إيه اللي بيحصل في سوق الدهب؟ وليه الأسعار رجعت تقفز قفزات جنونية؟

يا ترى ايه اللى بيحصل فى سوق الدهب؟وليه الأسعار رجعت تزيد من تانى بشكل ملحوظ؟ وايه علاقة اللي بيحصل بطوفان الأقصى والأحداث فى غزة ؟ وليه الدهب بيتراجع عالميا وبيزيد فى مصر؟ وسعر دولار الصاغة وصل لكام دلوقتي ؟ وهل تأجيل مراجعة قرض الصندوق هي السبب في عودة جنون الأسعار من جديد؟ وايه سر تزايد الاقبال الكبير على شراء الدهب فى آخر اسبوع؟ وهل تمد الحكومة قرار السماح للمصريين باستقدام دهب من الخارج منعا لوصول الاسعار الى ارقام تاريخية؟
 

أسعار الدهب فى مصر بتشهد ارتفاعات كبيرة ومتتالية فى الكام يوم الأخيرة وسط  تحرك سعر الأونصة عالميا بالإضافة كمان  ارتفاع الطلب على الذهب كملاذ آمن وسط تزايد المخاوف من تصاعد وتيرة الحرب في منطقة الشرق الأوسط مع تطور طوفان الأقصى والضربات الموجعة اللى بتوجهها المقاومة للاسرائيليين. 
وسجل جرام الدهب عيار 21 سعر 2305  جنيه بعدا ماكانت الأسعار مستقرة لفترة طويلة عند مستوى 2180 جنيه بارتفاع أكتر من 120 جنيه فى الجرام الواحد. 
وعموما بتشهد أسواق الدهب المحلية ارتفاع في الطلب خلال الفترة الحالية في ظل تزايد الإقبال على الدهب على المستوى العالمي والمحلي كملاذ آمن خصوصا مع توقعات باستمرار المواجهة بين الفلسطينيين واغلاسرائيليين خلال الفترة المقبلة 
وتوقعات خبراء سوق الدهب بتقول  أن تداعيات الحرب بين حركة حماس وإسرائيل ممكن تزيد من حدة الأزمة الاقتصادية بشكل مباشر أو غير مباشر، وده هيزود ييد حالة عدم اليقين في الأسواق وهينعكس بشكل إيجابي على أسعار الذهب اللى متوقع تزيد بشكل كبير الفترة الجاية مع استمرار الغضب ضد الممارسات الاسرائيلية. 
هل الحرب فى فلسطين هى السبب الوحيد لارتفاع اسعار الدهب؟
لا طبعا فيه اسباب تانية مهمة .. أهمها التقارير اللى بتطلع كل شوية وبتأكد ان فيه تعويم جديد للجنيه خلال الفترة الجاية وان سعر الدولار هيوصل فى البنوك لأكتر من 36 جنيه في ظل استمرار الضغط من الجهات الدولية واعتماد نجاح مراجعة صندوق النقد الدولي على شرط تخفيض قيمة العملة المصرية. 
كمان استمرار معدلات التضخم فى الارتفاع أحد الأسباب اللى بتخلى الناس تقبل على شراء الدهب عشان تحافظ على قيمة فلوسها وتحمي مدخراتها من التآكل وده فى وقت تراجع فيه معدل التضخم الأساسي بشكل طفيف على المستوى السنوي خلال شهر سبتمبر ليسجل 39.7% مقارنة مع قراءة أغسطس بنسبة 40.4% وفقاً لبيانات البنك المركزي المصري.
أما بيانات الجهاز المركزي للتعبئة العامة والإحصاء فكشفت ارتافع معدل التضخم الكلي في مصر بنسبة 38% على مستوى سنوي خلال شهر سبتمبر الماضي وده بعد ما كانت قراءة أغسطس مرتفعة بنسبة 37.4%.
وهل فيه اسباب دولية تانية ليها تاثير على ارتفاع اسعار الدهب فى مصر مؤخرا؟ 
اه فيه تقرير مهم لصندوق النقد الدولي خفض فيه توقعاته للنمو الاقتصاد العالمي خلال عام 2024 إلى 2.9% و ثبت توقعاته للنمو في عام 2023 عند 3% .. وتوقع الصندوق أن تسجل مصر أعلى معدل نمو في المنطقة هذا العام بنسبة 4.3% بارتفاع بنسبة 0.5% عن توقعاته في يوليو الماضي، بينما أشار إلى تباطؤ متوقع للنمو في 2024 بنسبة 3.6%.
وعلى المستوى العالمي عاد الذهب إلى استكمال الارتفاع خلال الجلسات الأخيرة  بعد تذبذب واضح وبيتم ناداوله عند مستوى 1870 دولار للأونصة مقترباً من منطقة المقاومة عند 1875 – 1880 دولار للأونصة، وممكن نشوف اختراق للمنتطقة دي وفقا للى هيصدر من بيانات التضخم الأمريكية.
وأدت الحرب بين فلسطين وإسرائيل إلى الانتقال إلى أصول الملاذ الآمن، وحاليا بيراقب المستثمرين الأحداث في الشرق الأوسط عن قرب لقياس المخاطر الجيوسياسية على الأسواق.
وأهم سؤال حاليا بيحاول المستثمرين الاجابة عليه هل الحرب هتتوسع وتنتقل الى مناطق تانية ولا هيتم السيطرة على الموقف والحاجة الى الملاذات الآمنة هتقل 
طب وبالنسبة لوضع سوق الصاغة فى مصر؟ 
زي ما كلنا عارفين سوق الصاغة فى مصر مش بيخضع لأى معايير واضحة وبيعتمد بشكل أساسي على سعر الدولار فى السوق السودا بالاضافة الى حجم الطلب وكمان السعر العالمي وان كان بدرجة أقل وحاليا سعر الدولار فى الصاغة فوق ال 40 جنيه وعشان كده فيه فرق واضح بين السعر المحلى  والعالمي للدهب 
وهل فيه علاقة بين اللى بيحصل فى سوق الصاغة وتأجيل مراجعة قرض الصندوق؟
فيه طبعا علاقة وثيقة لأن تأجيل المراجعة عمل حاتلة من عدم اليقين وخلا كتير من المستثمرين يروحوا للدهب تحسبا لأى تخفيض قادم فى سعر الدولار .. واحنا عندنا قاعدة ثابتة فى عالم الاقتصاد وهى ان الدولار فى السوق السودا بيتراجع مع اى اخبار ايجابية عن توفير العملة الصعبة وبيرتفع مع اى اخبار سلبية