اللمسات الأخيرة قبل التعويم.. كله يشد الحزام
فيه تعويم ولا مفيش.. ولو فيه الحكومة هتاخد القرار امتي، وإيه تأثيره على الاسواق، وليه خبراء الاقتصاد بيتوقعوا تحرير سعر الجنيه في القرييب العاجل.
مهما طالت المدة التعويم لابد منه ومش بس عشان مطلب صندوق النقد أو المستثمرين أو السوق والقطاع الخاص، لا لكن لأن دي طبيعة سوق الصرف وقواعد اسعار العملات، ولأن الجنيه زيه زي أي عملة أجنبية لازم يتداول بسعره العادل ومش معني بردوا التعويم إن الجنيه قيمته هتنزل على طول الخط بالعكس لما يتعوم هيتحط على أول الطريق إنه ينافس العملات الدولية ويشتد عوده.
زي مااتفقنا إن خطوة التعويم مهمة جدا حتى لو مفيش قرض الصندوق أو شكاوى المستثمرين، في النهاية الخطوة مطلوبة عشان اقتصادك ينتعش وينطلق صح وينافس، وكلنا بردو شفنا الرئيس السيسي بيقول مفيش تعويم عشان دا هيزود الأعباء على المواطنين.. طيب إزاي الرئيس هيوقف ضد مصلحة البلد والاقتصاد طالما التعويم ضروري اقتصاديا عشان الاستثمار وتوحيد سعر الجنيه زي ماقلنا.. شوف حضرتك الرئيس السيسي لما رفض خطوة التعويم كان قصده التعويم في وقت معين يعني كان اعتراضه على التوقيت، لأنه ماينفعش مثلا أعوم الجنيه وأنا معنديش رصيد كافي من الدولار عشان أواجه بيه تبعات تحرير سعر الجنيه، ودا اللي قالته المؤسسات المالية الدولية إن التعويم من غير رصيد معقول من الدولار ملهوش لازمة ومش هيأدي الغرض منه.
طيب دلوقتي نقدر نقول إن التعويم قرب.. فعلا نقدر نقول إن قرار تحرير جديد لسعر الجنيه على الابواب أو ممكن يكون اتاخد بس في انتظار الاعلان أو التوقيت المناسب، وهنرجع نقول ليه دلوقتي التعويم بقى ضروري وملح.. عشان بردوا الدولة قدرت توفر حصيلة معقولة من الدولار والبنوك بدأت يبقى عندها احتياطي كويس بدليل توفير احتياجات الشركات بمختلف أنواعها من النقد الأجنبي وانتهاء مشكلة الافراجات الجمركية وانتظام عمليات الاستيراد وفي نفس الوقت ارتفاع حصيلة الطروحات الحكومية والصفقات اللي هيتم الاعلان عنها وزيادة التدفقات الدولارية.
خبراء السوق المالي شايفين إن اليومين دول هو الوقت المناسب للتعويم، مع اقتراب مراجعة الصندوق الدولي لبرنامج الاصلاح الاقتصادي واللي هيتوقف علي الاتفاق حاجات كتيرة جدا، وأهمها ملف الاستثمار فلو حصل اتفاق مع صندوق النقد يبقي مصر لازم تاخد خطوة توحيد سعر صرف الجنيه عشان تستفيد من الوضع الجديد مع صندوق النقد واللي الاتفاق معاها هيفتح الباب لتمويلات جديدة هتساعد في ردم أزمة الدولار، وحسب الخبراء الحكومة بتحط اللمسات الأخيرة لتعويم الجنيه واتخاذ خطوات كتيرة مهمة قبلها.
