عجائب صندوق النقد.. كسر الأرقام عشان يخوف الحكومة المصرية

صندوق النقد الدولي في حالة شد وجذب مع الحكومة المصرية من عدة شهور وبيمارس سياسة النفس الطويل تحت الماء عشان يجبر الحكومة المصرية أنها تستسلم وتعوم الجنيه بشكل كامل بعد رفض الرئيس السيسي لاي تعويم في الفترة الصعبة دي وبعدها رفع الصندوق من ضغوطه على مصر بتصريحات كتير كلها هدفها تخويف المصريين وخرج من سياق القرض لسباق التهديد غير المباشر.. صندوق قال ايه على احتياطيات النقد وازاي كسر الأرقام وخالف المنطق عشان يزيد  من هجومه على الحكومة.

طبيعي لما مؤسسة مالية عريقة زي صندوق النقد الدولي تطلع بيانات يبقى تراعي فيها المصداقية والارقام والانجازات في آي بلد قبل ما يطلع اي بيانات خاصة بيها خاصة لو بيانات سلبية، لكن للاسف الصندوق انضم مع بقية البنوك ووكالات التصنيف اللي طلعت بيانات سلبية في نفس الوقت وقالت مديرة الصندوق في اخر تصريحات ليها إن مصر هتفقد احتياطها وتستنزفه لو معومتش الجنيه زي هو ما طالب وطبعا تخويف الناس بضياع الاحتياطي كلام ضد المنطق وصد أرقام البنك المركزي المصري واللي بياناته بتقول إن الاحتياطي النقدي زاد اكتر من مرة بعد الأزمة الروسية الأوكرانية.

ومثلا كشفت بيانات البنك المركزي المصري عن زيادة في صافي الاحتياطيات الدولية بما يبلغ 40 مليون دولار في نهاية سبتمبر اللي فات ووصل إلى 34.97 مليار دولار أمريكي مقابل 34.93 مليار دولار نهاية شهر أغسطس الماضي.

وكان أعلن قبلها ارتفاع صافي الاحتياطيات الأجنبية لدى البنك المركزي المصري، في أغسطس الماضي، مواصلا زياداته منذ أكتوبر 2022، في ظل أزمة شح العملات الأجنبية التي تعاني منها البلاد.

وقال البنك المركزي المصري إن الاحتياطي النقدي ارتفع إلى 34.928 مليار دولار في أغسطس من 34.879 مليار دولار في يوليو، بزيادة 49 مليون دولار..

وفي يونيو اللي قبله أعلن البنك المركزى المصرى، عن ارتفاع الاحتياطى النقدى من العملات الأجنبية  بحوالي 146 مليون دولار، ليبلغ مستوى 34.806 مليار دولار مقابل 34.660 مليار دولار فى مايو السابق له.
يعني الأرقام ياصندوق النقد بتقول إن الاحتياطي النقدي المصري بيزيد وكمان الزيادات جت في ذروة أزمة الدولار حتى لو كانت زيادات محدودة ومع الانفراجة في الأزمة مقارنة بالشهور العصيبة اللي فاتت فمتوقع يزيد بوتيرة أعلى عشان كده مش معروف ليه الصندوق بيخوف الناس من حاجة محصلتش وكمان عكس الأرقام الرسمية للبنك المركزي المصري واللي مش بيطلع ارقام وخلاص ودا بيأكد إن الصندوق بيلجأ لأساليب ملتوية عشن يدفع الحكومة للتعويم بأي شكل.

دا مش كده وبس دا  الحكومة عندعا خطة جديدة لزيادة الحصيلة من الإيرادات الدولارية، وترشيد الانفاق الدولاري، واستحداث موارد جديدة للنقد الأجنبي، وتستهدف زي ما أعلن الدكتور مصطفى مدبولي زيادة حصيلة الإيرادات الدولارية للدولة المصرية بحوالي 70 مليار دولار خلال السنوات الثلاث الجاية، لتصل الإيرادات الاجمالية للدولة المصرية من العملة الصعبة إلى حدود 191 مليار دولار بحلول نهاية المدة.

وبتعتمد الحكومة في الخطة على زيادة كل من الصادرات السلعية بـ 20% في السنة، والسياحة بـ 20%، وتحويلات المصريين بالخارج بنسبة 10%، وزيادة الاستثمارات الأجنبية المباشرة بنحو 10% سنوياً، ومتحصلات قناة السويس بنحو 10% سنوياً، وخدمات التعهيد والخاصة بالاتصالات وتكنولوجيا المعلومات بنسبة 10%، لتصل الإيرادات الدولارية إلى  88 مليارًا صادرات سلعية، و20 مليارا إيرادات سياحة، و45 مليارا تحويلات المصريين بالخارج، و13 مليار دولار استثمار اجنبي مباشر، و17 مليارًا عائدات قناة السويس وقطاع الخدمات البحرية التي تم التوسع فيها، ونحو 9 مليارات دولار من خدمات التعهيد وكل الأرقام دي ممكنة بعد القفزات في معظم الموارد اللي قلنا عليها.. يبقى ايه مصلحة الصندوق أنه يطلع توقعات مضللة لو فتشنا هتعرف السبب وهو نفس السبب اللي خلى موديز تخفض التصنيف الائتماني لمصر وتحطها في درجة الخطر ونفس السبب اللي عشانه مورجان ستانلي أعلن تخوفه من الوضع في مصر.