إيه حكاية فضيحة الدهب في كفر الشيخ.. والنص مليار اللي طارت في غمضة عين

ليه الدنيا مقلوبة في محافظة كفر الشيخ وايه حكاية الدهب اللى راخ ومرجعش وايه حكايه النص مليار جنيه اللي اختفت في دقايق وتفاصيل أكبر عملية نصب في سوق الدهب وليه المصريين بيصدقوا اي حد يضحك عليهم
 
في الأزمات الاقتصادية زي ما بيطلع مضاربين وتجار أزمات وعملة وسلع ومحتكرين بيظهر كمان نوع تاني من الناس وهنا النصابين واللي بييبيعوا الوهم للناس وبيلعبوا على غريزة الطمع عشان يستولوا على فلوس ومدخرات مواطنين وتحويشة عمرهم وهي ظاهرة المستريح واللي انتشرت في عدد كبير من المحافظات وهي باختصار شخص عنده ملكة في الكلام والاقناع يقدر يقنعك تديله فلوسك كلها وفلوس جيرانك وصحابك وتقوله شغلهالي مقابل فائدة عالية جداً أكبر طبعا من فائدة البنوك والنتيجة تصرف الفوائد شهر أو شهرين ولا تلاتة بالكتير لغاية المستريح ما يلم فلوس البلد كلها وبعدها فص ملح وداب ويهرب وراحت فلوسك ياصابر.

الغريب في قصة المستريحين عامة إن الناس مش بتتعظ ولا تاخد بالها رغم إن عمليات هروب المستريحين معروفة والقبض عليهم والتحقيقات وبردوا الناس بتروح تودي فلوسها لاي مستريح جديد يظهر في الحي ولا القرية ولا النجع ولا كأن فيه حاجة حصلت بتحذره يحط فلوسه، والحقيقة دي حاجة نفسية غالبا لأن انت عارف أنه احتمال كبير يطلع نصاب وبردوا بتديه تحويشة عمرك ولما يسرقك تقول أنا كنت حاسس إنه نصاب والحقيقة دا منطق غريب جدا.

ليه بنتكلم على المستريحين تاني نهاردة.. عشان الحقيقة اللي حصل في محافظة كفر الشيخ.. الحكاية بتقول إن واحد كالعادة مستريح جديد اقنع الناس أنه شغال في الدهب والمضاربة على السعر واللي عاوز يشغل فلوسه معاه هو مستعد يشغلها مقابل فوائد شهرية من 5الى 7 في الشهر وطبعا كالعادة الناس باعت اللي وراها واللي قدامها ورمت الفلوس في حجر المستريح وكالعادة شهر والتاني والراجل اختفى ومحدش عارفله طريق وزي كل مرة بردو الناس طلعت تجري على مركز الشرطة ويبلغوا رغم أن محدش سرق منهم حاجة والمستريح اللي هرب مش عليه اس مسؤولية لانه ما اجبرش حد يديله فلوسه ولو حتى اتقبض عليه هيعترف إن الناس اديته فلوس واشتغلت وخسرت والتجارة مكسب وخسارة ومش هيتحبس يوم لأن موقفه سليم.

تحقيقات مستريح كفر الشيخ كشفت عن مفاجأة صادمة للاسف وهي إن حجم المبالغ اللي استولى عليها المستريح من الناس عدت ال500 مليون جنيه يعني نص مليار جنيه وحسب التحقيقات المبلغ اكبر من كده بكتير  وممكن يعدي المليار جنيه لان فيه ناس كتير خافت من الفضيحة أو يتقال إنه اضحك عليهم وغير إن فيه ناس ودت فلوس في السر من ورا اهلها ومقدرتش تقول لما المصيبة وقعت.