ساعة الحساب مع السيسي.. الرئيس يكشف حكاية وطن

الرئيس عبد الفتاح السيسي كان شاهد ومتحدث رئيسي النهاردة في مؤتمر حكاية وطن، واللي حضره بردوا وزراء الحكومة ورجال الدولة والخبراء والمهتمين، والحكاية مؤتمر كان بمثابة كشف حساب للرئيس السيسي في التسع سنين اللي فاتوا واللي اتحقق من إنجازات في كل المجالات والأرقام ما بتكدبش.. ليه الرئيس أتكلم من غير تحفظات النهاردة وايه الرسالة اللي بتقولها البيانات والمشروعات وحجم المعجزة.

أولا كل المشروعات القومية اللي اتعملت وهي بالآلاف معروفة والناس كلها حست بيها وحست بالبلد اللي تغيرت والدم الجديد اللي جري في شراينها ومحدش يقدر ينكر اللي اتعمل في كل المجالات واللي صار حديث برامج التوك شو العربية والعالمية لدرجة اتقال إن جوجل إيرث  مش بيحلق يسجل المشروعات والطرق الجديدة والكباري والمحاور والمصانع بسبب سرعة الإنشاء.
لكن الأهم النهاردة إن شرح الرئيس وتعقيبه على أدق التفاصيل في التعليقات والأرقام وكلام الوزراء كان رسالة مهمة جدا للمصريين بتقول دا اللي تم ولسه قدامنا خطاوي كتيرة لسه هنمشيها وكأن الرئيس بيقول دا اللي عملته في الكام سنة اللي عدوا ولسه عندنا كتير، رسالة من الرئيس إن وقته وجهده وصحته كانت كلها لمشروعات مصر من الإسكندرية لأسوان وظاهرة في المشروعات العملاقة في كل شبر في مصر وإنه عمره مابخل على المصريين ولا اتعامل إنه رئيس يقعد في قصره ويستمتع بالرفاهية بالعكس بدأها من وسط العشوائيات واللي حولها لكمباوندات حديثة فيها كل الخدمات وكان مستاء جدا من سكن وعيشة المصريين في العشوائيات وكان المشروع القومي لإزالة وبناء العشوائيات ومن كتر التغيير اللي جصل في الملف المستعصي على كل حكومات مصر من الخمسينات اتقال إن لو السيسي معملش غير ملف تطوير العشوائيات لكفاه إنجازات.

كل مشروع عمله الرئيس السيسي ينفع نقول عليه لو عمل دا بس كفياه.. زي ما حصل في الكهرباء وحياة كريمة والزراعة والطرق والمحاور والعشوائيات والصناعة والتأمين الصحي الشامل والإسكان والشقق الجديدة والمجتمعات العمرانية الحديثة والمدن الذكية.
والله السيسي لو عمل العلمين الجديدة لكان كفاية بردو.. دا كلام الناس اللي راحت العلمين بعد ما بقت معجزة حوض المتوسط السياحية، فمابالك بالجلالة والسخنة الجديدة والغردقة الجديدة والتجلي الأعظم ورحلة العائلة المقدسة والقاهرة الفاطمية، وأضرحة أل البيت وغيرها وغيرها من أيقونات تعمير وتحديث مصر واللي نقلها نقلة تقول السيسي دا لازم يتعمله ألف تمثال.

مش هنتكلم عن العاصمة الجديدة ولا عن الضبعة النووية ولا عن الصوامع ولا عن الطاقة الشمسية وأعظم نهر صناعي بيتعمل في قلب الصحراء عشان يروي 2 مليون فدان، ولا هنتكلم على 10 تريليون جنيه اتصرفت في مراحل وخطط التطوير والبناء.. الأرقام هي اللي هتتكلم وتقول السيسي عمل إيه وخاصة إننا داخلين على انتخابات رئاسية مجتاجة وقفة عشان البلد دي تكمل مع زعيم عرفت على إيده الكيانات الكبرى وفي 2030 هتكون من بين أقوى اقتصاديات المنطقة والعالم.