اغتيال الجنيه المصري.. مؤسسة دولية تتوقع سعر الدولار فى 2024
رغم حالة الاستقرار الكبيرة فى سوق صرف الجنيه أمام العملات الجنبية وانهيار أسعار العملة الأمريكة فى السوق السودا للدولار الا ان المؤسسات الدولية مستمرة فى محاولاتها لاغتيال العملة المصرية وتقريبا مفيش تقرير بيصدر عن أى مؤسسة الا وبيؤكد ان التخفيض فى قيمة الجنيه هيحصل يعنى هيحصل .. للدرجة اللى تخليك تحس ان مفيش عملة فى العالم غير الجنيه المصري اللى مؤسسات التمويل مركزة معاه وبتتابع أدق التفاصيل عنه وعن مستقبله ومصيره.. ومن ساعات صدر تقرير جديد لمؤسسة دولية زود التكهنات حوالين مصير العملة المصرية.. فيا ترى التقرير قال ايه ؟ وايه توقعاته لسعر الدولار فى الشهور اللى فاضلة من 2023 وكمان فى السنة الجاية؟
مؤسسة "فوكاس إيكونومكس "، وهي مؤسسة دولية ليها اسممها فى عالم الأبحاث الاقتصادية طلعت النهاردة تقرير مهم عن مسارات الاقتصاد الكلى لمصر فى الشهور الجاية.
المؤسسة فى تقريرها ركزت على مستقبل الجنيه المصري قدام العملات الأجنبية وعلى راسها طبعا الدولار وتوقعت ان سعر الدولار الأمريكي فى البنوك الر سمية يوصل على نهاية 2023 الى 34 جنيه و69 قرش ويوصل على نهاية 2024 الى 36 و9 قروش.
وكشفت توقعات المحللين في فوكاس إيكونومكس في سبتمبر 2023 ان الناتج المحلي الإجمالي نما بنسبة 3.9٪ على أساس سنوي في الربع التالت من السنة المالية 2023 (يناير - مارس 2023)، ودي نفس الزيادة اللى حصلت في الربع التاني وفقًا للبنك المركزي المصري.
وقالت المؤسسة فى تقريرها ان أداء الاقتصاد جيد على الرغم من التحديات المستمرة،لكنها أكدت انه مش واضح هل الزخم ده هيستمر فى الربع الرابع من 2023 والربع الاول من السنة الجديدة ولا لأ.
وأكد تقرير فوكاس إيكونومكس التقرير ان نمو الناتج المحلي الإجمالي في السنة المالية 2024 مش هيختلف بشكل كبير عن السنة المالية 2023، وهيدعم التمويل من صندوق النقد الدولي والبنك الدولي تنفيذ الإصلاحات ودعم ثقة المستثمرين.. وبيتوقع محللي "فوكاس إيكونومكس" ارتفاع الناتج المحلي الإجمالي بنسبة 4.0٪ في السنة المالية 2024، والارتفاع بنسبة 4.6٪ في السنة المالية 2025.
تقرير المؤسسة الدولية جاى فى وقت وصل فيه التضخم إلى مستوى قياسي جديد وبلغ 39.7٪ في أغسطس، أي أكتر من أربع أضعاف الحد الأعلى للنطاق المستهدف للبنك المركزي المصري.
واتوقعت المؤسسة أن معدلات التضخم تفضل قريبة من المستويات الحالية لغاية نهاية السنة.. واتوقعت كمان انخفاض إجمالي استثمارات مصر بنسبة 14.1٪ في 2023، مقارنة بزيادة قدرها 16٪ في 2022، ثم ارتفاعها بنسبة 7.5٪ في 2024. ط
وفي الوقت نفسه من المتوقع ارتفاع الصادرات بنسبة 20٪ بحلول نهاية 2023 وبنسبة 6.6٪ في 2024 مع انخفاض واردات مصر بنسبة 4٪ في 2023 وتزداد بنسبة 3.3٪ في 2024.
ومن المنتظر ان البنك المركزي يعقد اجتماع لجنة الساسة النقدية بعد حوالى 10 ايام للنظر فى اسعار الفايدة وسط توقعات متزايدة برفعها من جديد فى الاجتماع المرتقب.
ولازم نكون عارفين ان التقارير اللى بتطلع من المؤسسات الدولية عن سعر صرف الجنيه مجرد توقعات يعنى ممكن تحصل وممكن لأ وكلنا بنسمع عن التعويم الجديد ده بقالنا كتير لكن على ارض الواقع سعر الصرف مستقر عند حدود 31 جنيه فى البنوك وشركات الصرافة المعتمدة وحتى فى السوق السودا العملة الأمريكية بدات تتراجع بشكل ملحوظ من بعد اعلان انضمام مصر لتحالف بريكس وبعض القرارات الحكومية الايجابية اللى كان ليها تاثير قوي على السوق الموازية وعلى المضاربين فى العملة.
