تفاصيل الصراع المكتوم بين مصر والسعودية لتغيير خريطة الشرق الأوسط

ياترى فيه منافسة حقيقية بين مصر والسعودية على خريطة الشرق الأوسط ، ولا اللي بيحصل صدفة، وإزاي القاهرة والرياض هيغيرو الواقع على الأرض وإيه حكاية تريليونات الريالات اللي هتحول السعودية لفرنسا الشرق وحكاية مشروعات مصرية هتسحب البساط من أوروبا

المنافسة في أي حاجة شيء مشروع وليها إيجابيات كتيرة وبطلع أفضل حاجة عند المنافسين، وطبيعي يبقي فيه منافسة وصراع على المصلحة بين الأصدقاء والأشقاء، وجايز يبان إن فيه حالة منافسة بين مصر والسعودية على قيادة المنطقة اقتصاديا تحديدا  ودا لأن الاقتصاد هو الوجه الأخر للسياسة والعالم دلوقتي بتحكمه الاستثمارات مش الحكومات، والفلوس هي اللي بتتكلم ومفيش وقت الدول تضيعه على الكلام والحروب والصراعات السياسية المستقبل كله اقتصاد.

بالنسبة للحالة السعودية فكلنا شايفين نهضة حقيقية بيقودها محمد بن سلمان ولي العهد في كل المجالات، زي المشروعات السياحية الطموحة والطاقة النظيفة بعيدا عن البترول وتوطين صناعة السيارات الكهربائية بشكل ضخم ونيوم وأخرها الممر التجاري الجديد مع الهند وأوربا واللي الرياض متحمسة ليه بشكل كبير، وغيرها من المشروعات اللي هتقفز بالاقتصاد السعودي المدعوم بمليارت الدولارات وبحار بترول، وطبعا أي تقدم في السعودية بيفرح كل المصريين لأن قوة أي بلد عربي هي قوة للامة كلها ولمصر تحديدا لأن العرب في الأخر ضهر لبعض.
في المقابل هنلاقي مصر شغالة من فترة على مشروعات مشابهة للمشرعات في السعودية وكلها في البلدينم ليها بعد إقليمي ودولي ودا اللي خلى الناس تقارن وتقول إن فيه منافسه أو صراع مكتوم بين القاهرة والرياض زي مثلا إن مصر عندها خطة طموحة لزيادة عدد السياح في المواسم الجاية ومنها إنشاء 500 ألف غرفة فندقية سنوية، والنهاردة مسئول سعودي طلع وقال على خطة سعودية للنهوض بقطاع السياحة لزيادة التدفقات وإنه هيبنوا 500 ألف وحدة جديدة، كمان خط الهند الجديد اللي كشف عنه بن سلمان جي في وقت مصر قربت تنتهي فيه سلسلة من الخطوط التجارية الضخمة في سيناء وهترتبط مع دول عربية زي الأردن والعراق وتشمل خطوط سكة حديد ومواني ومنها لأوروبا ودي صدفة غريبة بردوا.
وموضوع توطين صناعة الهيدروجين الأخضر واللي مصر قطعت فيه شوط كبير جدا بعد مؤتمر المناخ بشرم الشيخ وجذبت ملياارات الدولارات لشركات هندية وصينية النهاردة السعودية بتعلن عن مشروعات طاقة نظيفة وانها هتكون مركز لتصنيعها ، جايز كل اللي عدى يكون صدفة وكل حكومة من حقها تعمل مشروعات وتنمية بالطريقة اللي تشوفها لكن التكامل العربي مهم جدا في الفترة الجاية لأن دا هو اللي هيغير خريطة الشرق الأوسط وهيخلي العقد اللي جاي عقد العرب.