مفاجآت سارة من الرئيس للمصريين.. بشاير الخير هلت في نهاية النفق الصعب

النهاردة يوم سعيد على كل المصريين، والرئيس السيسي قدر كعادته يجدد الامل عند الناس ويبدد كل الغشاوة اللي عاشها المواطنين طول الفترة اللي عدت وقدر يجهض كل محاولات أهل الضلال والفتنة والإعلام المدفوع والتقارير المشبوهة ويقول إن مصر بخير وقوية والغمة انزاحت وإن الدولة شغالة ليل نهار للتخفيف عن المواطنين وعمرها ما هتسيبهم لجشع التجار ولا لغول الأسعار وإن اللي جاي كله خير .. ايه اللي حصل نهاردة وبدل زعل المصريين فرحة وليه الرئيس أعلن قراراته من بني سويف في صعيد مصر وازاي القرارات دي هتخفف على المصريين الأيام الصعبة واللي قربت تنتهي.

النهاردة الرئيس السيسي زار بني سويف في صعيد مصر لافتتاح مشروعات كعادته في كل المحافظات واتكلم في حاجات كتير مهمة جدا تخص الاقتصاد والوضع الحالي وصارح الناس بالتحديات اللي بتواجه الدولة المصرية في ظل الظروف العالمية وفي خلال شرحه للوضع الاقتصادي الحالي للدولة أصدر الرئيس قرارات ومفاجآت سارة جدا للمصريين عشان تساعدهم في مواجهة غلاء المعيشة ومنها رفع الحد الأدنى للأجور إلى 4000 جنيه بدل 3500 جنيه لكافة العاملين بالدولة وكمان قرر السيسي رفع حد الاعفاء الضريبي بنسبة 25% من 36 الف جنيه الي 45 ألف جنيه واستمرت مفاجآت الرئيس السيسي للمصريين واعلن اعفاء المتعثرين من سداد غرامات التاخير عن سداد القروض الزراعية وكمان زيادة علاوة غلاء المعيشة إلى 550 جنيه بدل 300 جنيه ومضاعفة المنحة الاستثنائية لاصحاب المعاشات والمستفيدين منها ل600 جنيه بدل 300 جنيه لخدمة 11 مليون مستفيد.

كمان وجه الرئيس عبدالفتاح السيسي، بإعفاء المتعثرين من سداد فوائد وغرامات تأخير سداد الأقساط المستحقة، للهيئة العامة لمشروعات التعمير والتنمية الزراعية، بحد أقصى نهاية 2024 وزيادة بدل الصحفيين كمان.
الناس هتسال سر قرارات الرئيس السارة النهاردة وخاصة مكانش فيه مقدمات خالص.. والحقيقة مفيش سر ولا حاجة وكل الحكاية إن مؤسسة الرئاسة المصرية بتابع كل التقارير الاقتصادية والمؤشرات الاجتماعية لحظة بلحظة والرئيس عمره ماكان منفصل عن أحوال الناس وبيتابع كل صغيرة وكبيرة ولما يلقى الأمور اتصعبت على الناس بيدخل فورا بقرارات تخفف عنهم واختار الرئيس في البداية الموظفين ورفع الحد الأدنى المرتبات عشان الموظفين بيشكلوا  شريحة كبيرة جدا في الشعب المصري والأسر ورفع مستواهم المعيشي هينعكس على ملايين الأسر والمواطنين وخاصة في وقت دخول المدارس والمصاريف الزيادة ولأن الموظف هو أساس الطبقة المتوسطة في مصر.
الرىيس السيسي انقذ ملايين المواطنين والمزارعين بالذات من تعثرات القروض المختلفة وإزالة الغرامات هتيحي عندهم الامل من جديد وهينعش حركة المصارف ومن أعظم قرارات الرئيس نهاردة هو زيادةحد الإعفاء الضريبي من 36 ألف جنيه الي 45 ألف جنيه ودا هيشيل هم وحمل كتير على أصحاب المشروعات والمواطنين وكمان متنساش هدية الرئيس للصحفيين وتحسين مستواهم المعيشي ودا اكبر دليل على رعاية الرئيس والدولة للصحفيين وأصحاب الرأي وبيكدب كل التقارير اللي بتروج لمحاصرة الدولة لأصحاب الرأي والفكر.

هدايا الرئيس السيسي للمصريين جت في وقت مناسب جدا مع ارتفاع التضخم وزيادة الأسعار ومع قرارات اقتصادية تانية في الفترة الجاية خاصة بزيادة المعروض وتخفيض فاتورة الاستيراد وزيادة توافر الدولار مصر هتعدي من عنق أخطر أزمة اقتصادية في تاريخها الحديث وبيأكد قدرة الدولة ماليا واقتصاديا رغم الأزمات العالمية وكمان قرارات الرئيس السيسي من بني سويف والصعيد رسالة مهمة جدا وهي إن الدولة مع المواطن العادي واللي بيعاني واغلبهم في صعيد مصر اللي جدد ثقته وحبه في قيادة الرئيس السيسي.