زنقة مدبولي..الصندوق بيضغط ووكالات التصنيف مستنية غلطة
ياترى مصر هتعمل إيه في ملفات الحسم والمصير اللي في انتظار قرار، وياترى الحكومة هتراضي صندوق النقد إزاي عشان تتقي شر وكالات التصنيف الدولية، ومستقبل الجنيه ومعاد التعويم وليه بنقول قرب.
الاقتصاد مشكلته إنه كله معادلات وارقام مرتنبطة ببعض ولازم تربطها عشان توصل لنتيجة صح وماينفعش فيه العند أو المشي عكس الاتجاه لأن كلها معادلات قايمة ومعتمدة على بعضها، زي لو فيه تضخم يبقي لازم ترفع الفايدة، ولو رفعت الفايدة أكتر من اللازم هيوصلك للركود، وزي لو الدولار رفع الدهب طبيعي ينزل، وزي قوانين العرض والطلب في السلع والعملات ليه بنقول العملات.. لأن حضرتك العملات زي السلع بالظبط ليها أسواق مالية وأسعار بتنزل وتطلع حسب الطلب ودا سبب أزمة الدولار والجنيه دلوقتي وارتفاع سعر العملة الامريكية بسبب قلة المعروض وعدم قدرة الجنيه على المناورة أمام الدولار لأنه متكتف ومش متحرر بشكل كامل في سوق العملات.
صندوق النقد الدولي شايف إن حماية الجنيه هي أكبر غلط في برنامج الاصلاح الاقتصادي المصري ولازم يحرره بشكل كامل أو يعومه ودا كان شبه اتفاق بين الحكومة وصندوق في مفاوضات القرض الاخير، ولكن الحكومة مقدرتش تحرر الجنيه بشكل كامل بسبب تطورات الوضع الاقتصادي وخطورة تبعات التعويم قبل توفير سيولة دولارية لامتصاص أي صدمات في سوق الصرف وإلا الدولار هيرفع بشكل كبير جدا، ودا هيسبب ارتفاع جديد في السلع والناس مش ناقصة وعشاان كده الرئيس السيسي رفض التعويم قبل الاستعداد التام لكن صندوق النقد رد بتأجيل المراجعة وعدم صرف باقي الشرايح.
الاتفاق مع الصندوق مهم جدا لكن في نفس الوقت الحكومة متقدرش ترضيه على حساب الناس، وهنا الحكومة هتدخل في مشكلة كبيرة لانها لازم في النهاية توصل لحل مع الصندوق عشان تتجنب التقارير السلبيية لوكالات التصنيف الدولية لأن التقارير دي بتجهض أي استثمار جديد وتحرم السوق المصري من ملياارات الدولارات العابرة للحدود، بسبب وجود أكتر من سعر للدولار وفي نفس الوقت القلق من عدم وجود اتفاق مع الصندوق واللي ليه تاثير كبير على قرار المستثمر واللي بيعتبر شهادة صندوق النقد جواز عبور للأسواق.
كده مصر بين مطرقة الصندوق وسندان وكالات التصنيف.. طيب الحل إيه.. شوف يافندم في الطبيعي الجنيه المصري لازم يبقى زي كل عملات العالم ويعكس قيمته الحقيقية وبالتالي سعره هيبقى عادل قدام باقي العملات وحتي لو مفيش أزمة دولار أو صندوق النقد أو تقارير دولية لأن دا هو الصح اقتصاديا ولأنه ماينفعش تحمي العملة بتاعتك لأن كده بتخرجها من مجال المنافسة، وفي الوقت نفسه لازم تبقى قيمة عملتك حقيقية وتعكس حجم الاقتصاد بتاعك وفي النهاية الحكومة هتاخد القرار وتحرر الجنيه لكن في الوقت المناسب لتجنب المضاعفات والأعراض الجانبية
