عصا التعويم وجزرة القرض.. مكر صندوق النقد
بين التهديد والإشادة فضل صندوق النقد الدولي في المنطقة الرمادية في مفاوضاته مع الحكومة المصرية بخصوص برنامج الاصلاح الاقتصادي وقرض الـ3 مليار دولار ن واستغل عامل الزمن والضيقة عشان يفرض تعويم كامل ومدمر للجنيه في ظروف غير مواتية ولما الرئيس اعترض ووقف اي تحرير للجنيه في الفترة الحاليىة عشان مايبقاش حمل على المواطن الصندوق تمادي في الضغط على الحكومة المصرية بتصريحات سمك لبن تمر هندي والصندوق قسم البيانات بتاعته نصين الأول بيحذر فيه من تأخير التعويم والنص التاني بيشيد بالاجراءات اللي نفذتها الحكومة المصرية لمواجهة أزمة الدولار.
في أخر تصريح ليه مديرة الصندوق حذرت من استنزاف الاحتياطي ومن تأخير التعويم وقالت كل يوم تأخير الوضع بيسوء وفي نفس التصريح قالت إن الحكومة انجزت خطوات قوية لحل الأزمة والتدفقات الدولارية.
وقبل كده الصندوق جمد المراجعة الأولى ورجع أكد على العلاقات القوية مع مصر تاني أكبر زبون للصندوق عالميا، ولما المراجعة مجتش وطلع كلام عن وقف التفاوض طلع الصندوق وتراجع وقال هنعمل المراجعتين مع بعض وإن المشاورات مع الحكومة المصرية مثمرة، ورجع تالت وقال إن المراجعة هتكون في الربع الأول من السنة الجاية 2024 قبل مايرجع في كلامه ويلمح إنه ممكن المراجعتين يتموا قبل نهاية السنة دي.
موقف صندوق النقد الغريب بعتمد على الوقت عشان يمرر شروطه لكن اصطدم بإصرار الحكومة على رفض التعويم على الاقل دلوقتي وقبل ما المركزي تكون عنده حصيلة كفاية لمواجهة أي خروج عن السيطرة في الاسواق.. وكمان لما لقي إن الحكومة عندها مساحة مناورة كبيرة وبتعرف تتصرف في الدولار واتحسن الميزان في السوق ومشاكل كتير انتهت بقي يلعب مع مصر لعبة العصا والجزرة وخايف يشد على مصر يفقد أهم زبون عنده.
