اشمعنا هو.. ليه المصريين مش هيفرطوا في السيسي

 
 
ليه مصر عايزة السيسي وسر الشعبية الكبيرة اللي بيحظي بيها رغم الظروف الاقتصادية الأخيرة.. عشان نبقي عارفين فيه حاجتين بيخلو الشعب المصري يتمسك برئيسه.. قوته وكاريزمته.. لأن قوته من قوة الدولة ولأن المصريين اتربوا على حكايات جدودهم الفراعنة العظام اللي كانوا خاضعين كل الملوك في الأرض لسطانهم وجبروتهم واخترعوا الامبراطوريات.

ورغم مئات الملوك في مصر القديمة واللي ليهم انجازات بنت الحضارة الأعظم في الكون إلا إن المصريين فاكرين الملك تحتمس التالت لأنه ملك محارب ولما فكر أمير قادش إنه يحاربه وجمع حوليه 230 أمير وحاكم من حلفائه بجيوشهم هزمهم كلهم 
واحتل قادش وضم 350 مدينة في عهده للامبراطورية المصرية بعد الحرب دي وتحتمس ماتهزمش في ولا معركة طول عمره ولانه قوي المصريين لسه فاكرينه.

حاجة كمان بتخلي المصريين يتمسكوا برئيسهم وهي لما يحسوا إنه بيشتغل بجد عشانهم وشايفين قدام عينيهم التنمية والعمار والمدن الجديدة والحياة الكريمة والبلد اللي بتتغير للأفضل وبتعلى وتكبر بين الأمم وعشان كده المصريين استحملوا أي قرارات أصدرها الرئيس السيسي أو الحكومة وكانت قاسية شوية لكن لأنهم عارفين القرارات دي في صالح البلد كلها ودا لغز المصريين اللي العالم مش فاهمه وسر تمسكهم بالسيسي لأن الشعب المصري قوي وصلب وعنيد وجريء فتلاقيه دايما في ضهر الرئيس السيسي لأنه بيعبر عن قوتهم وكبريائهم وحضارتهم وجرأتهم في اقتحام الصعاب وتحقيق المستحيل على الأرض.

والتجربة ثبتت إن الرئيس السيسي زعيم بقلب أسد مش بيخاف من أي حاجة وثقته في نفسه والمصريين ملهاش حدود وفي عز الخوف والفوضى والنار في الشارع كان عامل الأمان الوحيد عند المصريين وكانوا بيطمنوا لما بيشوفوه في شاشات التلفزيون في سنين العنف الكبيسة وربنا مايرجعها أيام.