ايه حكاية الترامادول والـ100 جنيه.. السيسي كشف مخطط الإخوان ومحدش خد باله
ياترى ايه حكايه الترامادول وال100 جنيه اللي هيحرقوا مصر والسيسي كان بيقصد مين وليه جاب المثال دا في كلامه وايه مناسبة الكلام على تخريب البلد ونشر الفوضى.
امبارح الرئيس السيسي اتكلم في فعاليات مؤتمر حكاية وطن عن حاجات كتير خاصة بالمشروعات والبنية التحتية وفجأة خد الحضور لحتة تانية خالص ملهاش علاقه بموضوع النقاش وقال حاجة غريبة جدا أنه مرة قال لمجلس القضاء الأعلى في لقاء معاهم أنه ممكن حد يدمر أو يخرب البلد بمليار جنيه او 30 مليون دولار وضرب مثلا لو انا اديت اي شاب أو مواطن ظروفه صعبة شريط ترامادول و100 أو الف جنيه لكام اسبوع وقلتله انزل اعمل حالة والمقصود بالحالة هنا التخريب والمظاهرات العنيفة ايه النتيجة هيخربوا البلد والناس والحضور فاكرين إن الرئيس السيسي بيتكلم عن المخدرات.
طيب لو الرئيس السيسي مش بيتكلم عن المخدرات يبقى يقصد ايه.. شوف حضرتك رئيس الجمهورية مش هيتكلم في أي موضوع كده وخلاص لانه بيكون واعي هو بيقول ايه خاصه لو الرئيس السيسي لانه دماغه حاضرة على طول ومش بينسي حاجة لكن كان قاصد من كلامه رسالة مهمة جدا للمصريين وهي إن دا ممكن يكون سيناريو الأيام الجاية قبل الانتخابات واللي هينفذ عناصر جماعة الإخوان المحظورة واللي مش عايزة تنسي تارهم عند الشعب المصري كله اللي رفضهم وازاحهم من السلطة.. ليه الإخوان بالذات ممكن بعملوا كده.. عشان حضرتك هما اللي معاهم الفلوس يصرفوا ولأن دا اسلوبهم القديم في شراء الفقراء واللي ظروفهم صعبة واستغلالهم في المظاهرات زي ما حصل ايام أحداث يناير ومظاهر البذخ الكبيرة اللي كانت باينة على عناصرهم والناس اللي راحت معاهم عشان الفلوس.
كلنا شفنا ازاي الجماعة المحظورة والارهابية كانت بتصرف على اعتصامات الإخوان في رابعة والنهضة لمدة أسابيع طويلة اكل وشرب وبوكيت ماني كمان وكانوا بينفقوا انفاق من لا يخشى الفقر.. والحقيقة الرئيس مش هقول كده غير لو عنده معلومات مؤكده أن الإخوان ممكن تعمل كده او بتخطط لدى فعلا وحب بس ينبه المصريين إن فيه ناس ممكن تبيع نفسها وبلدها عشان شريط ترامادول و100 جنيه.
اللي متابع مراحل الأزمة الاقتصادية الأخيرة هيلاقي الإخوان طرف أصيل فيها وعناصرهم اللي نفخة في النار وكانت ولسه بتحرض ضد الدولة وتظهر وتضخم الأزمات على فضائيات الفتنة من تركيا وغيرها وبرامج اليوتيوب وغيرها وكمان نزلوا السوق السوداء للدولار واستغلوا كويس عشان يولعوا الأسعار ومش بس كده دا كمان لموا فلوس المصريين في الخارج لما عرضوا عليهم مبالغ ضخمة في فرق السعر عشان الدولارات ماتتحولش للبنوك والحكومة متلاقيش دولار تستورد بيه وحملاتهم زادت شراستها مع اقتراب موعد الانتخابات الرئاسية ودي فرصتهم عشان يولعوا البلد بعود كبريت ودا عن طريق استغلال الناس اللي قال عليهن الرئيس ودي كانت رسالته اللي الناس لازم تاخد بالها منها كويس جدا.
