مفاجأة نووية وأخبار حلوة.. ايه اللي هيحصل في أكتوبر اللي جاي

ياترى ايه اللي هيحصل في أكتوبر اللي جاي وايه مفاجآت الدولة والرئيس للمصريين وازاي هيكون شهر الانتصارات بداية لانتهاء الأزمات وبداية جديدة في الملف الاقتصادي والاجتماعي وكمان الوطني والهيبة المصرية.

مصر ليها شهور بتكافح الأزمات اللي حصلت بداية من الأزمة الروسية في أوكرانيا واللي حصل بعدها من أوضاع اقتصادية صعبة على الناس كلنا عارفينها وعايشينها لكن منقدرش في الوقت نفسه ننكر الجهود الجبارة اللي بذلتها القيادة السياسية والحكومة عشان تخفف وتسيطر على الاوضاع قبل ما تتفاقم ويبقى الوضع أصعب على الناس، ودا لأن مصر دولة فيها اكتر من 110 مليون مصري وضيف عليهم حوالي 10 مليون ضيوف أو للاجئين في سوق أغلبه استهلاكي للاسف ودولة بتعاني من فاتورة استيراد كانت هتعدي ال100 مليار دولار في السنة ودا غير أقساط الديون واحتياجات الشركات ورجال الأعمال للعملة الصعبة اللي حصلت فيها هزة عنيفة بعد خروح الأموال الساخنة واللي بتقدر بين 22 إلى 24 مليار دولار وعملت فجوة عميقة في سوق الصرف.

كل اللي قلناه دا عارفينه وعايشينه واتكلمنا فيه كتير لكن الجديد هو اللي هيحصل في الكام يوم اللي جايين وتحديدا في شهر أكتوبر واللي خلاص هل علينا ودايما شهر أكتوبر بالنسبه للمصريين هو شهر الانتصارات والتحدي المستحيل اللي نجحت فيه مصر من هزيمة المنطق والمستحيل بالعبور العظيم،. وأول حاجة هتحصل في أكتوبر هي افتتاح مشروعات ضخمة هتغير شكل الواقع على الأرض ومنها مراحل مشروعات الدلتا الجديدة ومصر بتعمل اطول نهر صناعي في العالم وهو معجزة هندسية بكل المقاييس لزراعة اكتر من 2 مليون فدان.

كمان مصر في أكتوبر متوقع تطلق مؤشر الجنيه المصري الجديد واللي هيحدد قيمة الجنيه المصري امام سلة العملات الرئيسية في العالم وهيحدد سعر الجنيه الحقيقي ولأنه مقوم بسعر ظالم دلوقتي وكلما شفنا جولة حسن عبدالله محافظ البنك المركزي المصري الأخيرة للصين والإمارات واتفاقيات تبادل أو مبادلة العملة المصرية مع الصين والإمارات وفيه مفاوضات مع الروس والسعودية والبرازيل والدول دي بنتبادل معها بضائع وتجارة بمليارات الدولارات والصين وحدها ليها حجم تجارة مع مصر ما بين 16و17 مليار دولار في السنة الواحدة، وخطوة مؤشر الجنيه هي أهم خطوة حصلت في قطاع المصارف المصري في 2023 لأنه خد جهد كبير جدا جدا  ولأنه هيرفع الظلم على الجنيه وخلاص هيدخل حيز التنفيذ بعد نجاح جولات المصرفي حسن عبدالله في الخارج لاعتماد مؤشر الجنيه قصاد باقي العملات.

طبعا مؤشر الجنيه هيرفع ويحمي قيمة العملة المصرية وهيخفف كتير من سطوة الدولار الأمريكي عليها  وكمان مش هيسيب مجال للاشاعات تتحكم في مصير العملة المصرية.
من بين الأحداث الوطنية اللي هيحصل في أكتوبر وهتفرح المصريين هي تطور نوعي في مشروع الضبعة للطاقة النووية واللي بيعتبر مستقبل الطاقة والكهرباء في مصر وهيكون فيه حدث تركيب قطع أساسية في أول وحدة روسية بالمفاعل المصري لتوليد الكهرباء وهيكون فيه احتفال كبير في مقر المشروع.