السيسي غضب.. قرارات عاجلة من مجلس الأمن القومي برئاسة الرئيس
كلنا متابعين اللي بيحصل في الحدود الشمالية لمصر والصراع في غزة والوضع في معبر رفح وكلنا بردو متابعين الضغوط على مصر في المرحلة الحساسة اللي احنا فيها وعي إن كل جيرانا عندهم صراعات والنتيجة عندك حدود ملتهبة من كل النواحي تقريبا.. مصر طول عمرها دولة عفية وتقدر تغير اي معادلة للصراع أو القوة لكن لو كان الصراع مباشر معاها أو بيهدد أمنها القومي مباشره وشفنا ازاي مصر اتحركت في ليبيا والسودان لحماية أمنها القومي.. ايه اللي حصل نهاردة وليه الرئيس السيسي اجتمع بمجلس الأمن القومي وهل الخطر اقترب
طبعاً مفيش ظروف خطيرة زي اللي احنا فيها دي عشان مجلس الأمن القومي يجتمع وفي الأول عاوزين نعرف ايه هو مجلس الأمن القومي للبلاد .. شوف حضرتك دي مجلس بيضم الجهات الأمنية العليا في البلاد والوزارات المعنية ومستشاري الرئيس وبيرأسه الرئيس السيسي نفسه ومش بيجتمع غير لما يكون فيه مصيبة كبيرة بالبلدية كده بتتعرض ليها مصر واجتماعه في حد ذاته بتكون رسالة قوية لكل الأطراف لانه بيصدر عنه قرارات حاسمة بتصب في معالجة الوضع الراهن
ومجلس الأمن القومي اجتمع نهاردة برئاسة رئيس الجمهورية لبحث الأخطار والوضع على حدودنا الشمالية مع غزة ودولة الاحتلال بعد تأزم الموقف هناك والموقف المصري القوي من اللي بيحصل والخناقة على بوابات معبر رفح ورفض مصر عبور اي نازحين أو أجانب قبل مرور المساعدات وفيه معركة سياسية ومفاوضات صعبة بين مصر وامريكا والكيان المحتل لحل مشكلة المساعدات الإنسانية واللي مصر مصرة توصل بسلام للفلسطنيين مقابل السماح بعبور الأجانب حاملين الجنسيات الأمريكية والأوروبية وغيرها.
وفي نهاية الاجتماع أصدر المجلس قرارات مهمة وهي مواصلة الاتصالات مع الشركاء الدوليين والإقليميين من أجل خفض التصعيد ووقف استهداف المدنيين وتكثيف الاتصالات مع المنظمات الدولية الإغاثية والإقليمية من أجل إيصال المساعدات المطلوبة.
وكمان التشديد على أنَّه لا حل للقضية الفلسطينية إلا حل الدولتين، مع رفض واستهجان سياسة التهجير أو محاولات تصفية القضية الفلسطينية على حساب دول الجوار و استعداد مصر للقيام بأي جهد من أجل التهدئة وإطلاق واستئناف عملية حقيقية للسلام.
واهم قرار كان التاكيد على أن أمن مصر القومي خط أحمر ولا تهاون في حمايته وتوجيه مصر الدعوة لاستضافة قمة إقليمية دولية من أجل تناول تطورات ومستقبل القضية الفلسطينية.
اكيد أمن مصر خط أحمر ودي الرسالة اللي وجهها أرفع سلطة في البلد تختص بالشؤون الأمنية والأمن القومي ومصر قادرة على حماية حدودها وأمنها وحماية الأشقاء ودا في وقت بتقاتل فيه على جبهة تانية وهي الجبهة الاقتصادية وبتعالج الخلل بسبب الأزمة الروسية وبتخفض الأسعار ويتوفر الدولار وبتتفاوض مع صندوق النقد وبتوفر احتياطي استراتيجي من السلع وشغالة في ملف التنمية الشاملة وفي ظل معركة عنيفة مع أهل الشر والمحرضين
