ليلة راح فيها النوم من عين الرئيس السيسي.. ايه اللي حصل في غرفة الأزمات وقصر الاتحادية
في ليلة السبت العالم كله انقلب والشرق الأوسط دخل في جحيم مكانش ع البال ولا على الخاطر.. وحصل اللي حصل في الأراضي الفلسطينية ومع الدقائق الأولى كانت مصر تأهبت عشان اللي بيحصل على حدودها وجن التقارير للرئيس السيسي إن الموضوع كبير المرة دي ياريس والسيسي شاف الأحداث مباشرة من غرفة إدارة الأزمات بالمركز الاستراتيجي في العاصمة الإدارية وهو أحدث مركز إدارة الأزمات والمعلومات في العالم.. ايه اللي حصل في الساعات الصعبة والرئيس السيسي فكر في ايه ساعتها.
معروف إن أي دولة معاها حدود مع دول تانية محل صراع فغالبا بتكون في محل تأهب دايم عشان تحمي مصالحها ومصر. كل حدودها تقريبا ملتهبة ودي بيحمل الدولة أعباء رهيبة مادية ولوجستية لأن المشاكل على كل الجبهات ومطلوب من مصر تحمي حدودها مع السودان واللي فيها صراع وعنف وحرب بين الجيش واللي اسمهم قوات الدعم السريع وعلى الحدود الغربية كلنا عارفين اللي بيحصل في ليبيا من عنف ومحاولات تسلل وتهريب بتعرض الأمن القومي المصري للخطر وآخر جبهة اشتعلت كانت في الحدود الشمالية الشرقية مع قطاع غزة بعد أحداث السبت العظيم.
طبعا وطبيعي ومش عايزة اجتهاد إن الرئيس السيسي اتلقى تقارير مفصلة والأحداث دقيقة بدقيقه مع دراسة موقف للحالة قبل اي تحرك وكانت الأولوية طبعا لزيادة تأمين الحدود المصرية الدولية وبعدها محاولة حصار الوضع في الأراضي المحتلة لأن مصر عارفة طبيعة الانتقام الاسرائلي الاعمى خاصة بعد الفضيحة اللي كشفت وهن قوتهم وأسطورة جيشهم المزيف وإن إسرائيل هتحاول تغطي على الفضيحة بمجازر وحشية ودا اللي الرئيس ليحاول يمنعه دلوقتي ومصر عملت عشرات الاتصالات والمباحثات مع دول كتير حولين العالم اولا عشان خاطر الفلسطنيين وثانيا عشان الوضع ماينعكسش بالسلب على مصر باعتبارها دولة جارة وزي ما احنا. عارفين مصر قبل اللي حصل دا كانت بتقود حملة كبيرة لإعادة إعمار غزة والوضع دلوقتي بقي صعب مع اتساع دائرة القصف وتدمير اجزاء من القطاع في ردة الفعل الإسرائيلية الانتقامية.
طيب مصر ممكن تتأثر إزاي بالاحداث طبيعي إن السياحة في سيناء ممكن تتأثر نتيجة قربها الشديد من بؤرة الصراع أو الحرب زي ما سماها رئيس وزراء دولة الكيان دا غير تأثر أسواق المال المصرية نتيجة الأحداث في المنطقة لأن أسواق المال والبورصات حساسة جدا الأمور السياسية السلبية ودا الحكومة بتحاول تتعامل معاه باعتباره أمر واقع.
الرئيس السيسي وحسب تصريحات الخارجية المصرية بيتابع ليل نهار اللي بيحصل على الحدود الشمالية الشرقية لمصر وطبعا أصدر تعليمات للتعامل مع أي مستجدات وشفنا كلنا عشرات من سيارات الإسعاف المصرية اللي تمركزت بالقرب من الحدود لتقديم المساعدة للفلسطنيين بالإضافة لتجهيز المستشفيات ومدها وتزويدها بالاطباء والأدوية وغرف العمليات لأن مصر طبيعي تشيل جزء انساني كبير من اللي بيحصل جمب حدودها المباشرة وكل الجهود دي بيتابعها الرىيس سواء من غرفة العمليات أو من مكتبه بقصر الاتحادية واللي اتحول لخلية نحل لاحتواء الموقف.
