سر زيارة رئيس المركزي المصري للصين..ضربة الموسم للدولار

العلاقات بين مصر والصين ليها خصوصية شديدة جدا بين البلدين واللي بتربط حاجة مشتركة هي قليلة بين اي دولتين أنهم أصحاب حضارة عريقة علمت الإنسانية لكن فيه سبب تاني بيخلي العلاقات بين الطرفين مختلفة ومميزة ومستحيل تتأثر وهي إن مصر كانت أول دولة عربية وإفريقية تعترف بجمهورية الصين الشعبية، وتقيم علاقات دبلوماسية معاها سنة  1956، ودا بعد مرور شهور قليلة على الاجتماع التاريخي اللي جمع وقتها، الزعيم الراحل جمال عبد الناصر برئيس وزراء الصين شو آن لاي في باندونج.

والحقيقة قرار إن مصر تعترف بالصين في وقت صعب جدا بالنسبة لمصير الدولة الصينية الحكومات الصينية لغاية دلوقتى شيلاه جميلة لمصر ومش قادرة تنسى وقفة القاهرة معاها في أصعب فتراتها ومن هنا انطلقت العلاقات المميزة بين البلدين واللي بتصب في صالح الشعبين وكان آخرها الموافقة على كحزل مصر لتحالف بريكس واللي الصين بمثابة القائد فيه والفوائد اللي هتجنيخا مصر منه واللي يعتبر طوق نجاة لمصر من أزمة الدولار والانطلاق لمرحلة جديدة وقفزات للمستقبل من خلال التحالف الأقوى في العالم.

الصين كمان بتعتبر من أهم الشركاء التجاريين لمصر على مستوى العالم  وحجم التبادل التجاري بين البلدين، وصل في 2022 لحوالي 16 مليار دولار ولسه هيضاعف في الفترة الجاية وبعد البريكس وبعد تطور البنية التحتية للاقتصاد في مصر وتدفق الاستثمارات الصنيية في مصر وخاصة في منطقة اقتصادية قناة السويس واللي وصلت 5 مليار دولار في المنطقة دا غير 1.6 مليار دولار استثمارات مباشرة.

وفي الساعات الأخيرة التعاون المصري الصيني خد شكل تاني خالص والمرة دي تعاون مالي واقتصادي وفي العملات كفيل ينهي هيمنة الدولار على السوق المصري.. ودا بعد زيارة  حسن عبد الله محافظ البنك المركزي المصري، للصين ولقاءه نظيره الصيني بان قونغ شنغ، والحقيقة محافظ البنك المركزي المصري استقبلوه استقبال خاص وبحفاوة كبيرة في الصين  لدرجة إن حافظ البنك الشعبي الصيني  اختص المصرفي المخضرم  حسن عبد الله لإلقاء كلمة أمام الحاضرين وهما من كبار ممثلي المؤسسات الدولية ومنها صندوق النقد الدولي والبنك الدولي وبعض البنوك المركزية الأخرى والذي أكد خلالها السيد عبد الله على عمق واستراتيجية العلاقات الثنائية بين البلدين.
وكمان عبد الله تلقى دعوة خاصة من الجانب الصيني لحضور الاحتفال باليوم الوطني الصيني واحتفالات منتصف الخريف، والحقيقة الزيارة هتحسم ملفات كتير بين مصر والصين وأهمها التعاون المالي والتنسيق داخل بريكس واستخدام عملات غير الدولار في التعاملات التجارية والسندات المصرية الجديدة اللي هتطرحها مصر باليوان الصيني وكلها خطوات لاقت دعم كبير من الجانب الصيني.