«إنستاباى» هايبقى عالمي.. البنك المركزي هايحل أزمة تحويلات المصرين بالخارج

تطبيق "إنستاباي" المحلي هايبقى دولي.. والمصريين بالخارج هايحولوا الفلوس وهما في البيت،العنصر البشري شبه هايختفي من التعاملات البنكية خارج الدولة؟؟اية خطة البنك المركزي لإزالة معوقات تحويلات المصريين بالخارج..دا اللي هانعرفه دلوقتي

الفترة اللي فاتت.. تراجعت تحويلات المصريين العاملين في الخارج بنحو 26 بالمئة في الفترة بين يوليو 2022 إلى مارس 2023.. ودا سبب معاناة في مسألة توفير العملة الصعبة.

وبيانات البنك المركزي المصري، كشفت عن دا بوضوح.. لما قالت إن تحويلات المصريين بالخارج انخفضت إلى حوالي 17.5 مليار دولار في الفترة ما بين يوليو ومارس من العام المالي الجاري، مقابل نحو 23.6 مليار دولار في نفس الفترة من العام الماضي.

ومن وقتها لحد دلوقتي.. البنك المركزي مش ساكت وبيحاول بكل الطرق الممكنة أنه يسهل عملية التحويل من خارج البلد إلى البنوك المحلية في مصر.

عرفنا خطة البنك المركزي علشان يسهل عمليات التحويل.. والنهاردة هانقولكم عليها بالتفصيل.

بص يا فندم.. أنت عندك في مصر.. تطبيق اسمه إنستاباي.. ودا برضوا أطلقه البنك المركزي من فترة.. ومهمته الأساسية هو أنك تقدر تحول فلوس لأي شخص وأنت من البيت.. أنك تقدر تدفع فواتيرك وأنت من البيت.. ودا تسبب في ضخامة عمليات التحويل بين الأشخاص وللشركات وغيره.

التطبيق دا وفر مجهود ووقت على ناس كتير داخل مصر.. وكمان حدود السحب لقيمة المعاملة بلغت من خلال التطبيق من 50 ألف جنيه إلى 70 ألف جنيه، والحد الأقصى الشهري للمعاملات بقى 400 ألف جنيه، بدل من 200 ألف جنيه.

وكمان رامي أبو النجا نائب محافظ البنك المركزي المصري، قال إن المعاملات المصرفية عبر الإنترنت سجلت 3 تريليونات جنيه خلال الـ 6 أشهر الماضية.

البنك المركزي شاف أنه يعمم فكرة التطبيق دي على المصريين بالخارج ودا علشان يحفزهم على تحويل فلوسهم لداخل مصر.. وأن المصريين بالخارج مايحتفظوش بأموالهم أو يحطوها في بنوك أخرى في الدول اللي هما فيها. ودا هايعظم من تحويلات المصريين بالخارج، وبالتالي التحويلات دي هايرفع من دخول الاقتصاد المصري.

حاليًا بقى.. البنك المركزى المصرى بيدرس ربط تطبيق «إنستاباى» بـ3 دول عربية، ودا زي ما قولنا علشان يسمح للمصريين العاملين فى الخارج بالتحويل من حساباتهم فى البنوك المحلية.

والدول العربية اللي هايطبق معاهم المركزي الموضوع دا هما الإمارات، السعودية، والأردن.

بس في جزئية مهمة لازم نركز عليها.. وهو أن البنك المركزي هايفرض عمولات بمبالغ محدودة على معاملات إنستا باي،لما يبدأ في تنفيذ الموضوع دا.

بس كدا دا اللي إحنا عايزين نقوله.. لأ طبعا لأن البنك المركزي كمان بيدرس أنه يعتمد التطبيق بين عدد من دول تكتل بريكس.. ودي خطة مستقبلية جاري دراستها.

المهم اللي حضراتكم لازم تعرفوه بجانب الموضوع دا .. هو أن مسألة توقف الجهاز المصرفي بمصر، عن صرف تحويلات المصريين بالخارج، أو اشتراط الحصول على مقابلها، مقابل الجنيه، مش حقيقي ... والجهاز المصرفي ملتزم تمام بصرف قيمة تحويلات المصريين بالخارج لأصحابها بنفس عملة التحويل.

وكمان تحويل أموال المصريين بالخارج إلى مصر، مابيخضعش  لأي قيود وبيتم صرف القيمة بالعملة الأجنبية أو العربية بحسب طلب العميل.