أسبوع الحسم.. 3 قرارات منتظرة هتعمل قلبان في الأسواق
يا ترى ايه اللى هيحصل الأسبوع ده؟ وايه القرارات الاقا=تصادية المنتظرة اللى ممكن تعمل قلبان في الأسواق؟ وايه علاقة اللى هيحصل في الولايات المتحدة الأمريكية يوم الأربع باللى هيحصل في مصر يوم الخميس؟ وهل فعلا الدولار سعره ممكن يوصل لـ 100 جنيه قريب ؟ وايه آخر اخبار مفاوضات مصر مع صندوق النقد الدولي؟
الأسبوع ده واللى بيبدأ من النهاردة السبت واحد من اهم وأخطر الأسابيع في 2023 والسوق في مصر وفى العالم بينتظر قرارات مهمة جدا هيكون ليها تأثير قوي على أسعار مهمة زي الدهب والدولار وغيرها من السلع فيا ترى ايه القرارات المتوقعة بالنسبة لاجتماع الفيدرالي الأمريكي وكمان اجتماع لجنة السياسة النقدية في البنك المركزي وايه مصير أسعار الفايدة على الدولار وعلى الجنيه وايه السناريوهات المتوقعة من اخر الأسبوع ده ولغاية نهاية السنة؟
يوم الأربع الجاى هيعلن الفيدرالي الأمريكي قراره بخصوصا أسعار الفايدة على الدولار في الولايات المتحدة الأمريكية وسط توقعات بتميل الى ان صناع السياسة النقدية في أمريكا ممكن في الاجتماع ده يدوا فرصة للاقتصاد المركي لالتقاط الأنفاس من خلال تثبيت سعر الفايدة على الأمريكية خصوصا وان بيانات التضخم ومؤشر البطالة حصل فيههم تراجع طفيف ممكن يدي فرصة لوقف جنون رفع أسعار الفايدة واللى مستمر بقاله للسنة التانية على التوالي في ظل الأوضاع العالمية الصعبة واللى بيحصل في سلاسل الامداد في كل مكان في العالم تقريبا.
طب ده هيكون ليه تاثير علينا في مصر؟
طبعا هيكون ليه تاثير مش علينا في مصر بس لكن على العالم كله لأن رفع سعر الفايدة في أمريكا بيسمع في ميزانيات كل الدول الفقيرة اللى زي حالاتنا لأن كل رفع للفايدة بيزود خدمة الدين وبيعمل فجوة تمويلية لأن اى حاجة بنستوردها من بره بالدولار سعرها بيزيد وعشان كده وقف قطار الفايدة وتثبيتها ومستقبلا خفضها ده قرار مهم جدا بالنسبة لينا هنا في مصر
طب وايه سيناريوهات اجتماع البنك المركزي في مصر بخصوصا أسعار الفايدة وطرح شهادات استثمار جديدة بفوايد أعلى؟
بعد يوم واحد من اجتماع الفيدرالي لجنة السياسة النقدية فى البنك المركزي هتعقد اجتماعها السادس فى 2023 يوم الخميس 21 سبتمبر للنظر في أسعار الفايدة وفقا لتطورات الأوضاع الخاصة بالتضخم واللي سجلت مستويات قياسية وصلت الى 40.4% في شهر اغسطس اللى فات وفقا لبيانات البنك المركزي
ولجنة السياسات النقدية التابعة للبنك المركزي المصري بتعقد 8 اجتماعات في السنة عملت منهم لحد دلوقتي5 اجتماعات في فبراير ومارس ومايو وآخرها ويونيو واغسطس والاجتماع الجاي رقم 6 في 2023 هيكون يوم الخميس الجاي
حد هيسأل ويقول ايه ممكن يحصل في الاجتماع وهل هيتم رفع الفايدة ولا تثبيتها؟
فيه تباين كبير في التوقعات ناس بتقول هيتم رفع سعر الفايدة للمرة التالتة على التوالي والخبراء اللى بيتوقعوا كده شايفين ان رفع سعر الفايدة هو الحل الوحيد لكبح جماح التضخم وكمان للسيطرة على السيولة النقدية وتقليل حجم الطلب على السلع فى السوق وبالتالى تخفيف الضغط على الدولار وعلى الاحتياطي النقدي
لكن العدد الأكبر بيتوقع تثبيت سعر الفايدة والاكتفاء بالرفع فى المرتين اللى فاتوا ودول شايفين ان اى رفع للفايدة هيؤدي الى زيادة التضخم وتباطؤ النمو والاستثمارات وكمان بيقولوا ان البنك المركزي لازم يدي الأسواق فرصة تمتص الرفع اللى حصل في اخر اجتماعين.
طب وايه تأثير قرار المركزي سوار رفع او تثبيت على الأسواق ؟
لو تم رفع أسعار الفايدة فده بيكون قرار صعب على صناع السياسة النقدية لأن رفع الفايدة بيعمل شلل في الإنتاج وبيخلى اى مستثمر معاه فلوس يروح يحط فلوسه في البنك وياخد عليها فايدة ثابتة كبيرة بدل ما يفتح مشروع ويوفر فرص عمل ويساهم في زيادة الإنتاج لأنه وقتها هيحسبها ايه اللى يخليها يغامر ويدفع ايجار ومرتبات وفواتير كهربا وغاز ومياه في حين انه ممكن يحط فلوسه في البنك وهياخد ربح صافي من غير اى تكاليف.. كمان رفع الفايدة بيزود الضغط على الموازنة العامة لأن الحكومة هي أكبر مستدين من البنوك
اما بقا لو تم تثبيت أسعار الفايدة فدي رسالة مهمة للأسواق ان الأوضاع بتتحسن وان الأسعار ممكن تنزل الفترة الجاية
وعشان كده الأسبوع ده مهم جدا وهيغير كتير من الأوضاع الاقتصادية
