المركزي هزم الصندوق.. وجريمة دولار الدهب في الصاغة.. وضربة النهاية للسوق السوداء

متابعينا الكرام على كل منصات بانكير أهلا وسهلا بكم ولايف جديد على رأس الساعة، وملخص لأهم الأحداث والتحليلات والمعلومات اللي قدمتها وحدة الأبحاث والتقارير في بانكير النهاردة الخميس 12 أكتوبر 2023 لمشاهديه الكرام على كل منصات سوشيال ميديا
 

منصات بانكير النهاردة قدمت عدة تقارير مهمة جدا في الشأن الاقتصاد ومن بينها كان الانقلاب الكبير في تعامل صندوق النقد الدولي ونبرة الاعتذار اللي في تصريحات المسئولين وكلامهم الإيجابي.. ودا بيودينا لسؤال مهم جدا إزاي مصر هزمت صندوق النقد.. وإيه اللي حصل في مراكش..

زي ما احنا عارفين فيه مفاوضات صعبة  من شهور بين الحكومة المصرية وصندوق النقد بخصوص التعويم الكامل اللي عاوزه الصندوق للجنيه المصري ورفض الرئيس السيسي للخطوة لأنها ضد المواطن ومش هيقدر يستوعبها.
وعلى مدار شهور الصندوق مارس ضعوط شديدة على مصر عشان قرار التعويم ولكن مجبتش نتيجة وفي نفس الوقت مصر قدرت تتخلص من ضعوط القرض ووفرت مليارات الدولارات من أماكن تانية والبنك المركزي أعلن عن نتائج ميزان المدفوعات وارتفاع الحصيلة الدولارية ومبقاش القرض في حد ذاته مشكلة وكانت النتيجة نبرة الصندوق وتصريحاته اتغيرت وبقت إيجابية عن تنوع الاقتصاد المصري والنمو المتوقع والإصلاحات الكبيرة وعدم فرض الصندوق لسعر معين للجنيه ودا بيقول حاجة واحدة بس إن مصر انتصرت في معركة الصندوق.
 

وحدة بانكير قدمت النهاردة تقرير مهم جدا عن مستوى جديد في مواجهة الحكومة والجهات المعنية في المواجهة مع السوق السوداء للدولار,, وعن ضربة البنك المركزي الجاية لتجار العملة والمضاربين.
معروف إن السوق السودا للدولار حجمها كبير وبيتعدي الـ40 مليار دولار  وعشان كده البنك المركزي خد إجراءات كتير عشان يجذب المليارات الهاربة للسوق الموازية ونجح في جزء من دا والناس حطت دولارات في الشهادت الجديدة..

لكن الجديد إن البنك المركزي بيدرس عدة أفكار جديدة لمواجهة السوق السودا هتقضي عليها بشكل كبير وهي إلغاء فئات معينة من الدولارت في السوق السودا وبأرقام مسلسلة على العملة ودا كان يحصل زمان وقضى على ظاهرة تهريب العملة المصرية للبنان وهي إلغاء الفئات النقدية اللي المهربين كانوا بهربوها.. والفكرة دي لو تمت يبقي تجار السوق السوداء هيخسروا اللي وراهم واللي قدامهم ومش هينفع أي محاولات تانية لتعويض خسارته.
 

 
منصات بانكير عرضت كمان تقرير تنويري للمصريين وكيفية إدارة الأموال وتنميتها في ظل الظروف الاقتصادية الصعبة اللي بتمر بيها البلد والمواطن وقدمت أكتر من تصور للمواطن عشان  يستثمر فلوسها.
ومن الطرق المضمونة الاستثمار في الدهب والعقارات والأراضي والوحدات التجارية.. وكمان الاستثمار في عمل المشروعات التجارية أو الصناعية أو المهنية ودا النوع اللي بيفضلوا خبراء الاقتصاد في العالم لأنه بجانب حفظ أصل الفلوس إلا إنه كمان بيجيب ربح شهري مضمون نقدر نستخدمه في استثمارات تانية.
وخليكم فاكرين أكبر رجال أعمال في مصر بدأو من الصفر وعمل ثروات كبيرة زي الراحل محمود العربي وساويرس الأب وغيرهم كتير.  
 

أخر تقرير معانا النهاردة على منصات بانكير كان بخصوص حاجة غريبة جدا بتحصل في سوق الدهب وتحديدا بمعادل الدولار في سوق الصاغة واللي متسعر بشكل غريب جدا وبحوالي 45 جنيه للدولار الواحد.. ودا تصرف محدش عارف له أي مبرر.

اللي حصل إن تجار الصاغة بيسعرو الدولار بمزاجهم والاسعار الموجودة في سوق الصاغة دلوقتي غير مبررة ولا تعبر عن الاسعار الحقيقة.. لدرجة إن خبراء المعادن والمحليين بيأكد إن سعر جرام 21 العادل هو 1750 جنيه مش 2325 جنيه بأسعار دولوقتي لكن تجار الصاغة بيسعرو الدولار أعلي من السعر الرسمي بحوالي 14 جنيه.. لأن السعر الرسمي للدولار حالياً 30.95 جنيه وأعلى بكده بشوية في السوق السوداء.. طيب مين هيحاسب تجار الصاغة وفين الرقابة على الأسواق.