أكتر سؤال شاغل العالم.. ليه بريكس ما أعلنش عن بديل الدولار؟ السر في "خطة الثعالب"

من يوم الخميس اللى فات ولحد دلوقتى أكتر سؤال شاغل أجهزة المخابرات في العالم ومؤسسات المال والأعمال هو ليه تجمع بريكس ما أعلنش عن العملة العالمية الجديدة البديلة للدولار؟ وهل كده خلاص مفيش تفكير في العملة الجديدة ؟ وليه التجمع اكتفى بس بالإعلان عن قبول عضوية 6 دول جديدة؟ وايه دور الامريكان في تأجيل الإعلان عن بديل الدولار؟ والسؤال الأهم هو فعلا بريكس تقدر تعمل كده وتقدر تنهي أسطورة الدولار في العالم؟ وامتى ده ممكن يحصل ؟ 
 
اجتماع مجموعة بريكس اللى استضافته جنوب افريقيا نهاية الأسبوع اللى فات كان محل اهتمام من كل أجهزة المخابرات في العالم وكل دولة كانت قاعدة تراقب اللى بيحصل في الاجتماع وتأثيره على مستقبل الاقتصاد العالمي خصوصا ان الاجتماع ناقش لأول مرة ملفين من أخطر الملفات الأول توسيع قاعدة بريكس عالميا وانتهى الى ضم 6 دول من الدول اللى طلبت الانضمام للتجمع والملف التانى اللى ما تمش اعلان نتايجه لحد دلوقتي استحداث عملة عالمية جديدة بديلة للدولار خصوصا بعد ما تم استخدام العملة الأمريكية كسلاح ضد كتير من الدول الرافضة للسياسات الأمريكية
فيا ترى ليه بريكس ما أعلنش عن العملة البديلة للدولار؟ 
لازم في البداية نكون عارفين ان استحداث عملة جديدة والاعتراف بيها كعملة احتياط عالميا مش موضوع سهل خالص ولازم ياخد وقت وإجراءات ودراسات عن شكل العملة وعن الدول اللى هتبدأ تتعامل بيها في المرحلة الأولى وكل ده محتاج شوية وقت وده اللى دول بريكس شغالة عليه دلوقتي في الكواليس .. دي نقطة 
النقطة التانية فيه خطة ثعالب بتنفذها بريكس في اطار حربها وصراعها مع الامريكان والهدف من تأجيل الإعلان عن العملة البديلة للدولار ايهام الأمريكان ان التجمع لسه مش قادر يطلع العملة دلوقتى وان بتواجهه مشاكل كبيرة عشان يقدر ينافس الدولار وده هيدي بريكس فرصة تشتغل براحتها على مشروع العملة وهيفسد أي محاولات أمريكية للقضاء على الفكرة 
لكن في الحقيقة بريكس شغالين في ملف العملة البديلة للدولار على قدم وساق وخلال فترة صغيرة هيبدا تنفيذ الفكرة على ارض الواقع، ومصر هتكون من أكتر المستفيدين من العملة الجديدة لأن مصر من أكتر الدول اللى بتعانى من أزمة نقص الدولار والعملة الجيدة هتخلى فيه خيارات تانية غير الدولار تقدر مصر تعتمد عليها في مستلزماتها من الخارج. 
مش بس كده بريكس شغالة على مشروع ضخم للاعتماد على العملات المحلية للدول الأعضاء هتخلى اى دولة في التجمع تتخلى عن الدولار في تعاملاتها التجارية وده برضوا هيقلل ويخفف الضغط على الجنيه.