وصل 40 جنيه.. لغز السكر في السوق
لسه فيه لعب في السوق، والسكر خير دليل على إن فيه مضاربين وتجار لسه بيستغلوا الأزمات عشان يكسبو الملايين كل طلعة صبح ومفيش ضمير ولا أجهزة رقابة تلاحق التجار المستغلين.
في الأسابيع الأخيرة قفزت أسعار بعض السلع منها السكر اللي بقي يتباع على حسب المنطقة ودي مهزلة طبعا لأن كده كل تاجر بييع بمزاجه ورغم تدخل الحكومة بإدراجه على منصة البورصة السلعية لكن الأسعار مستقرتش، وتجاوز سعر الكيلو 40 جنيها في بعض المناطق وعلى منصات للتجارة الإلكترونية.
مسئولين ورؤساء شركات السكر برروا اللي بيحصل وقالوا إن الأسعار بتخضع للعرض والطلب وإن الإنتاج السنة دي زي ماهو ومقلش عن السنة اللي فاتت ورغم كده محدش عارف السبب فين ومفيش غير شماعة الدولار اللي زاد والجنيه اللي نزل.. طيب لو الحكاية كده وجت في الدولار مهو الدولار مستقر من فترة كبيرة ومفيهوش أزمة وكمان مصر بتزرع قصب سكر وبنجر يكفي الانتاج اشمعنا دلوقتي سعر السكر ولع والحكومة هتمعل ايه في مبادرة تخفيض أسعار بعض السلع ومنها السكر وهل هتقدر تعمل دا.
لكن فيه خبراء أرجعوا الأزمة لأسبابها الحقيقية وهو جشع التجار وتخزين السكر للتحكم في السعر ودا عمل هجوم على السكر من تجار التجزئة وكله عايز يحلق يخزن ويستفاد من فرق الأسعار وهنا المواطن من حقه يقول الحكومة فين من اللي بيحصل في سوق السكر.
