أوامر عليا بالاهتمام بالنوابغ والتعليم في مصر
مافيش حد في مصر يقدر يقول إن التعليم في أفضل أحواله.. وبرضوا مافيش حد يقدر يقول إن مافيش إرادة حقيقية لتحسين البيئة التعليمية والنهوض بجودة التعليم .. لكن دايما في ملفات بتاخد وقت وبتحتاج توافر فلوس وإمكانات كبيرة.
وخلينا نقول لحضراتكم أن في دلوقتي أوامر عليا من القيادة السياسية بضرورة الاستمرار في تطوير وتحسين بيئة العملية التعليمية.
والأوامر العليا اللي بنقول عليها دي.. مش سر ولا حاجة.. دي تعبيرًا عن تصريحات أدلى بيها الرئيس السيسي بنفسه.. واللي وجه من أسابيع بمواصلة التركيز على تطوير الكوادر البشرية ومنظومة المعلمين، خاصة العنصر البشري، وضرورة الاهتمام بيه.
كمان الرئيس السيسي عقد اجتماع من فترة مع الدكتور مصطفى مدبولي رئيس مجلس الوزراء، والدكتور رضا حجازي وزير التربية والتعليم والتعليم الفني، والفريق أشرف سالم زاهر مدير الأكاديمية العسكرية المصرية.
والاجتماع دا عكس عزم القيادة السياسية على النهوض بالتعليم.. خاصة أنه تناول محاور تطوير منظومة التعليم في مصر بمختلف محاورها الرئيسية، خاصةً محور المعلمين، ومسألة دعم الكوادر البشرية من المعلمين، وحسن انتقائهم وتوفير الأعداد المناسبة منهم بما يتوافق مع أعداد الطلاب.
ملامح عملية التطوير المنتظرة في ملف التعليم.. هايكون التدريب ورفع قدرات المعلمين أحد ركائزها الأساسية.
خلينا بس في الأول نكون متفقين.. أن مافيش أي تطوير ممكن يحصل في العملية التعليمية من غير الارتقاء بالمعلم،.
وعلشان كدا.. الحكومة خصصت وحدة تدريب فى كل مدرسة وإدارة تعليمية، ودا علشان يقدر المعلمين أنهم يواكبوا التحديثات الجارية في المناهج وأنهم يقدموا أفضل أسلوب للطلبة في الفهم والدراسة.
ولازم تكون عارف أن منهج التعليم الجديد في مصر.. مش هايكون قاصر على الموضوعات القديمة اللي اتهرت بحث ودراسة.. لأ هايكون في موضوعات معاصرة وواقعية زي مثلًا أن المناهج الجديدة هاتناقش قضية مهمة زي الزيادة السكانية.. ودا مهم في مسألة إقناع النشء والشباب بخطورة الزيادة السكانية وتأثيرها على التنمية.
كمان .. لازم نعرف أن الدولة في المرحلة الراهنة مهتمة اوي بمسألة دعم ورعاية المتفوقين والموهوبين والنوابغ، ودا بيتم من خلال معايير ورؤية واضحة واستراتيجيات وتشريعات لاكتشاف الشباب الموهوب وصقل مهاراتهم وخبراتهم وتوجيه برامج دراسية ومهارات رقمية علشان تساعد على تطوير مواهبهم.
والرئيس عبدالفتاح السيسي بنفسه وجه قبل كدا خلال اجتماعه بالمجلس الأعلى للجامعات، بأهمية دعم ورعاية الموهوبين والنوابغ والمتفوقين، ووضع آليات لاكتشافهم وبناء جيل من الكوادر الشابة المتميز.
وبالفعل الجامعات في مصر أنشأت مراكز رعاية للموهوبين والنوابغ والمُبدعين، واللي بتختص باكتشاف المواهب والنوابغ في المجالات الفنية والأدبية والعلمية والتكنولوجية والرياضية ورعايتها، وتعميم برامج مُحددة لتلبية احتياجاتهم وتنمية قدراتهم.
