الحاجة وعكسها.. سر التضارب بين مسئولي صندوق النقد عن مصر

ايه اللي ناقص مصر عشان تتعافي اقتصاديا بشكل كامل وهل الحكومة مستنية نصايح من بره عشان تعمل اللي فيه المصلحة للبلد وليه دايما في الخارج بتنصب نفسها وصية على الاقتصاد والكلام اللي بيقولوه لازم يتنفذ..

جهاد أزعور، مدير إدارة الشرق الأوسط وآسيا الوسطى في صندوق النقد الدولي طلع وطلب من مصر تسريع الإصلاحات الاقتصادية للمحافظة على الاستقرار الاقتصادي في البلاد، ورجع بردوا واتكلم على موضوع التعويم وطالب الحكومة بتبني سياسة مرونة في سعر صرف الجنيه.

عمنا أزعور  رجع وأكد إن العمل في مصر على الإصلاحات قائم ومن المفيد تسريعها، ومن الضروري يكون هناك عمل للمحافظة على الاستقرار الاقتصادي من خلال تخفيض نسب التضخم، ومعالجة خطر ارتفاع الأسعار، وفتح الاقتصاد المصري للاستثمار، وإعطاء دور أكبر للقطاع الخاص.
ودافع الراجل عن موقف الصندوق في الخلاف الأخير وتأجيل المراجعات وصرف باقي القرض وقال إن برنامج التعاون الحالي بين الصندوق ومصر مستمر وبناء وبيهدف لتحقيق 4 نقاط أساسية أولها حماية الاقتصاد المصري من التقلبات والصدمات الخارجية خاصة أن الحرب في أوكرانيا وتقلبات أسواق المال العالمية كانت لها تأثيرات على البلاد، وتاني حاجة تعزيز النمو من خلال إعطاء دور أكبر للقطاع الخاص.
أما تالت حاجة فهي توسيع شبكة الحماية الاجتماعية، وأخر حاجة في برنامج الصندوق إعادة النظر في حجم القطاع العام اللي ممكن يكون منافساً للقطاع الخاص وقال إن الإصلاحات بدأت  في المحاور دي وفيه تحسن وتقدم.

طيب لما الحكومة المصرية شغالة بشهادة صندوق النقد الدولي نفسيه إيه لازمة الضغوط على مصر وإيه سر التضارب في التصريحات بين مسئولي نفس الصندوق يعني مديرته خذرت من استنزاف الاحتياطي ومن كارثة لو الحكومة اتأخرت في التعويم وبين إن الاقتصاد المصري منطلق وماشي كويس في كل المحاور الاقتصادية وفي ارتفاع متوقع في معدلات النمو.. من الأخر الموضوع ضغط من نوع تاني.. ضغط سياسي مش اقتصادي لوجه الله.