كل أموالها تحت اشراف السيسي.. إيه حكاية الصناديق اللي هتحل مشاكل مصر؟

خلال مشاركته في مؤتمر حكاية وطن أكد الرئيس عبد الفتاح السيسي إن مصر حريصة على انشاء صناديق خاصة يمكن من خلالها تجميع أموال واستثمارها واستخدام عوايدها في العديد من الأنشطة المهمة.. فيا ترى ايه قصة الصناديق دي ؟ وليه الحكومة مصرة على وجودها وفلوسها بتيجي منين وبتروح فين ؟ والايرادات بتاعتها بتتصرف إزاي؟ وليه السيسي مهتم بيها أوي كده ؟ 
 

الرئيس السيسي جاوب بنفسه على بعض الأسئلة الخاصة بالصناديق وقال لازم الناس تعرف ليه احنا مصممين يكون عندنا صناديق لجمع الأموال زي صندوق تحيا مصر وصندوق هيئة قناة السويس واستثمار الأموال والاستفادة من عوائدها وأكد ان موازنة الحكومة ليها حدود ومش بتغطي كل الاحتياجات، وضرب مثل بصندوق تحيا مصر اللى بيقوم بدور كبير جدا فى دعم وتطوير كتير من المشروعات القومية 
السيسي طمن الناس على الفلوس اللى بتدخل الصناديق وأوجه انفاقها وقال ان الفلوس دي بتخضع لرقابة شخصية من رئيس الجمهورية 
طب ايه حكاية الصناديق دي وامتى نشأت فى مصر؟ 
بص يا سيدي .. الصناديق والحسابات الخاصة والوحدات ذات الطابع الخاص دي كيانات بتنشأ خارج الموازنة العامة للدولة بغرض تأدية أغراض معينة بيحددها القانون أو قرار انشائها ، وبتنشأ الكيانات دي إما بقانون، أو بقرار جمهورى، أو بقرار من رئيس مجلس الوزراء، أو قرارات وزارية أو قرارات محافظين.
وظهرت الصناديق الخاصة لأول مرة فى مصر سنة 1967، ويعد صندوق النظافة المنشأ بالقانون رقم 38 لسنة 1967 أول صندوق أنشئ لتحقيق أغراض معينة حددها القانون، وتوالى بعده إنشاء عدد كبير من الصناديق والحسابات الخاصة والوحدات ذات الطابع الخاص
وعلى مدار سنين طويلة  حاولت الحكومات المتعاقبة والمجالس النيابية المُختلفة التصدى لحالة الفوضى اللى ضربت الصناديق دي وأثارت حولها شُبهات كتير  وفتحت باب التكهنات بأرقام أرصدتها وكل المحاولات دي كانت بتنتهى بالفشل لغاية ما جه الرئيس عبدالفتاح السيسي وفتح الملف بجرأة وشجاعة  لحد ما نجحت الدولة فى حصر الصناديق والحسابات وأرصدتها، ووصل عدد الحسابات والصناديق الخاصة  فى آخر احصاء ليها إلى 5095 حساب وصندوق؛ منها 4591 حساب وصندوق بالعملة المحلية، و504 حسابات وصناديق بالعملة الأجنبية.
وأصبحت الصناديق والحسابات الخاصة والوحدات ذات الطابع الخاص خاضعة لرقابة كل من وزارة المالية والجهاز المركزى للمحاسبات، وفى إطار حوكمة الملف وتحقيق الاستفادة للموازنة العامة للدولة من أموال الصناديق والحسابات الخاصة، اتجهت الحكومة إلى إعداد مشروع قانون فى  2017 يقضى ان نسبة من أرصدة الصناديق والحسابات الخاصة تؤول لصالح الموازنة العامة وبسبب القانون ده بلغت حصيلة ايرادات الموازنة من الصناديق  حوالى 4 مليار جنيه.

حد هيسأل ويقول اما ايه حكاية صندوق هيئة قناة السويس؟ 
في يوليو 2022 وافق مجلس الوزراء على مشروع قانون بتعديل بعض أحكام القانون رقم 30 لسنة 1975 الخاص بنظام هيئة قناة السويس، وتمت إضافة عدد من المواد إلى القانون.
ونص مشروع القانون على إنشاء صندوق تحت مسمى صندوق هيئة قناة السويس، تكون ليه شخصية اعتبارية مستقلة، ويكون مقره الرئيسي محافظة الإسماعيلية، ويجوز لمجلس إدارة الصندوق أن ينشئ فروع أو مكاتب داخل جمهورية مصر العربية، ويصدر النظام الأساسي للصندوق بقرار من رئيس الجمهورية، بناء على عرض رئيس هيئة قناة السويس وموافقة مجلس الوزراء، خلال 60  يوم من تاريخ العمل بهذا القانون.
وبيهدف الصندوق إلى المساهمة في التنمية الاقتصادية المستدامة لمرفق هيئة قناة السويس وتطويره من خلال الاستغلال الأمثل لأمواله، وفقا لأفضل المعايير والقواعد الدولية لتعظيم قيمتها ومواجهة  الأزمات والحالات الطارئة اللى بتحدث نتيجة أي ظروف استثنائية أو قوة قاهرة أو سوء في الأحوال الاقتصادية.

ويبُشكل مجلس إدارة صندوق هيئة قناة السويس بقرار من رئيس مجلس الوزراء بناء على عرض رئيس هيئة قناة السويس، ويضم رئيس هيئة قناة السويس أو من ينيبه رئيسا، وعضوية 4 من أعضاء مجلس الإدارة أو المديرين بهيئة قناة السويس يحددهم النظام الأساسي للصندوق، بالاضافة لـ 3 أعضاء من ذوى الخبرة في المجالات الاقتصادية والقانونية والاستثمارية أو غيرها من المجالات ذات الصلة بأغراض الصندوق

يعنى الصندوق ده مش معمول عشان يبيعوا قناة السويس؟ 
بيع بس يا افندم.. محدش يقدر يقرب لقناة السويس لأنها محمية بالدستور والقانون.. ده غير ان الحكومة نفت أكتر من مرة الكلام عن التفريط فى أي حاجة ليها علاقة بالقناة.. والصندوق الغرض الاساسي منه تحقيق عوائد لسد العجز فى الموازنة .. وعشان تكون مطمن اكتر فالصندوق ده بعد الموافقة على تأسيسه من البرلمان هيخضع لرقابة شخصية من الرئيس عبدالفتاح السيسي يعني محدش يقدر يلعب ولا يقرب من جنيه واحد من أموال الصندوق