي أكد كمان على ضرورة عدم تحمل الأبرياء تبعات الصراع العسكري وقال ان ده بيستوجب تسهيل وصول المساعدات الإنسانية لأبناء الشعب الفلسطيني بشكل عاجل وطالب المجتمع الدولي بتحمل مسؤولياته من أجل السلام.
ووجه الرئيس السيسي رسالة لأهالي غزة وطالبهم بالصمود والبقاء على أرضهم في القطاع، وحذر من خروجهم وقال ان ده ممكن يؤدي إلى تصفية القضية الفلسطينية، وقال ان مصر طول الوقت بتستقبل الضيوف العرب اللى عندهم مشاكل في بلادهم لكن بالنسبة لأهالى قطاع غزة الموضوع مختلف لأن خروجهم من بيوتهم معناه تصفية القضية وأكد ان مصر مش هتسيبهم وهتقف جنيهم عشان تخفف عنهم المعاناة في القصف المكثف والحصار من قبل إسرائيل.
