تطور خطير في ملف قرض الصندوق ومعيط يكشف مفاجأت جديدة
ايه الجديد في ملف قرض صندوق النقد الدولي وهل ممكن يحصل مراجعة لبرنامج الاصلاح الاقتصادي قبل نهاية السنة وإيه مصير شرط التعويم ولو فيه اتفاق هيكون فيه قرار تاني خاص بالجنيه ولا ايه اللي هيحصل.
كلنا عارفين ومتابعين الخلاف بين الحكومة المصرية وصندوق النقد الدولي بخصوص المراجعة وصرف باقي دفعات قرض الـ3 مليار دولار بعد تأجيل كتير للمراجعات وتجميد القرض تقريبا بعد رفض الحكومة لشرط وضغوط الصندوق الدولي لتحرير كامل لسعر الجنيه والكلام دا قاله الرئيس عبد الفتاح السيسي نفسه وعلى الهوا مباشرة وبعدها هاجم سياسات الصندوق بردوا علنا في مؤتمر بفرنسا وإنه بيستغل أزمات الدول عشان يشدد عليها الشروط مع العلم إن العكس نفسه لازم يحصل والصندوق والجهات الدولية المانحة تقوم بتيسير الأجراءات والشروط على الدول اللي بتعاني ولولا إنها بتعاني مش هتاخد قرض.
الانتقادات العنيفة من مصر للصندوق خلت الأخير يراجع موقفه عشان مايخسرش دولة في حجم مصر وبعد مشاكل الصندوق مع دول كتير زي تونس والارجنتين وطلعت تصريحات كتير من مسئولي الصندوق تشيد بالعلاقة مع مصر وتأكد إن برامج الصندوق مستمرة مع مصر وفيه مشاروات على طول بين الطرفين وإنه بيقدم الدعم الفني لمصر ونفى تجميد القرض لكن فضل بردو في سياسة الضغط وتصريحات عبارة عن بالون اختبار لقياس الإرادة المصرية لكن الحكومة أصرت على موقفها.
لما الصندوق اصطد م بالعند المصري سرب إن مفيش مراجعة قبل نهاية 2023 ولما رد فعل المصري كان عنيف وتجاهل الصندوق وبقت الحكومة المصرية تدور على بدايل وحلول تانية لجل مشكلة التمويل الخارجي رجع الصندوق ولمح إن المراجعة ممكن تكون قبل 2023 وفضل الوضع بين الشد والجذب لغاية ما الدكتور محمد معيط وزير المالية ما حسم الجدل وقال النهاردة إن الصندوق هيعلن عن مراجعته قريب جدا وممكن تكون خلال أيام ودا معناه إن فيه اتفاق حصل.
وطالما هتحصل مراجعة مع الصندوق يبقي أكيد ملف التعويم وصل للحسم ورغم إن مفيش معلومات اكيدة لكن مصادر سربت إن احتمال ممكن يكون فيه اتفاق جديد مع صندوق النقد الدولي يشمل ترحيل خطوة التعويم لغاية الحكومة ماتكون استعدت للخطوة دي بتوفير حصيلة دولارية كبيرة.
