مين المسئول عن ارتفاع أسعار البصل والسكر ؟ المسكوت عنه في أخطر أزمة تواجه المصريين؟

مين كان يصدق ان كيلو البصل يعدي ال 30 جنيه ؟ ومين كان يتوقع ان سعر كيلو السكر يوصل ل 40 جنيه وفيه كلام كمان انه هيزيد الأيام الجاية؟ وليه الطماطم الى اتشهرت طول عمرها بانها مجنونة عشان سعر بيطلع السما وينزل الأرض تانى أسعارها بقت ترفع وما تنزلش تانى؟ وازاى الحكومة واقفة تتفرج والسلع الأساسية في حياة المصريية كل شوية سعرها بيزيد؟ وهل فيه أسباب حقيقية للزيادات اللى بتحصل دي ولا ده جشع من التجار؟ 
 
فيه حاجة غربة جدا بتحصل في أسعار السلع في مصر في الفترة الأخيرة وفيه سلع سعرها بقا بيزيد بشكل مش معقول رغم اننا لا بنستورها من بره بالدولار ولا بيتدفع عليها جمارك والأغرب ان فيه سلع منها بنصدرها للخارج فيا ترى ايه اللى بيحصل بالظبط ومين المسئول عن ارتفاع أسعار سلع مهمة وحيوية زي البصل والطماطم وكمان السكر وغيرهم سلع تانية كتير. 
في اللحظة اللى بنكلم حضراتكم فيها دلوقتى سعر كيلو البصل بيتباع فوق ال 30 جنيه والطماطم فوق العشرين جنيه أما السعر فوصل في بعض المناطق ل 40 جنيه احنا هنا بنتكلم عن 3 سلع استراتيجية واساسية في حياة المصريين وكل الأسر بتستخدمهم بشكل يومي وما تقدرش تستغني عنهم .. واحنا هنا بنتكلم عن زيادات في الأسعار تراوحت ما بين 30 و70% لسلع معظمها لا هو مستورد ولا عندنا فيه نقص 
وخلونا نتكلم عن اللى بيحصل في كل سلعة لوحدها والبداية بأزمة السكر اللى انلعت من فترة طويلة ولسه مستمرة والأزمة بدأت بشكاوى من المواطنين في مناطق مختلفة من قلة الكميات المعروضة من السكر ومن اتجاه البائعين سواء في السوبر ماركت الصغيرة أو الهيبرات ومراكز التسوق لرفع السعار بشكل مبالغ فيه ومن بعدها بدأت فعلا الكميات المطروحة تقل بشكل واضح ومعاها السعر كان بيزيد كل يوم لغاية ما وصلنا ل 40 جنيه لسعر الكيلو في بعض المناطق .. يعنى محاولات تعطيش السوق نجحت وحيتان السكر قدروا يعملوا اللى هما عاوزينوا 
طب فين الحكومة ؟ 
الحكومة وعلى لسان وزير التموين بتنكر ان فيه أزمة أساسا في الأرز، وأعلن الدكتور على المصيلحى، وزير التموين والتجارة الداخلية أن احتياطى مصر من السكر التموينى يكفى حتى بعد إبريل 2024، فيما يكفى السكر الحر حتى الأسبوع الأول من مارس المقبل
مصيلحي كشف إن حجم إنتاج مصر من السكر 2.8 مليون طن، فيما يبلغ حجم الاستهلاك نحو 3.1 مليون طن، ويتم سد الفجوة من خلال استيراد ما يتراوح بين 300 و400 ألف طن، وقال أن دخول إنتاج إحدى شركات السكر خلال الموسم المقبل بنحو 600 ألف طن هيعمل على سد الفجوة، وبيتم حاليًا استيراد ما يقرب من 300 ألف طن سكر، تحسبًا لتأخر موسم البنجر زي ما حصل السنة اللى فاتت 
ده بالنسبة للسكر طب والبصل؟ 
بص يا سيدي .. مصر بتحتل المركز من الرابع إلى الخامس ضمن أكثر 10 دول منتجة ومصدرة للبصل بسبب تفوق الأصناف المصرية وطبيعة مناخها، وبيتم تصدير البصل المصري إلى أكثر من 50 دولة أجنبية وعربية.. والمساحة المزروعة بالبصل في مصر للموسم 2022/2023 بلغت حوالي 219 ألف فدان، وبلغت جملة الإنتاج لهذا العام 3.3 مليون طن".
طب لما فيه فائض وفيه كميات كبيرة بنزرعها امال ايه سبب الأزمة؟ 
فيه سببين واضحين الأول ان المزارعين السنة دي خفضوا المساحة المنزرعة نتيجة تدني سعر البصل الموسم اللى فات  ووصل سعر الطن وقتها إلى 800 جنيه وكمان بسبب التغيرات المناخية اللى تأثرت بيها مصر وموجة الحر اللى أتلفت جزء كبير من المحاصيل .. السبب التانى احتكار وتخزين جزء كبير من الإنتاج من قبل التجار وده أدى الى تعطيش السوق وارتفاع الأسعار بالشكل اللى مش طبيعي اللى كلنا شايفينه 
وعشان كده الحكومة خدت قرار مهم هيتم تطبيقه بداية من 1 أكتوبر بوقف تصدير البصل ومتوقع مع تنفيذ القرار انخفاذ أسعار البصل لأن المعروض هيزيد 
طب وايه حكاية أزمة الطماطم ؟
الطماطم من السلع الغذائية اللى معروف عنها عدم ثبات سعرها لكن السنة دي الموضوع مختلف شوية لن الأسعار زادت وما نزلتش تانى وده ليه أسباب منها انخفاض انتاج مصر من الطماطم بسبب الظروف المناخية الصعبة والموجة الحارة ومع انخفاض المعروض وزيادة الطلب على الطماطم لكثرة استهلاكنا منها في السلاطات والصلصات والمشروبات مع ارتفاع حرارة الجو أسعارها ارتفعت ووصلت لأرقام كبيرة 
لكن متوقع خلال الأيام الجاية تحصل انفرجة كبيرة في المعروض تحديدا خلال شهر أكتوبر ومعها هتبدا الأسعار ترجع لمستواها الطبيعي قبل الأزمة