إنتشار الدولارات المزيفة في السوق السوداء يثير رعب المضاربين
ايه اللي بيحصل في السوق السودا للدولار وايه الصدمة اللي ضربت التجار والمضاربين وايه حكاية الدولارات المزيفة اللي انتشرت في السوق الموازية وحجم الخساير اللي اتعرض ليها المضاربين وأصحاب المكسب السريع.
من كام يوم طلع خبير اقتصادي كبير في فضائية من الفضائيات وقال كلام مهم جدا عن سعر الدولار العادل ومن بين كلامه إن الدولار في السوق السوداء مشكوك في سلامته يعني مزور أو محمد .. والناس ممكن تعرف يعني ايه مزور لكن مجمد دي جديدة وهي ببساطة إن الدولار الأمريكي مش كله واحد لكن بيكون عليه رقم اصدار السنة ورقم مسلسل زي اي عملة وحكومة الولايات المتحدة بتطلع قرارات أحيانا بتجميد أرصدة دول وحكومات وأشخاص زي ما حصل مع روسيا وبتمنع التعامل على الدولار بإصدار معين يعني مثلا تجميد الدولار اصدار سنة 2018 وبارقام مسلسلة معينة وبيبقى هو والعدم سواء وعلى فكرة سعر الدولار بيتحدد بردو برقم الاصدار وبينول كل ما كان الاصدار قديم.
لكن كلامنا هنا عن الدولارات المزيفة واللي انتشرت في الفترة الأخيرة بقوة خاصة في السوق السوداء وهتقولي ليه السوق السوداء بالذات .. هقول لحضرتك عشان سوق كله طمع ومضاربة وسباق على المكسب وأطرافها مش مرتبطين ومايعرفوش بعض وعشان كده سهل تسريب دولارات مزيفة في سوق مليان مخالفات ولأن كمان المشتري مش هروح البنك يكشف على الدولار عشان ما يتكشفش ويتعرض للمسألة القانونية.
والفترة الأخيرة زي ما قلنا اكتشف تجار كتير أنهم وقعوا ضحية الدولارات المزيفة ومعرفوش يرجعوها لانهم ما يعرفوش البائع وفي نفس الوقت مايقدروش يبلغوا الأجهزة الأمنية أنهم اتعرضوا للنصب بسبب نشاطهم المخالف والمعلومات اللي جاية من السوق بتقول أن تجار ومضاربين اتعرضوا لخساير ضخمة بعد وقوعهم في فخ الدولارات المزيفة ، وطبعا دي فرصة دهبية للمزورين اللي لقيوا سوق مفتوح وكله طماعين ومضاربين عشان يروجوا للدولار المزيف أو الدولار المجمد والملغي مستغلين جشع المكسب السريع.
وانتشار الدولار المزيف في السوق السوداء خلى تجار كتير توقف نشاطها وفيه حالة من الفوضى بتعيشها السوق بسبب الخساير زي ما قلنا اللي حصدها تجار العملة ولأن المعلومات بتقول أن فيه ملايين الدولارات المزيفة دخلت السوق السوداء فدا كفيل إنه يصيبها بالشلل التام.
