ماذا يريد محمد بن سلمان؟ وهل يسعى لنزع الريادة من مصر؟.. مفاجأة السعودية للعالم

 
هو الأمير محمد بن سلمان عاوز ايه؟ وهل فعلا بيخطط لنزع الريادة من مصر؟ وهل السعودية مؤهلة لتكون قصة القرن الواحد والعشرين؟ وايه المميزات اللى بتمتلكها الممكة عشان تكون رقم واحد في الشرق الأوسط؟ وليه ولي العهد السعودي بيصرف مليارات الدولارات على كرة القدم وعلى الحفلات الغنائية والعروض المسرحية؟ والسعودية هتعمل ايه في زمن ما بعد النفط؟ وهل القوى العالمية هتسمح للملكة تنفذ اللى هي بتخططلوا؟ 
 
في حوار أجراه الأمير محمد بن سلمان ولي عهد السعودية خلال الأيام اللى فاتت مع شبكة "فوكس نيوز" قال تصريح مهم جدا عن مستقبل السعودية وأكد ان الممكلة هتمون أهم قصة نجاح خلال القرن الواحد والعشرين وقال ان بلاده هي الأسرع نموا ما بين كل دول العالم، وبسبب اللى بيحصل في السعودية في السنين الأخيرة بيربط البعض بين ده وبين محاولات الأمير محمد بن سلمان لسحب البساط من مصر وانتزاع الريادة في المنطقة لصالح المملكة.. بل ان فيه ناس بتزايد وتقول خلاص مصر راحت عليها والأيام الجاية بتاعت السعودية .. فهل الكلام ده صحيح ؟ وهل فعلا ولي العهد السعودي حاطط مصر في دماغه؟ 
مفيش شك ان السعودية بتغير جلدها وان الأمير محمد بن سلمان بيقود ثورة تصحيح وتطوير هتغير وجه المملكة خلال السنين الجاية، وبيستغل كل الإمكانيات المادية عشان يحول السعودية من دولة كانت بعيدة عن مسرح الأحداث لدولة قوية وفاعلة ومؤثرة في صناعة الحدث. 
ومن أول يوم تولى فيه بن سلمان ولاية العهد قبل حوالى 6 سنين من دلوقتي وهو بيشرف على خطة طموحة لمستقبل السعودية وبيسعى لتطبيق إصلاحات اقتصادية واجتماعية في المملكة.. وهو صاحب "رؤية 2030" الطموحة اللي بتهدف لتنويع الاقتصاد عبر التقليل من الاعتماد على النفط وجذب استثمارات في قطاعات تانية من بينها الترفيه.
ويعتبر ولي العهد السعودي الأمير محمد بن سلمان صانع نهضة المملكة العربية السعودية الحديثة وعنده رؤية واضحة حددها من أول يوم ليه في ولاية عهد عرش المملكة وهي أن يصنع المجد لبلاده على الدوام وبفض أفكاره ومشروعاته الطموحة أصبحت السعودية في مكانة متقدمة جدا بين دول العالم في مجالات التميز والإبداع والابتكار وعشان كده بيتم وصفه دايما بـالملهم قائد التغيير".
والأمير محمد بن سلمان، أصغر ولي عهد في تاريخ المملكة العربية السعودية، ونائب رئيس مجلس الوزراء إضافة لكونه وزير الدفاع وبتيرأس مجلس الشؤون السياسية والأمنية، وكمان مجلس الشؤون الاقتصادية والتنمية السعودي.
وهدف خطة رؤية السعودية 2030 اللى بيتبناها ولى العهد السعودي انها تخلى الاقتصاد السعودي يعتمد بشكل أساسي ورئيس على الاستثمار المباشر  بالإضافة إلى عدم اعتماد المملكة على النفط كدخل أساسي ووحيد، ووعد بن سلمان بإنهاء علاقة ارتهان الدولة السعودية بالنفط واللي وصفها بـ«الإدمان».
طبعا اللى بيعملوا ولى العهد السعودي أمر مشروع خصوصا لقائد شاب بيحلم لبلاده بالأفضل وبيحاول يحقق نهضة اقتصادية واجتماعية لبلاده اللي عانت من سنوات من تسلط رجال الدين ومن محاولات انغلاق على الذات.. بس لازم تكون عارف ان اللى بيعملوا بن سلمان لا يتعارض مع مصر ولا بيحاول يسحب من رصيدها زي ما البعض بيحاول الوقيعة بين أهم وأكبر دولتين في المنطقة بدليل ان العلاقات بين مصر والسعودية بتعيش أزهى عصوها في عهد الملك سلمان بن عبدالعزيز والعلاقات بين الرئيس السيسي وولى العهد السعودي بيسودها الود والمحبة والاحترام المتبادل وشفنا ده في زيارات السيسي الكتيرة للممكلة وفى زيارات بن سلمان لمصر.

وزي ما محمد بن سلمان بيشتغل لبلده وبيحلم ليها بالأفضل فمصر بتخطو خطوات مهمة نحو المستقبل وبتأكد ريادتها وقدرتها على اصطياد الفرص، والرئيس السيسي بيشرف بنفسه على الجمهوري الجديدة من خلال مشروعات عملاقة هتغير شكل الحياة في مصر خلال ال 50 سنة الجاية.
وفيه تكامل وتعاون كبير بيحصل بين القاهرة والرياض في اطار العلاقات التاريخية بين البلدين والممتدة على مدار عشرات السنين.

وهل السعودية مؤهلة لتكون قصة القرن الواحد والعشرين؟
خلال السنين الأخيرة بذلت المملكة العربية السعودية الكثير من الجهود لتنويع اقتصادها بعيد عن النفط وفي ظل رؤية التحديث الاقتصادي والاجتماعي بدأت فيها الاستثمارات الضخمة في مشاريع عملاقة في مجال السياحة والرياضة والبنية التحتية والإسكان
وحاليا السعودية بتخطط انها تكون اكبر قوة ووجهة سياحية في المنطقة والوصول الى 100 مليون سائح في سنة 2030 والمؤشرات الاولية لمنظمة السياحة العالمية بتشير الى ان العدد المتوقع من السواح اللى هيزورا السعودية في عام 2025، هيصل الى 22 مليون وده أكبر من الرقم اللى بتحققه دبي حاليا وبيرجع ده للاستثمارات الضخمة اللى وصلت الى 810 مليار  دولار بتستثمر حاليا في مشاريع الترفيه والسياحة والبنية التحتية والاسكان وغيرهم.

يا عم مستقبل ايه بس ده بيرمي مليارات الدولارات على الأرض ومضيع فلوس السودية على بتوع الكرة وحفلات المطربين؟ 
للأسف ده كلام الناس اللى مش فاهمة اوعا تتخيل ان فيه ريال او دولار السعودية بتصرفه وهي مش عارفة انه هيرجعلها 10 و20 ضعف كمان، ونجوم الكرة العالميين دول بيعملوا دعاية بمليارات للمملكة ولصورتها في العالم كله والأمير محمد بن سلمان عارف كويس جدا قيمة القوى الناعمة واهمية الرياضة والفن في الانتشار والترويج للمشروعات العملاقة اللى بينفذها