الأسعار هترجع زي الأول.. التجار ضميرهم صحي وهيضربوا الأسعار في الأرض
في الأزمات لتظهر معادن الرجال وفي الشدة بيبان مين قلبه على البلد ومين بيوقعها، والطمع ييسوق كتير من التجار في كل الأسواق سواء بقالة او بتوع الخضار والفاكهة أو تجار الدهب والحديد وحتى تجار السجاير عشان يحققوا ملايين الأرباح يوميا والنتيجة الأسعار رفعت وضغطت على جيوب الناس واللي معيشتهم بقت صعبة لأن الزيادات كانت تقضم وسط اي موظف او عامل اجري أو أولياء الأمور والأسر .
الحكومة على مدار شهور عملت اللي عليها ومخلتش سلعة ناقصة في السوق لكن مش هتقدر تعين أمين شرطة على باب كل محل وكل مخزن وكل تاجر والموضوع موضوع ذمة وضمير ورغم إن الحملات الرقابة موقفتش وعملت قضايا كتير وضبطت كميات كبيرة من السلع لكن التجار شافوا إن المكسب مغري واكبر من أي خسارة أو عقوبة أو غرامة.
لكن أخيرا الحكومة خدت خطوة مختلفة وغير متوقعة وقررت تلجأ لكبار التجار واللي مستعدين يساعدوا البلد ومش راضيين عن موجة ارتفاع الأسعار وشايفينه حرام وكله من قوت الفقير والناس فعلا بتعاني وحصل توافق لاول مرة على تبني مبادرة لتخفيض الأسعار في السلع الضرورية للمواطن واللي هتنزل بشكل كبير ومحسوس ويشعر بيه المواطن يعني السلعة مش هتنزل نص جنيه او جنيه لكن هتنزل بشكل كبير
مجلس الوزراء نسق مع البنك المركزي ومع والصناع والتجار على مبادرة لخفض أسعار السلع الأساسية و اتحاد الغرف التجارية قال في بيان إنه مفيش خلاف إن الزيادات في الأسعار كبيرة ومبالغ فيها وحي الوقت اللي لازم الأسعار تنزل بشكل كبير وترجع زي الاول.
والاتحاد عمل اجتماع مهم مع قادة السوق وكبار التجار في السلع الأساسية اللي هتدخل المبادرة واللي مش هتكون مؤقتة أو محدودة بمدة لكن هتكون مستديمة ودي أهمية المبادرة يعني هيكون فيه مراجعة مستمرة لأسعار السلع وضمان أنها مترتفعش زيادة عن اللزوم.
الخبر المفرح إن بعض المنتجين قرروا التنازل عن الأرباح نهائيا خلال فترة المبادرة، مع وعود من القطاع الخاص بتنفيذ المبادرة باستمرار، والبنك المركزي وعد بتوفير الدولار، لأنه المكون الدولاري المهم في السلع بالأسعار الرسمية.
طيب امتى الأسعار هتنزل.. المعلومات الأكيدة اللي طالعة من مجلس الوزراء أنها هتكون بداية من منتصف الأسبوع الجاي وان هيكون فيه اسعار استرشادية التاجر مايقدرش يبيع أعلى منها يعني زي تسعيرة لكن مش إجبارية
السلع اللي أسعارها هتنزل تبع المبادرة هي سلع مهمة وأساسية زي الفول والعدس والألبان والجبن ومنتجاتها والمكرونة وزيت الطعام والسكر والأرز والدكتور مدبولي يعلن عنها بشكل مفصل .. مفيش شك إن الأسعار هي المشكلة رقم واحد عند الشعب ولو نزلت مشاكل كتير هتتحل عنده وهتخلي المواطن يتنفس ويقدر مرتبه أو دخله يكفيه أو يفسض منه ويستثمره في اي حاجة عشان يواجه الظروف الصعبة وكمان نزول الأسعار في المبادرة هيخلي سلع تانية تنزل بشكل تلقائي بعد تخفيض البديل بتاعها وكله مصلحة للمواطن.
