مفاجأة.. بعد البريكس مصر عضو في مجموعة العشرين الكبرى

إزاي مصر بقت على مشارف الانضمام بشكل رسمي لمجموعة أقوى 20 اقتصاد في العالم من غير ماتقدم طلب ولا تدخل في مفاوضات زي ما حصل كده في الانضمام لمجموعة بريكس.. وإيه اللي ممكن يحصل ساعتها

معروف إن مجموعة العشرين أو G20 بتضم أقوى 20 اقتصاد في العالم وهي منتدى للتعاون الاقتصادي والمالي بين الدول الاعضاء وجهات ومنظمات دولية بتلعب دور محوري في الاقتصاد والتجارة في العالم وبتجتمع سنويا في إحدى الدول الأعضاء فيها وبتمثل الدول الأعضاء 85% من الناتج المحلي الإجمالي العالمي وأكتر من 75% من التجارة العالمية، وما يقرب من ثلثي سكان العالم، وتضم 19 دولة والاتحاد الأوروبي.

وبجانب الاعضاء فيه جهات مهمة جدا ومؤسسات بتحضر اجتماعات القمة دي زي صندوق النقد الدولي، البنك الدولي، منظمة التجارة الدولية، مجلس الاستقرار المالي، منظمة التنمية والتعاون الاقتصادي، منظمة العمل الدولية، الأمم المتحدة، كما يحق لرؤساء الدول المشاركة في القمة دعوة زعماء من خارج المجموعة.

نرجع لموضوعنا وهي إزاي مصر هتبقى عضو رسمي في العشرين.. الحكاية مش لغز ولا حاجة لكن رئيس الوزراء الهندي وهي دولة مهمة جدا في المجموعة بعت رسالة رسمية إلى زعماء دول مجموعة العشرين اقترح فيها منح الاتحاد الإفريقي العضوية الكاملة والدائمة في المجموعة الدبلوماسية خلال قمتها المقبلة في الهند.

وأكدت المصادر داخل المجموعة إن اقتراح الهند يظهر التزامها بتعزيز تمثيل إفريقيا وإشراكها في الشؤون العالمية.

وقال المصادر عن الاقتراح إنه خطوة صحيحة نحو بنية وحوكمة عالمية عادلة ومنصفة وأكتر شمولا وتمثيلا، ورئيس الوزراء الهندي بيؤمن بشدة بأن يكون لبلدان جنوب العالم صوت أكبر في المنصات الدولية وخاصة البلاد الإفريقية.

طبعا انضمام الاتحاد الأفريقي ككتلة لمجموعة العشرين معناه انضمام كل دوله للكتلة الاقتصادية الأهم في العالم ومصر هي قلب القارة الافريقية وأكيد خطوة زي دي لو تمت هتفرق جدا في الوضع الاقتصادي للقارة الأفريقية ولمصر تحديدا واللي عندها فرص اقتصادية واستثمارية ضخمة محتاجة تسوقها للعالم الغني وكمان بتعتبر بوابة العبور الشرعية للقرن الأفريقي وكمان وجودها في التكتل هيفتح ليها بوابة الشراكات الاقتصادية مع مختلف القوى العظمي.