سر هدوء الدهب وموعد العاصفة الجاية والبديل السحري
ياترى ايه سر استقرارا وانخفاض الدهب في اليومين اللي فاتوا وهل تستمر حالة الاستقرار والانخفاض ولا ممكن الأمور تنقلب رأسا على عقب والجنون يرجع الأسواق تاني وايه انسب وقت تشتري فيه الدهب.
لو عاوز دهب إلحق اشتري دلوقتي ودي مش نصيحتنا لكن دي نصيحة تجار السوق وشعبة الدهب واللي شايفين إن حالة الاستقرار ونزول الأسعار والهدوء اللي موجوده في السوق دي انسب حالة تشتري فيها دلوقتي عشان تشيل حاجة تنفعك للزمن أو في الأيام الجاية واللي ممكن يحصل فيها.. طيب ليه الدهب مستقر اليومين دول.. دا سؤال مهم واجابته بسيطة جدا وهي أن الدهب سوق حساس محليا لأي اخبار سلبية عن الاقتصاد وهو سوق بيعتمد بقدر كبير على الخوف وأحيانا الإشاعة والأكاذيب واللي بتخلي الناس تجري تشتري وتخزن سبايك ودهب ومشغولات عشان سمعت إن مثلا الحكومة هتعوم الجنيه تاني او الدولار هيولع في السوق السوداء والبنوك فالناس تتحوط وتشتري دهب تحتفظ بيهم على قيمة فلوسها.
خبراء السوق شايفين إن الدهب ممكن يستمر كده لآخر السنة وممكن ينزل تاني كمان لو اجتنبت الحكومة التعويم والبنك المركزي مطلعش قرارات صعبة في اجتماعه الجاي بخصوص سعر الفايدة وغيرها من القرارات وكمان لو فضل السوق العالمي الدهب في حالة استقرار ، وفي مصر سوق الدهب ليه خصوصية شديدة بعيد عن الأسواق العالمية أحيانا وساعات مثلا تلاقي الدهب عالميا بينزل وعندنا بيزيد والعكس صحيح ولما الخبراء بحثوا الموضوع دا لقيوا إن السر في ثقافة المصريين وتوقيت شراءهم للدهب والعرض والطلب، وإن المصري بمجرد مابيحس بالخطر فورا بيحول الفلوس والسيولة اللي معاه لدهب أو معدن عشان يحافظ على قيمتها ولان الجميع بيفكر في نفس الفكرة وفي نفس الوقت بتلاقي زحام شديد على محلات الصاغة والطلب بيزيد عن المعروض والاسعار ترفع.
امتى طيب الدهب ممكن يزيد وأسعاره توصل السماء.. زي ما قلنا لحضرتك لو فيه قرارات اقتصادية صعبة الفترة الجاية أسعار الدهب هترفع بشكل كبير ودا ممكن يتحدد في شهر أكتوبر اللي جاي عشان هو أخطر شهر في السنة الكبيسة اللي شافها المصريين لانه المفروض فيه هام مراجعة صندوق النقد الدولي لبرنامج القرض والإصلاح الاقتصادي ولو الصندوق مصرفش باقي الدفعات للقرض يبقى هتبقى أزمة ونظرة سلبية للوضع الاقتصادي المصري وهنا الدهب ممكن يرفع لأن الناس هتحس إن الحكومة مش قدامها حل غير تعوم الجنيه وبشكل كبير عشان تخلص موضوع صندوق النقد الدولي وعشان الاقتصاد المصري مش حمل تقارير وتصنيفات دولية سلبية في الوقت دا.
كمان خبراء الاقتصاد شايفين إن الدهب ممكن يتراجع عن كونه الملاذ الآمن الاول في مصر مع تغير التفكير الاقتصادي عند كتير من المصريين واللي بدأوا يفكروا ازاي يستغلوا فلوسهم ومدخراتهم ويشغلوها وبدل ما يحافظوا علي قيمتها ويركنوها سنين لو اشتروا بيها دهب وبدل الفلوس ما تتركن تتحط في مشروع يجيب عائد كويس ومنها يحافظ على أصل فلوسي حتى لو قيمة الجنيه قلت أو انخفضت وفي نفس الوقت بيطلعلي ربح ودخل إضافي ودا ممكن يحلق ثقافة جديدة ترجع التوازن والاستقرار لسوق الدهب المصري اللي عايش على الخوف من اللي جاي والأزمات هي اللي بتحدد سعره.
